TUMAU UIGA LOULOUA O LE TAU - NOFOUTA TAIMI O FEOAIGA:

Ua fa'ailoa mai le tumau pea o uiga louloua o le tau i le taimi nei.

I le aso ananafi, sa matua iloga ona agi fa'ata'uta'u mai matagi i lona malosi e o'o i le 65 maila i le itula, ae o le tele o taimi o matagi malolosi e amata mai i le 25 maila i le itula se'ia o'o i le 40 maila i le itula. O matagi e matele ina agi mai i le itu i matu o le atunu'u.

E toulu timuga i nisi taimi, e matele fo'i ina emo uila ma papa faititili i nisi o taimi. I le po anapo, sa toulu vava lava timuga o nisi o taimi e tetele, ae o nisi o taimi e toulu fa'atasi mai ma le agi o matagi malolosi.

O le taeao nei ua fa'ailoa mai ai matagi malolosi e matele ina o'o i le 50 maila i le itula i taimi e to fa'ata'uta'u ai, ae o matagi e agi mai le itu i matu i sisifo e amata i le 20 - 35maila i le itula le malolosi.

I le afiafi ma le po o le aso, e toulu vava fo'i timuga. E i ai taimi e papa ai faititili. E agi mai matagi i le itu i matu i sisifo ae foliga mai se'e atu aga'i i sisifo i se taimi o le po. O le malolosi o na matagi e amata mai i le 20-35 mph i le aoauli nei, peita'i e a to fa'ata'uta'u le malosi o matagi e o'o le malosi i le 50 maila i le itula.

Ua mae'a fautuaina le mamalu o le atunu'u i tulaga o lologa ma sologa e ono tutupu mai ona o le tetele o matagi ma timuga o le toulu fa'atasi mai ai lava.

Ua fautuaina lava fo'i aiga uma i o latou fale nofo ina ia puipuiamalu, aua ua amata lava ona tetele mai matagi oso fa'ata'uta'u ma e ono afaina ai nisi o la'au e tutu i tafatafaane o maota ma laoa, ma e pa'u'u aga'i i fale.

O lo ua fautuaina fo'i le vaega o tagata femalaga'i i va'a laiti mo feoa'iga, ae maise o e fagogota, ia matauina uiga louloua o le tai ma fuafua tatau i ai fa'aiuga o fagotaga.

ULUA’I ASO POLOKALAMA PESEGA O LE KERISIMASI 2017

O le afiafi o le aso Sa na amatalia ai le polokalama mo Pesega o le Kerisimasi 2017 i le Malaeoletalu e fa'aaogaina ai le Pavillion.

Peita'i, ua tafa le finagalo o le afioga le Kovana Sili Lolo Matalasi Moliga, e suia le nofoaga i le afiafi anapo, ona o le louloua o le tau ma ua le saogalemu ai le fanau ma le mamalu o le atunu'u o lo'o fia maimoaina nei fa'afiafiaga o lenei vaitau o le tausaga.

Na amata tatala aloaia le polokalama ina ua tutula'i le tina o le atunu'u e ki le moli mo le La'au Kerisimasi ua mae'a teuteuina lelei ma saunia fo'i e le Matagaluega a le Administrative Services a le malo. Ua matua felanulanua'i moli o le Kerisimasi, ma ua fa'afiafiaina le mamalu o le vasega o talavou sa auai ane mo latou sao o pesepesega o lenei vaitau fiafia o le tausaga.

Na saunoa fo'i le afioga le Kovana sili ina ia fa'amanuia le Kerisimasi ma le tausaga fou o lo ua olioli mai, i le mamalu o le atunu'u atoa ma i latou ua asiasi mai fo'i i le tatou atunu'u i lenei vaitau fiafia. "O le vaitau tatou te faipesega ai ma le fiafia, ina ia vi'ia le Atua ae maise o le meaalofa sili sa ia foa'ia, o lona alo ina ia saunia ai le taulaga togiola mo i tatou uma. Fa'amanuina lona suafa pa'ia ma ia tatou faipesega fa'afetai ia te ia lo tatou Atua silisili."

O le vasega o aufaipese sa tofusao i lenei ulua'i po o pesega o le Kerisimasi, e to'a 13 i latou uma lava na pepese ma fa'afiafia. O i latou e aofia ai: Pavaiai CCCAS, Fa'asao & Marist High, Failolo Metotisi, Tafuna High School, Vailoatai CCCAS, Susana Uesele Metotisi, AOG Vatia, Fagatogo Ekalesia Katoliko, Ave o le Fetu Ao Metotisi Fagaima, Fagasa CCCAS, St. Josephs Fatuoaiga ma Leloaloa Metotisi.

Ona o le louloua o lenei vaitau, o lea ua faia ai le fa'aiuga, o le a fa'aauau i le Fale Laumei i Utulei le fa'amoemoe se'i loga lava ua toe logo atu fo'i le mamalu o le atunu'u, pe a suia mai uiga louloua o le tau o lo ua lofia ai i tatou i lenei vaitaimi.

LITAEA AVALUA VAOULI - 21 TAUSAGA TAUTUA I LE DHSS/WIC

Ua mae'a ona faia le fa'amavaega a le tama'ita'i foliga tausa'afia ma le fa'afiafia matua i so'o se taimi e asiasi ane ai mo le polokalama a le Fanau ma Tina Ma'itaga o le WIC i le Matagaluega o Alamanuia mo Tagata Lautele o le tatou Malo, Avalua Vaouli, ae lauiloa lava i si ona suafa vala'au e lona ofisa "Java."

Na saunia e le tama'ita'i pule i le latou fo'i itu o le tautua, Josie Lutali ma le vasega o ta'ita'i fa'apea le aufaigaluega mamalu se latou meaalofa e fa'ataua ai lana tautua i le matagaluega ma le Malo, ae maise ai lava le vasega o matua ma fanauiti lea sa fa'afiafiaina o ia e fa'amasani ma fa'afeiloa'ia i ona laufofoga fiafia i aso ta'itasi, pe a o'o ane mo se fesoasoani.

O lana meaalofa sa tapena i ai le mamalu o le Pulega a le Matagaluega, o se tasi lea o toe mea taua sa faia e le fa'atonu ua maliu nei Fa'ailoga na tusia ai le fa'afetai fa'apitoa mo lana tautua mai lana matagaluega mo le  21 tausaga ae o lea ua agava'a ai o ia mo le Litaea ona ua gasegase.

O le fa'ailoga fa'apitoa lenei, o se tasi lea o toe mea na sainia fa'apitoa e le tofa Taeaoafua Dr. Meki Solomona a'o le'i tu'ua le Malo.