Ads by Google Ads by Google

Tala I Vaifanua


O le va'aiga i le afioga le Aloali'i Afoa Moega Lutu ma le pa'ia o aiga i lumafale o le Maota i Tanumaleu i le aso To'ona'i na te'a nei, ina ua mae'a le ava o feiloa'iga ma o le ava usu lava lea e tapa ipu ai le to'aiva o i latou ua fa'asuafa matai e tautua le Aiga, Ekalesia, Afio'aga ma le Itumalo. "O le mea lelei, ole tautua ma le fiafia, aua ua loto lava i ai i le tofi matai." O se saunoaga lea a Afoa Moega Lutu. [ata: Leua Aiono Frost]

9 SUAFA MATAI FA'AA'E FAIGANU'U A UTULEI - TAUTUA AI AIGA & AFIO'AGA & EKALESIA:

 

O le aso To'ona'i fo'i sa poto ai le Auaiga Sa Afoa Lutu i le faletalimalo i Tanumaleu mo le latou ava o feiloa'iga, ava usu ina ia tapa ipu ai suafa Matai ua mae'a filifilia suli e tau'avea mo le pa'ia o aiga.

 

O i latou na filifili, sa latou manana'o ina ia amatalia le latou auaunaga i le pa'ia o aiga, le afio'aga, le itumalo ma Ekalesia o lo'o auai i latou e ala i o latou suafa ua fa'ae'e ia i latou papa.

 

O i latou na tapa ipu e to'alua suafa Tamali'i: Taimalietane Christinna Lutu ma Laulusa Roy Laulusa.

 

O suafa Tulafale ua aofia ai le to'afitu o i latou: Moti'a Cinta Brown, Seufagafaga Vaimoe, Autiapula Fusi, Malopa'o Akenese Nikolao, Saiavai Elinor Lutu, Lenaleoimaota Simeonica ma Falefatu Kimberly Lutu.

 

I le latou o'o ai i le faiganu'u mai lo latou Aiga Sa Afoa Lutu, ua latou ofo e tausia lelei aiga, vagaia mea uma e ao ina fa'atino i totonu o le fatuaiga fa'apea ma le afio'aga i Utulei ma Fagatogo.

TAUSALA SAILI TUPE VASEGA FA'AIUASO SAMOANA - ASO TOONA'I:

 

O le afiafi o le aso To'ona'i sa tapena mai ai aiga ma le vasega fa'aiuaso a le Samoana High School mo le latou fa'amoemoe e saili tupe aua mea fa'atino a le vasega fa'aiuaso o lenei tausaga a'oga.

 

Na fa'atautaia lea sailiga tupe i le faia lea o siva a afio'aga ta'itasi ma lalafo ai le alofa tula'i o matua ma aiga ae maise o le PTA atoa fo'i a le Samoana, lea sa latou sapaia le fa'amoemoe i le Laumua o le Malie o le Moana..

 

I le fa'aiuga ai o le fa'amoemoe i se tu'ufa'atasiga fo'i sa fa'ailoa mai e nisi o le laulau a faia'oga ma matua, na tu'ufa'atasia ai le $13,000.+ mai lea lava taumafaiga.

 

E leai se isi afioaga ma fanau a'oga ma latou aiga na fa'atamala, e fa'afetaia ai le lima foa'i o matua ma aiga ae maise le lasilasi na auai o uo ma aumea mamae a le vasega fa'ai'uaso.

 

O tausala sa fa'alauiloa mai na tu'ufa'atasia Faga'alu, Gataivai ma Utulei, ma sa sausaunoa ai le alo tama'ita'i o le afioga le Aloali'i Afoa Moega Lutu, Karlinna Sanchez mo le latou tausala. O le tausala a Fagatogo, Tausala fo'i Pago Pago, Tu'ufa'atasia lea o le tausala a Aua ma Leloaloa ona e le to'atele fanau fa'au'u mai na afio'aga. O Afono ma Vatia sa fa'atasi fo'i a latou tausala, ae ese ai le Tausala ma le afio'aga o Fagasa.

 

AIGA A LE ASCC-BAOA FANAU FA'AU'U E TO'ALIMA- "Aua le Atuatuvale, ia Talitonu!"

 

O le aso ananafi sa fa'atautaia ai le 'aiga fa'amavae a le ASCC-BAOA, po'o le Sosaiete a le Fanau A'oga o tau'avea mataupu fa'apisinisi ma le latou Asosi, Faia'oga ma le pulega a le tatou Kolisi Tu'ufa'atasi o Amerika Samoa.

 

O lea aiga sa faia lea i le Lecture Room #1 ma sa auai uma lava fa'auluuluga o vaega ta'itasi e lima a le Kolisi, fa'apea le latou sui fa'asalalau atoa ai ma le Asosi atoa a le BAOA. "O lenei fa'amoemoe o se fa'amavaega aloa'ia lenei a le BAOA ma le Kolisi Tu'ufaatasi ma outou, o sui o le a fa'au'u, ma tu'ua fo'i le tatou Kolisi ae alofaiva i sailiga o tusi pasi maualuluga i Iunivesite i fafo, po'o le aga’i atu fo'i e saili avanoa faigaluega, pe toe fo'i mai ina ia fa'aauau sailiga o nisi fa'ailoga i le tatou kolisi nei." O se fa'amatalaga lea a le tama'ita'i fa'auluulu o le Vaega o Mataupu Fa'apisinisi a le Kolisi, Dr Faofua Va'apu'u Fa'ato'afe.

 

"Ao tou sauni mo le tou fa'au'uga, e ao ina fa'atofa aloa'ia atu o outou uso ma tuagane nei o lo'o totoe i le tatou Asosi a le BAOA, ina ia tamau pea le so'otaga ma outou, aua e ao ina fa'aauau a tatou fa'amaumauga, o a outou sailiga ma o latou fua iloga i le lumana'i. Aua ne'i galo Ierusalema ia te outou. O Ierusalema lava lenei, pe afai e mafaufau i le tulaga o le amata ai ona a'oa'oina oe, o le tagata tuto'atasi i au sailiga ma le tapenaga o lou tagata ua matua le mafaufau, ma faia ana fa'aiuga talafeagai ma lou lumana'i."

 

O le susuga Dr Faofua Fa'atoafe, na malaga i fafo mo lona taotoga o ona fofoga, peita'i, ua toe maua sina malosi e toe taliu mai ai ma fa'amae'a tapenaga uma mo latou sui fa'au'u nei e to'alima o lenei tausaga a'oga, ina ia fa'au'u. O le isi lea vala o le aiga fiafia fa'atasi ma ia, aua e le mailoa le lumana'i.

 

Sa i ai ni ta'aloga sa fa'ataoto ina ia so'ofa'atasi loto o le taupulega a le Kolisi ma le BAOA, sa tufa atu ai nai fasi pepa, ua mae'a tusia ai se mana'oga fa'apitoa mo sui iloga ta'itasi o le Pulega sa auai. O le mana'oga i le tina o lo'o pulea auaunaga mo le fanau a'oga i le Kolisi, Emelia Le'i, sa mana'omia ai ona siva i so'o se ituaiga siva lava o lo ua agava'a ai. Peita'i sa filifili Emelia e siva fa'asamoa. Matagofie lona sao. O Lina Scanlan, sa mana'omia ona ia talatala ma fa'ailoa mai, pe na fa'apefea ona fetaui ma lona to'alua po'o lana manamea o pele ia te ia. E ui ina faigata, ae sa fa'amatala e ia, "O le ma'ua fa'ato'a fetaui ma fa'amasani ma lo'u to'alua, o le pele ia te a'u e o'o mai i le taimi nei, sa ma fetaui i le lotoa a le Malisi i Malaeloa. Na ma fetaui o la'u fesili na muamua lava fai i ai, Pe aisea ua le alu ai i le a'oga?"

 

E tusa ai ma aga o e faipisinisi, "Ia e iloa ona fa'amasani vave, ma ia vave ona e feso'ota'i i so'o se tagata ina ia mafai ona fa'alauuluola i ai pisinisi ona o feso'ota'iga lelei ma isi e to'atele."

 

Ina ua maea sa faia se taaloga a le fanau BAOA ae maise o i latou e to'alima o le a fa'au'u, sa faia ai le nofoa e saofa'i ai pe a pe le pese o taina. O lea ta'aloga sa malo ai le tama'ita'i fa'au'u o Maggie Iosefo mai Aua.

 

O le 'aiga sa tufatufaina mai ina ua mae'a lea sao o i latou fa'au'u. Ao tufa mai le mea tausami sa faia se ta'aloga ina ia matea e le au fa'au'u le tausaga ma le nofoaga sa mua'i fa'atuina ai le Kolisi Tu'ufa'atasi o Amerika Samoa. O i la'ua na mauaina tali, sa maua fa'ailoga tupe ta'i $20. O le tali o ia fesili, na fa'atulna le Kolisi Tu'ufa'atasi o Amerika Samoa i le tausaga e 1970, ae o le nofoaga sa mua'i faia ai a'oga o le Fale'ai lea e i ai nei o le Samoana High School."

 

"E lelei ona outou iloa lea fa'amaumauga taua mo outou i lo outou tu'ua ai o le ASCC ae ia tou toe taliu mai, ma fa'aleleia atili le tatou Kolisi Tu'ufa'atasi e ala i la outou tautua." O se isi lea tima'i a Dr Fa'atoafe.

 

Na tufatufaina fo'i Tusi Pasi o sui fa'ai'uaso nei e to'alima mai le BAOA, i le taimi lava a'o faia le 'aiga. O le tama'ita'i peresetene o le Kolisi, Mrs Rosevonne Pato sa ia taua'aoina tusi pasi a'o tolaulauina suafa o i latou ua agava'a ai e Dr Fa'atoafe. Ina ua mae'a sa tu'uina se avanoa matagofie mo le saunoaga a le tama'ita'i Peresetene i lea vasega o fanau fa'au'u a le vasega fa'apisinisi a le Kolisi.

 

"O le tou vasega ua i ai fanau ua sili ona maoa'e lo latou sao i totonu o le Kolisi i tausaga ta'itasi. Peita'i i lenei lava tausaga, o outou e to'alima o lo'o aofia uma o sui totino o le Phi Beta Kappa, pe o le Sosaiete a Fanau A'oga e Maualuluga Togi i mataupu o tau'avea. Fa'afetai mo lo outou sao i lenei tausaga i galuega fa'atino a le fanau a'oga i le tatou Kolisi, ua fa'aauau pea ona talia i tatou ma pasia lo tatou agava'a o se Kolisi e mafai ona ulufale atu o tatou sui i iunivesite ma kolisi o le Iunaite Setete o Amerika."

 

"E tatau ia te'i tatou uma ona patipatia le sao o outou faia'oga, ona o le aoaoina lelei o outou i agava'a e tatau ma tusa ai ma tagata faipisinisi pe tausaili fa'ailoga i mataupu fa'apisinisi. Fa'afetai tele mo lo outou agaga i le tatou Kolisi. O le toe upu, aua nei galo mai le Kolisi ma i matou i a outou taumafaiga. A manuia logo mai, ia matou iloa lava sina tala ia te outou. Aua nei galo ona toe fo'i mai, ia fai sou sao mo le tatou a'oga ma lou malo ma aiga."

 

I le toe taimi o Dr Faofua, sa ia fa'ailoa mai ai, "O le to'alima o nei sui uma o le a fa'au'u, e tofusia ma fa'ailoga taua e fa e tutusa lelei, ae ese ai le fa'ailoga e tasi mo le sui ua silisili ona togi uma i mataupu sa latou tau'avea. O le a fa'ato'a fa'alauiloa lea tulaga i le aso o le fa'au'uga."

 

"Afai e tautoa'ia lou Sa i fita ma fa'afitauli o le olaga taumafai i sailiga, ia manatua upu e lima ua mae'a a'oa'oina ai outou, "AUA le atuatuvale, ia Talitonu!" O lo'o soifua le Atua na te puipui ma fa'amalosi ia te oe i le ala.”