MANUMALO MATAUAINA TOOMALATAI "TAUSALA LALELEI O LE PASEFIKA!"

O le afiafi o le aso Faraile na fa'aeaina ai le Tausala Lalelei o Amerika Samoa 2017, Matauaina Gwendolyn Toomalatai i le pale o le Tausala Lalelei o Atumotu o le Pasefika 2017."

O se pale e le'i faigofie i le lalelei fo'i o isi tausala lalelei uma sa auai i lenei tauvaga, e to'a iva i latou na tauva i le lona 31 ai lenei o tauvaga talu ona amata saili tausala lalelei o le vasa pasefika mai ona malo fa'a-atumotu.

O le tauvaga sa faia lea i le Price Charles Park i Nandi, Fiti. Na atoa le vaiaso o saili se tasi e avea le tasi vaega o le sailiga tausala, le Tausala o Feso'ota'iga Tafa'ilagi po'o le Initeneti, peita'i sa mauaina lea e le Tausala Lalelei mai Samoa, Alexandra Iakopo.

I vaega sa avea e le tausala lalelei mai Samoa na aotelega ia te ia le Fesili ma Tali ma le Taleni. Peita'i o le Ofu Ta'ele sili ona matagofie sa avea lea e le Tausala Lalelei mai Papua Niu Kini, Niawai Twain. Ona uma ai lea o vaega sa fa'amasinoina ai tausala i le tulaga o le tauvaga.

Peita'i ina ua tolaulauina i latou na mautulaga i le fa'asologa o le tauvaga mai le tulaga lima sa tula'i mai ai le Tausala Lalelei mai Rapa Nui, Tiare Pakarati. Tausala na tulaga fa ua tula'i mai ai le Tausala Lalelei mai le Atu Kuki - Enerstina Bonsu-Maro. Tausala tulaga tolu o le tausala na talimalo i lenei tausaga, le tausala lalelei mai Fiti, Hally Qaqa.

FA'AMAUTU FA'AFEAGAIGA FOU EFKAS - PAGO PAGO

O le aso Faraile i le taeao lava na o'o ane ai le pa'ia o Aiga i ona itu tetele ma ona itu taulagi, o le susuga le Fa'afeagaiga Fa'afetai Fa'avae & Mafo'e Fa'ata'ita'i i le malae i Gagamoe i le maota fo'i o le afioga le Ma'oputasi ina ia molitai mai le Fa'afeagaiga taulagi ua filifilia e le EFKAS Pago Pago e tausia le latou Ekalesia.

I le feiloa'iga o aiga ma le Ekalesia fa'apea le afio'aga, sa fa'atautaia lava le ava usu lea sa agaia e le tofa Utaife'au ma le Aumaga. Na patino fo'i le faiva o le augafa'apae i le alo e fa'asino i le Ma'oputasi mo le ava i le tanoa ae a le feiloa'iga maualuga.

Ina ua mae'a le fa'aaloaloga ona se'e loa lea o le pa'ia o Aiga e molita'i mai le fa'afeagaiga taulagi ma le faletua i lo la'ua afio'aga. Na tomua mai i fa'aaloaloga i le afioga le Ma'oputasi ma le pa'ia maualuga o le afio'aga. Ona fa'ato'a fa'asolo ai lea o latou fa'aaloaloga i le vasega o Faife'au i le Ekalesia, A'oa'o, o Tiakono ma tama ma tina tino matutua, se'ia o'o lava ina fa'asalafa le fa'aaloaloga a Aiga i le vasega o e fai Ipu i le ekalesia ua tofusia i fa'aaloaloga.

Ona tatala lea o auafa a aiga uma na aofia o le Fa'afeagaiga ma le Faletua, ina ia molita'i mai ai i laua, 100 pusa pisupo ma le $20,000. o le tinoitupe.

FA'AFETAIA KOVANA & LT KOVANA - 20 FOMA'I AMEN

Na fa'atasia uma Kovana Lolo Moliga, Lutena Kovana Lemanu Peleti Mauga, le CEO o le tatou falema'i Faumuina John Faumuina, le Fa'atonu o le Medicaid Sandra king ma le fa'atonu o le tatou Soifua Maloloina Saoluaga Tuileama Nua i se latou fa'atasiga ma le vasega o Foma'i e to'a 20 a le AMEN na malaga fa'apitoa mai e fa'ataunu'u le latou tautua mo tagata lautele o le atunu'u e ala i talavai fua na faia i le 4 aso o le vaiaso ua te'a.

O lenei fa'atasiga sa tu'ufa'atasia e le Ofisa o le Kovana Sili ina ia fa'afetaia aloa'ia ai e Kovana Lolo Moliga ma lana taupulega, le masi'i mai o nei ali'i ma tama'ita'i foma'i, o latou fesoasoani ma e uma na auai mai i le aumalaga, ina ia tautuaina le mamalu lautele o Amerika Samoa, e ala i talavai o mata ma va'aiga, talavai o nifo ma talavai o le soifua maloloina.

I le saunoaga fa'apitoa a le Kovana i lea taeao o le aso Faraile i lona Ofisa sa ia fa'ailoa atu ai lona agaga fa'afetai i le tautua, e le o totogia, ae matua tele na'ua. "Ou te fa'afetaia la outou galuega, e le taugofie le totogi o auaunaga o lo ua outou faia e aunoa ma se totogi mo le to'atele na'ua o matou tagatanu'u, ua fa'afetaia tele ai lo outou sao, aua o le a mafai ona va'ai tagata ua oka a latou va'aiga i matatioata taugata. Fa'afetai tele!"

E le gata i lea sa ia saunoa fo'i e tusa o le auaunaga a se tasi o alo sa malaga atu e saili le atamai, lea ua toe va'aia lona taliu mai ma lenei tautua, "O se agaga fiafia tele ae va'aia le fanau sa fa'alele a le atunu'u lenei ua toe taliu mai, ina ia fa'afo'i mai se tautua i nai matua ma aiga, ae maise fo'i o le atunu'u aua e vaivai lava ma fa'asoasoa le tatou tamaoaiga, fa'afetai o lo'o ia te oe le agaga o tagata o lou atunu'u, alofa ma tausinio e taumafai le mea sili e fo'i mai ma ia."

O lo ua toe vala'aulia fo'i nei foma'i, pe a i ai se taimi o i luma e toe fia o mai fo'i e talia ma le fa'afetai e Amerika Samoa le latou ituaiga o misiona aoga e le fa'atuaoia o lo'o nafa ma i latou, o se misiona mai le fatu ma le agaga alofa.