Ads by Google Ads by Google

Tala I Vaifanua


[ata: SN]

TAUVA’AGA TUPU MA LE MASIOFO TAOA

 

O lenei tausaga talu mai le 2013 ia Tesema, ua fa’atautaia pea e le faigamalo se aso patino mo tama ma tina matutua i lalo o le polokalama o le Kerisimasi a Kovana Lolo Matalasi Moliga. Mo lenei tausaga, faaopoopo i ai ma le tauva’aga Tupu ma le Masiofo mo tama ma tina matutua, i lalo o le vaaiga a le Ofisa o le TAOA.

 

“O outou tagata matutua, afai e i ai se tasi o outou i le aufaigaluega, e taula ia te outou le tofa ma le moe, aua o lo’o ia te outou le fautua ma le to’a i so’o se taimi e lutaluta ai le tai i se folauga. Fa’afetai mo la outou vaega o le faufautua, ma le fa’amanatu mai o le tulaga faifailemu i taimi e tau fa’avesivesi ai mataupu i totonu o matagaluega ma le tatou fo’i folauga a si tatou malo o tautou o ola faatasi ai,” o se tuleiga lea a le kovana.

 

Saunoa le tamaitai fa’atonusili o le Ofisa o le TAOA, Evelyn Satele Lili’o, e fa’apea, “E le o ia te a’u se fetalaiga e agatonu ai le aso, o lena ua mae’a tulei saunoa le afioga le Kovana sili, pau o le mea e faia a lenei ofisa o le fai o le faiva o le fa’afiafia, aua o le vaitau lenei o le fiafia faatasi.”

 

Ina ua mae’a sa amata loa ona fa’alauiloa mai e le fofoga o le aso, Fiu Johnny Saelua, Tupu ma Masiofo tauva i laei fa’alauiloa amata o le “Laei fa’atalavou!”

 

E to’afa tausala to’afa fo’i manaia sa tauva i lenei tausaga, ma e fa’amasinoina ta’itasi lava i latou.

 

O nei la’ei fa’atalavou, sa toe la’eia mai ai ofu a’o talavou i latou, ma ua ese fo’i ma sikaili o lenei vaitau.

 

I le tauvaga e tolu mea sa fa’amasinoina ai, Laei Fa’atalavou i le vaitau na e soifua ane ai; Taleni ma le Laei Samoa ma Sausaunoa ai loa, alu atu ai ma le Fesili mo lau tali.

 

O i la’ua ua filifilia nei e avea ma Tupu ma Masiofo 2017, o le susuga Toese Sefulu na sapaia e Morris Scalan ma le Masiofo 2017 ia Manuia Lacambra na lagolagoina e le Matagaluega a Tagata Faigaluega a le Malo.

 

O le tulaga lua ua maua e Ketesemane Meaole, e lana lava fanau ma lona aiga. Tulaga lua a le vaega o Masiofo o Nuuuli Pulou, sa sapaia e le aoga a Lauli’i Elementary School.

 

O le tulaga tolu na maua e le susuga Vaovai Fa’ateleupu sa lagolagoina e le JLenTs , a’o le tulaga tolu i le vasega o Masiofo o le tina o Palesitina Jennings sa lagolagoina e le DOH Nursing Division.

 

O le tulaga fa na maua e le susuga Lolesio Fa’atau lea sa sapaia e Fonoti Isabella Hudson ma le Moana o Sina. O le Masiofo tulaga fa, o Arieta Ripley lea sa sapaia e le JLen Ts.

 

O le a fa’alauiloaina fa’ailoga na maua i le lomiga i le aso Gafua i le vaiaso fou.

 

FA’AFETAI KALAPU LIONA I LE AMEN MO TALAVAI

 

I le afiafi o le aso Lulu na fa’atasia ai le vasega o Foma’i na malaga mai, i latou na vala’aulia fa’apitoa, ae maise o totino o le Kalapu a le Liona i Pago Pago, i le ‘aiga fiafia a le Liona e talifuaitau atu ai le agalelei o lenei aumalaga taua i le atunu’u.

 

Na auai fo’i sui o pa’aga a le AMEN sa latou tofu sao ina ia fa’ao’o mai uma nei foma’i  mo le tautua i le atunu’u.

 

Saunoa le Peresetene o le Liona, Lisa Tuato’o, ma ia fa’afetaia le galuega ua latou molimauina ua fa’atino e foma’i a le AMEN.

 

“O le galuega alofa e faia ma le loto atoa, e le totogia! Ua o gatasi ai fo’i lea auau o le AMEN ma le Kalapu a le Liona, lea e ‘auga mea uma i le Tautua. O le tautua lea e le totogia, ae ia aoga mo le lautele. Fa’afetai mo la out auaunaga, lea ua fa’atasia ma le Kalapu a le Liona, e mautinoa ua fa’amanuiaina le aotelega o tagata uma o Amerika Samoa ua fa’ao’o i ai la outou galuega aloft mo le 4 o as o fa’atautaia pea.”

 

I le taimi lea na ia latou faia ai fo’i ma le foa’i taua e fa’amanatu ai lea galuega so’ofaatasi ua fa’atino i le fa’aiuga o lenei tausaga e le Kalapu a le Liona a Pago Pago ma le 20 Foma’i a le AMEN mai Kalefonia i matu.

 

O lea meaalofa o le Tanoa, e fa’amauina ai fa’aleaganu’u lea so’otaga.

 

“Aua ne’i le sua lenei Tanoa i le foa’i alofa a le Atua ia te outou i le tomai ma le mafaufau tonu, aua ua outou agalelei ia i latou e to’atele o lo’o i ai le mana’omia,” o se tasi lea o ana fa’aupuga e tusa ai o le meaalofa a le Liona i le ali’i ta’ita’i malaga, Ben Tinh.

 

E ese mai lea sa ia taua’aoina fo’i le lona lua o Meaalofa taua mo le AMEN. O le Taula ua taina i le la’au malosi o le Toa, ma e sasala fo’i le managi o lea ituaiga o la’au. Ona ia fa’apea lea, “O lenei le meaalofa e taua’aoina faapitoa mo le Sosaiete a le AMEN, ia mau pea so’otaga lea o i tatou. E le toe motusia, ua taula ma ua le toe mafai ona mavae.”

 

O le meaalofa lona tolu sa saunia e le Liona o le meaalofa lea mo le pa’aga e le mafai ona mavae lona loto fesoasoani pea i le Kalapu a le Liona i le tele o ana poloketi.

 

“O lenei lava le Kamupani e le mafai ona tu’ua le agalelei, e le mafai fo’i ona fa’agalo, ae ao ina fa’amanatu ma fa’ailo pea. Fa’afetai Hawaiian Air aua sa fa’ataugofie pasese o le au malaga. E le gata i lea, ae sa le totogia atoa le tau mo le la’uina mai o latou uta o mea e fa’aaoga i lenei talavai.”

 

Sa toe fa’aauau mai lana saunoaga fa’afetai, “Ua outou silafia fo’i, i so’o se taimi e faia ai Ta’amilosaga Tapolo a le Liona ina ia saili tupe mo se poloketi e o’o lava i mata tioata po’o va’aiga mo le mamalu lautele, e foai mai lava e le Hawaiian Air Pepa Malaga  mo se tasi o fa’ailoga o nei taamilosaga, po’o se’i fo’i e faia mo sailing tupe a le Liona. Fa’afetai Hawaiian Air.”

 

O le pule o le Hawaiian Air i Pago Pago sa auai i le fa’atasiga i le Tradewinds ma  taua’aoina i ai lea fa’ailoga.