Ads by Google Ads by Google

Tala I Vaifanua


O le taimi na tautu atu ai le ava mo le sui mamalu o le Matagaluega o A'oga, le tama'ita'i o Puna Tanielu, i le ava usu na saunia e le vasega 8 Matafao Elementary i le latou aso na faataua ai le Aganu'u a Samoa. [ata: Leua Aiono Frost]

FA’ATAUA LE AGANU’U - AOGA TULAGA MUAMUA MATAFAO

 

O lenei tausaga ua suia le fa'atautaiga o le Aso Fa'asamoa i le Laumua o le Marlins. Ua fa'atautaia e le Vasega 8 ma o le auau o le aso sa fa'ailo, "Fa'ataua Aganu'u a Samoa - Lauga, Sula Toga, Fa'afiafiaga ma le Ava Usu o Feiloa'iga”.

 

I le vasega 8 atoa i Matafao, sa tofusia vasega ta'itasi ma le fa'atinoga o le Ava o Feiloa'iga, o le Taua o Lauga Samoa, ae maise o le matata a tama'ita'i Samoa i le Sulaina o ie toga. O fa'afiafiaga sa amata mai le Sasa sa faatinoa lea e le tasi vasega, ae o Mauluulu sa fa'atino lea e isi o nei vasega.

 

Lauga o feiloa'iga po'o se lauga fa'afeiloa'i o se malaga masi'i mai. Na tofu lauga nisi o tama'ita'i fa'apea ma Ali'i talavou, peita'i a o'o loa i le Sulaina o le Toga, e le toe sao se ali'i i lea matata, ae ua va'aia fo'i le oso o ma'i aitu o tama'ita'i sa fa'atinoa lea agaifanua.

 

O nisi o i latou na lauga - Sauileoge Faiga, James Paea, Noira No'oi ma Heremine Olive. O nisi o lauga sa folafolaina ai sua. Ae sa tu'u lava le tamaititi e filifili le auau o lana lauga fa'asamoa.

 

Ia i latou sa iloga na taumafai e faia i le gagana fa'atulafale a latou sao, e le'i faigofie, sa matua siva ai lava le tama'ita'i o Heremine i lana lauga, ua matua tula'i mai lava o le To'oto'o o le Fale'ula lea tama'ita'i.

 

O le tama'ita'i sa manaia lana Sula Toga i le silasila fo'i a le to'atele ma lona le ma e fa'atino lea agaifanua, o Christina Pule.

 

I le ava usu sa matagofie lona fa'atinoga e sui o vasega eseese, ma na va'aia foi ma fa'afofogaina le matagofie o sao o le fanau sa atofa mo vaega eseese. O nisi o i latou sa avea ma itu na masi'i mai, ma le itu na fa'atali, ma sa agaia lelei fo'i le 'ava o le usutaeao e le augafa'apae a le Laumua.

 

Na talia le 'ava e le vasega o le Pulega a le A'oga i Matafao ae maise le afio a le tama'ita'i sui Fa'atonu o le Matagaluega o Puna Tanielu, pule o a'oga tulaga muamua. Na auai ma le Peresetene o le PTA, ma sa tapa fo'i lana ipu a'o le'i moto le 'ava i lana tofa le Pule A'oga Dr. Tino Roberts.

 

O Faia'oga ua aofia fa'atasi i le komiti mo le Fa'asamoa i Matafao e aofia ai: Tauvale Puailoa, Fa'aea Lamositele, So'otaga Tuaau ma Tofala Iafeta. Malo le fai o le faiva o le a'oa'o!

 

FOFOGA FA’APITOA VASEGA FA’AU’U KOLISI TU’UFA’ATASI

 

O le susuga William Ena Spitzenberg, lea sa avea ma se tasi o togisilia o le vasega fa'ai'uaso a Fagaitua High School i le tausaga e 1994, ua tofia e avea ma fofoga fa’apitoa mo le vasega fa'ai'uaso a le Kolisi Tu’ufa’atasi a Amerika Samoa. O le fa’auuga e faia ia Tesema 15.

 

Sa fa'au'u o ia mai Kolisi Tu'afa'atasi i le tausaga e 1996, sa avea fo'i ma Togisilia o lona tausaga lea, ma malaga atu ai i fafo e fa'aauau ana a'oga.

 

O lana matata sa mua'i maua ai lona fa'ailoga mai le Iunivesite o BYU Provo Utah, o le CIvil Engineering. Sa avea o ia ma se tasi o alo o le atunu'u na maua lana sikolasipi mo ana aoaoga ia.

 

Sa fa'aauau ana a'oa'oga mo lona fa'ailoga o le Masters i le Environment Engineering i le Iunivesite o Nashville i Tennessee.

 

Ua fa'amauina fo'i lana auaunaga mo le 15 tausaga na faigaluega ai i matata Inisinia i le setete o Utah ma Arizona. Lea ua taliu mai ma ua faigaluega nei i le Pulega o le Suavai a le ASPA.

 

E le gata i lana tautua lea, ae ua avea nei o ia ma se tasi na ia amataina le polokalama e fa'amama ai le mamafa o le tino "Slimmer Stronger YOU" lea ua mafai ona va'aia sona aoga lelei i le to'atele, ua toe fa'apae'e lelei ai tino.

 

O lo’o fa'aipoipo o ia i le tama'ita'i o Leleagaatutuila Sisi Loi-On Spitzenberg ma to’a fa le la'ua fanau. Saunoa le tama'ita'i o Dr Emilia Le'i, "Ona o William Spitzenberg o se tasi o talavou sa amata atu ana a'oa'oga lelei iinei, na te lei tu'ua lava fo'i a'o a'oa'oina o ia i fafo, lea ua toe taliu mai, ma ua amata ona tautua i ona tagatanu'u ma lona malo, ua tatau ia te ia ona fa'asoa atu i nisi o ona uso ma tuafafine o le a fuafua e tu'ua fo'i i tatou mo lea lava fa'amoemoega i le lumana'i."

 

Saunoa Spitzenberg e fa’apea, "Ou te fa'afetaia le avanoa mo a'u ou te tapena ai se fa'amalosi i le fanau o le a malaga atu i fafo e fa'atino le sailiga o le atamai po'o tomai eseese, fa'atasi ma nisi o le a saili galuega e galulue ma tautua ai. Ou te tatalo ina ia mafai ona avea se folasaga ua ou saunia e avea ma so latou sao e una'ia ai i latou i filifiliga tatau ma le matagofie aua o latou faiva ina ia i'u manuia." 

 

Na fesiligia fo'i Dr. Le'i pe le faia le fa'au'uga i le Maota fou o le Kolisi ua tutula'i nei, ae o lana tali, "E leai ua mautinoa lava e le fa'atotopea ona fa'amae'a lelei tapenaga o lea maota fou ona o le fa'au'uga fa'aiu o lenei tausaga. Ua fuafua lelei, o le toe fa'au'uga lenei i le faleta'alo, e fa'amavae lelei atu ai fo'i i lea nofoaga mai le tele o tausaga o mafuta ai pea iina aiga, matua ma le Kolisi i alo ua fa'ai'u manuia taumafaiga. Ae alo ane ia le isi fa'aiuga ia Me 2018 mo lea fa'aeaga sili."