Ads by Google Ads by Google

Tala I Vaifanua

SE'I MATAGALUEGA O A'OGA - TUFA I A'OGA TULAGA MUAMUA

 

Ua taumafai a'oga tulaga muamua e tausaili pe fa'apefea ona maua le tinoitupe e totogia ai latou Ticket e lima ua fa'ao'o atu ma le tala, "Taumafai e fa'atau pepa o le se'i a le matou Matagaluega, ona o le sailiga tupe e faaoo ai fanau e ta'a'alo i le Football lea e malaga i Hawaii i le vaitau o le Kerisimasi."

 

Ua mae'a fono a'oga tulaga muamua ma pulega, e tasi lava le tala ua fa'ailoa i le vasega o faia'oga, "O fea la'a matou o e aumai ai le $1,125 e fa'atau ai na pepa se'i? E le o lava fo'i fa'asoa i totonu o matou aiga."

 

Lea ua toe fafa atu fo'i nei mea i le vasega o faia'oga, ae pau le mea ua gafatia e i latou, ia ao ane le latou ta'i $5 ona tu'ufa'atasi lea ma fa'ao'o atu mo le fa'amoemoe. O lona uiga a aotelega lea aofaiga ua ofo mai e faia'oga e na'o le tasi lava le pepa o le se'i e maua ai, e $225 lona tau.

 

O le aumalaga, mo taaloga football fa'avaomalo i le Samoa Bowl i Hawaii ma Kalefonia, ma e malaga ai fo'i ma le Sui Fa'atonu o le Matagaluega. Po'o le a lava le tigaina, ae ua loto nai faia'oga, e tapena pea se seleni, tusa lava pe le atoa, ae ia maua se fa'amama avega mo lea fa'amoemoe lelei o le fanua tausinio.

 

TOE ASO O LE TALAVAI 20 FOMA'I A LE AMEN

 

O le toe aso lenei nai Moamoa, o le toe avanoa fo'i mo talavai a le 20 foma'i AMEN lea na malaga mai e fesoasoani e fa'aleleia le auaunaga mo le tausiga o le soifua maloloina o le atunu'u, Fefa'asoa'i fo'i ma le mamalu lautele i ni fa'aletonu o lo'o tau togafitia ai i latou iinei, atoa ai ma le taua lenei ina ia manumalo le to'atele ia tineia ma'i suka ma le toto maualuga ae maise o le mamafa tele o le tino.

 

O mea nei e tolu, fa'aopoopo i ai ma le Ma'i Fatu, lea ua matua maualuluga ai le aofai o tagata Amerika Samoa o lo'o maua ai ma taumafai ona talavai ai, ina ia mafai ona tausia le tino ia te'ena nei ma'i mai ia te oe, pe afai e to'aga e fa'amalositino, tausia lou tino i mea'ai paleni ma inu le suavai auli.

 

I aso ta'itasi e tolu ua mae'a nei, sa fa'asolo le talavai i le tufaina atu o numera i talavai e tolu na fa'atulaga: Medical Clinic, Talavai o Nifo ma le Talavai o Mata & Va'aiga. O le aofai na fa'atulaga mo le talavai Mata e 75 i le aso, ona e umi ona siakia le tagata e to'atasi.

 

O le Medical Clinic e 125 i latou e talia i le aso e tasi ma le Talavai o nifo e ta'i 100 ona maua lea o le 300 i latou i le aso e tasi, e mafai ona siakia i so'o se talavai ua ofoina mai.

 

Ina ua talanoa atu ia i latou na muamua i le nofoaga, po'o le a se taimi na usu ai e fia maua numera amata o le talavai i lona aso lona tolu, ae fa'ailoa mai, "O le vave lea na o'o mai ai i le fale Laumei o le 3:00 i le vaveao. Aua a tuai e umi fo'i o nofo e tatali le avanoa, poo le le maua fo'i o se avanoa."

 

O i latou na ua matauina, o matua matutua lava. Peita'i ua naunauta'i i latou ina ia maua ni a latou va'aiga e tusa o le malosi o i ai latou mata."Ona o lea e na'o le $10 e siakia ai lau va'aiga e mo'omia ma toe maua ai le mata tioata fou, fa'afetai i le vasega o foma'i a le AMEN ma le Kalapu a le Liona i Pago Pago, mo lenei fesaosoani tele,” o se tala lea a le tasi o tina matua sa i ai i le talavai.

 

Ina ua fesiligia le ali'i foma'i o Ben Trinh, o se tasi o foma'i a le au malaga, sa ia saunoa ai, "O le matou malaga mai lenei, ua maua ai faamaumauga uma o gasegase o lo'o togafitia ai tagata o Amerika Samoa. O se mea e ofo ai i matou i nisi taimi, e fua atu le maualuga o le toto ma le suka o tagata, ua matua ova atu i le maualuga e ono pa'u ai ua stroke, peita'i o lo'o va'aia lava le to'afilemu mai o latou foliga ma uiga. E le o iloa e i matou pe aisea, ae ona o fafo lea i gasegase ma tagata o soifua ai, ua alia'i mai ai uiga ma aga o le a oso se ma'i o se tasi ua faapea."

 

Ina ua fesiligia i le aofaiga o nisi ua fa'auia e i latou e tatau ona o i le falema'i ae le faia i ai togafitiga ua ia fa'ailoa mai, "Pe tusa o le lima i le aso talu ona tatala talavai nei. E le mafai lava ona matou va'aia se tasi ua maualuga le suka pe maulalo fo'i, maualuga fo'i le toto, ina ne'i afaina mai a'o faia togafitiga, ma e le tatau lava."

 

"O fa'amaumauga fo'i nei, ua matou mautinoa lava, o le a amatalia ai ma se polokalama e fa'atautaia iinei, ina ia mafai ona toe soloia le Ma'i Suka i lona la'asaga numera lua. E mafai lava ona toe fo'i le tagata i lona tulaga e le o toe maua i le ma'i suka pe a mae'a ona tausisia e ia le polokalama fa'ataoto o le a fa'aa'e nei, i le mae'a ai o lenei talavai i Amerika Samoa,” o se tala lea a Trinh.

 

TAULA MELI TELE - "AMSTERDAM"

 

O le taeao nei e taula le Meli La'u Pasese tele a le America Line "Amsterdam" lea na tu'ua ai e i latou le malo o Fiti mo Amerika Samoa ma aga'i atu i Honolulu, Hawaii.

 

O le aofaiga o le pasese e 1,656 ma le auva'a e 647 lea o lo'o aofia uma i lenei malaga mo le 26 aso, lea na amata le malaga ta'amilo mai Sydney, Ausetalia ae mae'a i i San Diego, Kalefonia. Ua tima'i mai fo'i le tatou Ofisa o Turisi a le tatou malo, i le vasega o ave ta'avale la'u pasese ma le vasega o le Au Fai Pisinisi a le atunu’u ia utagia mai, ia fa'amama a outou auala mo le fela'ua'iga o tatou uso asiasi mai.

 

La'ei mama fo'i ina ia ta'uleleia le auaunaga o lo'o tatou fa'atinoa, ina ia le motusia tala'ave lelei mo le atunu'u, ia saga fiafia ai fo'i nei Meli Tetele e afea le teritori.

 

Mo le au fai oloa, ia utagia le auaunaga laumata fiafia ma le tausa'afia. Peita'i fa'aali ia i latou la tatou tu ma aga fa'asamoa e matele i le fa'aaloalo ma le tausi malo lelei.

 

Ua mae'a fa'atutuina fo'i fale'ie i le malae i Fagatogo mo le au fai oloa a le atunu'u, fa'atasi ai ma fa'afiafiaga. Ua i ai fo'i oloa i le Maketi i Fagatogo, ae maise o le Niu ma le Esi ma Fa'i Pula.