Tala I Vaifanua


Le tama'ita'i o Rosalee Tela Shoulders [ogatotonu] ma lona pule i le a'oga maualuga Nuuuli VocTech High [tauagavale] ma lona sui pule Valasi Lam Yuen. [ata: Leua Aiono Frost]

 FAIA’OGA O LE TAUSAGA & FAIA'OGA LAUTOGIA TAUSAGA 2018

 

Na fa'atasia le Komiti Fa'afoe a le Matagaluega o A'oga e filifilia le Faia'oga o le Tausaga mo le Teritori o Amerika Samoa ma sui na latou faaeaina i le tofiga Faia'oga o A'oga Tulaga Muamua ma A'oga Maualuluga a le atunu’u, fa’atasi ai ma le au valaaulia.

 

O lea fa’atasiga, i le afiafi o le aso Faraile ua te’a i le Tradewinds Hotel, na fa'ataua ai le Faia'oga o le Tausaga 2018.

 

O le tama'ita'i sa taua'aoina le fa'ailoga "Faia'oga o A'oga Tulaga Muamua," e mai Matafao Elementary School, Mrs Avau Vaa Alii, ma o le faia'oga o le Level K5. E 21 tausaga o avea ma faia'oga.

 

"Sa ou mana'o e avea a'u ma faia'oga, ina ia lava le taimi e maua ai i le fale mo le tausiga o nai o'u matua. Sa fuafua e lo'u mafaufau a'o talavou, e amata i le faia'oga, ae a toeititi loa, ona suia lea i se isi galuega. Peita'i, ua atoa ane le tolu i le fa tausaga, ua le toe manatu ia suia le galuega. Ua ou fiafia lava e aoao ma fetaufa'i ma fanau talavou, ua avea ma se fiafiaga uiga ese i lo'u fo'i tama'ita'i talavou i na vaitau, ua o'o mai lava i le taimi nei."

 

Fa'ailoga o le Faia'oga i A'oga Maualuluga, na manumalo mai ai le tama'ita'i o Rosalee Tela Shoulders, ua iloga fo'i lana galuega o se faia'oga. O lo'o faia'oga nei i le Nuuuli VocTech High.

 

O ia ma Avau Va'a Alii sa tauva e sailia le Faia'oga a le Teritori o Amerika Samoa 2018, ma manumalo ai Shoulders, lea ua atoa nei le 9 o tausaga o lo'o avea pea faiaoga i aoga a le malo, ae o lo'o fa'aauau ona sailiili lona fa'ailoga Doctorate i le Mataupu Tau Faia'oga Ed.Dr. i le Iunivesite o Grand Canyon.

 

Sa faia'oga fo’i Shoulders i a'oga tulaga muamua a Tafuna, Pavaiai ma Faleasao Elementary ma sa avea ma faia'oga o le Level 3.

 

O Shouldersi, sa mua'i fa'ailoa e le susuga le Faife'au Rev. Maugaoao Alailefaleula na ta'ita'ia le sauniga pu'upu'u Tradewinds, “o le augatupulaga lona fa o e na avea ma Faia'oga o lona aiga mai Manu'a." Sa iloga foi ona patipatia lona fa'aeaga e matua o lona tina, Alailefaleula Penieli ma Lotomua Tela. O lona tina o Siupolu Tela - Fa'asao.

 

I lana tautalaga, molitai e Shoulders lana faafetai i le Komiti tofia e iloiloina sui tauva mo le tofi, le matagaluega ae maise le faigamalo ona o le fa'aauau pea o lenei fa'amoemoe i tausaga a'oga ta'itasi, sa ia tima'ia ai uso faiaoga uma "Ia e la'asia nisi maila fa'aopoopo i lau auaunaga o le faia'oga!"

 

“O le taui e fa'ato'a maua pe afai ua le muta lau galuega i le a'oa'o atu, ae ua fa'aopoopo isi maila e te taumafai atili ai, ina ia a'oa'oina fanau uma e soloa'i atu i lou potu a'oga. O le anoa o lau galuega, tuufa'atasi ma le anoanoa'i ona e fa'atino le a'oa'o atu, ave atoa i ai ma lou naunauta'iga ia manuia taumafaiga a le fanau, ona fa'ato'a pale lea i le taui sili, ua fua mai au galuega lelei i olaga o fanau sa e a'oa'oina."

 

O se isi ana tima'i i uso a faia'oga, "Ia avea masini komipiuta ma so'otaga i laina tafa'ilagi ma ala e fesoasoani ia i tatou e mafai ai e le tamaititi a'oga ona fa'aalia ona manatu, tusia ana tala i ituaiga so'otaga ua latou maua ma ia fa'atula'ia se tusi fa'atasi a  lau vasega ma oe le faia'oga, ina ia fa'aosofia ai le naunau o tamaiti e fa'aaoga metotia eseese ua ofi mai i lenei vaitau, e fa'avave, faaleleia ma fa'aaoga i a latou a'oa'oga i potu a'oga, ma le aga'i i luma o latou olaga a'oa'oina, ia aluga tutusa ma atunu'u i fafo."

 

Na a'oa'oina Shoulders i Tafuna, a'o avea Dr Ruth Matagi-Tofiga ma Pule A'oga, peita'i, lea ua taliu mai avea ma Faia'oga, ae soloa'i mai lona Pule A'oga i a'oga maualuluga, e avea ma Fa'atonu o le Matagaluega.

 

I lona tama matua o Alailefaleula Penieli Tela, o se tasi sa naunau i le avea ma Faia'oga, na faia'oga fo'i sa ia molimau, "Ou te le'i mauaina nei ituaiga o fa'aeaga ua maua e le tama a lona afafine o Rosalee. E le mitamita ai, ae o le fa'afetai i le fa'aeaga ua aumaia e le Atua, ua fa'ava'ai i ai o'u mata, ma fa'afiafiaina ai lo'u loto ao ma'ua ola pea ma le tina."

 

“O le avea ai ma se faia'oga i la aso i totonu o afio'aga eseese o le atunu'u, o se fa'aeaga sili e fia maua uma e i matou o tupulaga. E fa'amamalu fo'i i ai afio'aga aua o le lumana'i lea o latou fanau, aiga ma nu'u."

 

Totino o le Komiti Filifili o le Faia'oga mo le Teritori: Samuel Uhrle, Bessie Manase, Marty Mamea, Lealofi Seau, Lydia Amisone, Netini Sene, Lisa Peau Pele, Diana Ameperosa ma Jubilee F. Lefao Apulu. O le filifiliga o le Faia'oga e pale i le tofi faiaoga o le tausaga: Bro. Christopher Bobblewell, Nadine Taufa'asau, Edna Noga, Leticia Peau ma Bessie Manase, sui Taitaifono o le Faia'oga o le Teritori mo le Tausaga 2018.

 

TAUVAGA - FA'AMAMA, FA'ALILIU MA TOE FA'AAOGA

 

Ua fa'atulaga e le ASEPA ma lana pa'aga GHC Reid & Company se tauvaga e aoga mo A'oga, Autalavou, Aumaga po'o Aiga foi ina ia aoina ai le atigi Apa Alamini, Faguvai palasitika lanu moana vaivai, ae maise o le atigi fagu Vailima Beer.

 

O lenei fa'amama o le a faia mo le 6 masina e amata ia Ianuari, ae lau togi i le masina o Iuni 2018. O le pa'aga e fa'atauaia lenei tauvaga o le Pepsi ma le Coco Cola a le GHC Reid.

 

Saunoa se sui o le GHC Reid e faapea, "O le o'o mai o le atigifgu i lo matou lotoa e ao ina atoa le 45 minute o fufulu lelei atigifagu e fa'aaogaina ai vaila'au ua mae'a pasia ma fa'atulaga mo le fa'amama o fagu ta'itasi. E na'o le lima lava tausaga e mafai ai ona fa'aaoga atigifagu vailima ona toe fa'anutilili'ina lea ma toe fa'aliu suavai e toe gaosia mai ai atigifagu fou."

 

O atigi apa e fa'alua i le fa'atolu i le tausaga ona ave'ese atu pusa oloa tetele ua mae'a fa''apapa le atigiapa ma toe avatu e faaliusuavai e toe gaosia mai ai nisi atigiapa fou. O le palasitika, o lo'o tatalia ni maketi i fafo e auina atu i ai tatou pusa oloa tetele o le palasitika.

 

O le vaiaso lava lenei e tatau ai ona fa'aulu loa lau autalavou poo lau aoga mo le avanoa o lenei tauvaaga a le ASEPA ma GHC Reid.

Comment Here