Ads by Google Ads by Google

Tala I Vaifanua

TOE AMATALIA GALUEGA STARKIST SAMOA

 

O lea ua toe fa'asalalauina mai le toe amatalia o galuega a le StarKist Samoa i le taeao nei, Novema 27. Ma o se tala fiafia lea mo le toatele o tagata faigaluega a le a le Kamupani I'a.

 

"O le mea sili ua toe amata sa'o lava i le fa'aiuga o le lima vaiaso na mana'omia. Fa'afetai ua vave ona toe tatala mai galuega ae le'i o'o atu i aso fiafia o lenei tausaga,” o se tala lea a le ali'i o La'auli Tuitea ina ua logo atu ia te ia i Apia, e toe fo'i mai lana tafaoga o lea ua logo mai e toe amatalia lava galuega i le aso Gafua.

 

"O le mea sili afai ae fa'asoloatoa atu galuega i le taimi nei, e le toe popole, ua uma fo'i asiasiga a le fa'aiuga o le tausaga latou." O le tala 'ata mai lea a Tuitea i le telefoni, ae o lo'o tatalia fo'i sona avanoa toe taliu mai i le malae va'alele.

 

Ua fa'ailoa mai, o le sifi lava sa galue ai le tagata i lona tu'ua ai o le galuega, e tatau ona toe amata ai. Peita'i ua fa'alauiloa mai le tala, o i latou uma o lo'o aofia i le vaega a le Fishroom sa amata galuega i le aso ananafi, Novema 26.

 

FA'AAUAU SIAKIGA VA'ALELE LONA 2 SAMOA AIRWAYS

 

Ina ua fesiligia le umi,  po o fealua'i malaga a le Polenisia po'o le Samoa Airways, sa fa'ailoa mai e le ofisa i Tafuna, "Na amata ona faia galuega toe siakia o le Twin Otter i le aso Tofi na te'a nei, ua o'o mai i le aso Sa lenei o faia lava. O le ala fo'i lea o le tasi o le va'alele mo femalaga'iga nei, ona o lo'o siakia lea va'a ia mautinoa fo'i vaitaimi pisi nei ua tatou tulaueleele i ai, o mautinoa le saogalemu o femalaga'iga."

 

O lo'o fa'aauau pea la ona faia galuega a le vasega o Inisinia fa'apitoa o va'alele a le Samoa Airways pe fa'ato'a mae'a i le aso a taeao, ona toe vave fo'i lea ona fa'asolo femalagaiga i le va o Samoa ma Pago Pago.

 

"Ona o le toe tasi o le va'alele e fa'atautaia malaga ua mafua ai ona fa'atali umi le mamalu o pasese femalaga'i, ua feutaga'i fo'i avanoa ma ua taumafai fo'i e fa'amalie nisi sa fia vave o'o mai, ae ua tatalia mo avanoa pe a mae'a ona fa'amuamua mai i latou e malaga atu i Hawaii i malaga a le Hawaiian Air,” o se tala lea a Toe Loia, le sui o le Samoa Airways i le teritori.

 

"Ua fiu e nofo i le aso atoa i le malae va'alele. Ua saili lava le avanoa ina ia vave ona toe o'o mai, ae le o faigofie lava Fagali'i i le taimi lenei. Leai se va'a o toe gaogao, a misia i nofoa o lo'o fa'atumu i le mamafa o uta a tagata ua leva na o mai ae o lo'o tu'ua ato." O se tala lea a se tasi o le US Marines Fofomaitulagi Tulifua sa malaga tafafao i Samoa mo le lua vaiaso, ae na ona o'o mai lava sa'o loa i le Hawaiian Air i le afiafi o le aso Faraile na te'a nei.

 

Ua aafia fo'i ma faigamalaga i le Manu'atele i lenei tulaga, peita'i, o mea e ao ina faia ia mautinoa lava le saogalemu. Na taofia le malaga mo Ofu i le aso Tofi na te'a, peita'i na fa'ataunu'u na'o le malaga e tasi mo Fitiuta.

 

O lo'o ua fa'afetaia lava e Loia le fesoasoani malosi a le Talofa Airways ina ia mafai ona tautuaina le to'atele e femalaga'i i le va o Samoa e lua.

 

PISI FA'ATAUGA "BLACK FRIDAY" I AMERIKA SAMOA

 

Ose va'aiga maofa ai le solo umi e aga'i atu i totonu o faitoto'a o le Neil’s Ace Home Center i Malaeimi ae le'i tatalaina le faitoto'a o le faleoloa i le taeao o le aso Faraile ua te’a. O le aso o fa'atauga o Oloa eseese ua pa'u maulalo o latou tau i faleoloa tetele nei.

 

"E leai se mea ga ala ai ona alu i le faleoloa, o moli lava o le Kersimasi ga maga'o ai, ae alu atu fo'i, ia ua la'u mai ai ma isi mea aua ua matua taugofie lava i le Ace. Fa'afetai mo lenei fo'i pa'u, ua fetaui lava fo'i ma lenei tausaga ma le fa'asoa,” o se tala lea a se tasi o tina matua sa maua sa'o atu lava o tau la'u lana fa'atauga i lana ta'avale.

 

O oloa sa eseese lava pasene sa to'ese mai i tau masani. I le faleoloa o le Tool Shop e ta'i 15% sa toese mai latou tau masani, ma sa va'aia fo'i nisi o le au faifa'ato'aga ma le faipisinisi o aga'i atu mo latou fa'atauga i le aso Faraile.

 

O le Bluesky sa matua faatau tiai lava latou telefoni ituaiga o telefoni lea e fiafia i ai tagata matutua, e tatala fa'ato'a omiomi numera. Soso'o ane ai ma le pa'u o tau o telefoni lea e fiafia i ai le fanau e mafai ona faia ai latou facebook.

 

O le Neil's Home Center na matua iloga ona la'u ai kalone lapisi a le ACE, alu atu ai mea ta'alo o le Kerisimasi ae maise o Moli o so'o se ituaiga sa va'aia le matua alumia ae maise ituaiga fou lea e a'e mai fo'i i le televise ua fa'aaoga mai e fafo.

 

O le tele o nei oloa na fa'atau ese e le Laufou fo'i latou, o le vasega o lavalava na matua fa'apa'u mau ke 20% 40% ma le 60% ona o lavalava ua fai si umi e le'i alumia. O ie mamanu matagofie sa va'aia uma le fa'aalu i tau taugofie mo le mamalu o le au fa'atau.

 

"Laki lava e le o se vaiaso na maua ai le siaki, o lona uiga e uma i le fa'atauga a le Black Friday, ae omiomi atu ai le vaiaso o totoe i le lanu mumu,” o le tala ata lea a se tasi o ali'i faigaluega i le Malo, sa fia faia se fa'atauga.