Ads by Google Ads by Google

Tala I Vaifanua


Le tama'ita'i Amerika Samoa, Queengrace Tiumalu, ua lotolotoi i le "Au Tautu i Luga o le Va'alele" a le Samoa Airways lea sa amata ana malaga i le va o Samoa ma Niu Sila i le aso 14 o Novema. [ata: foa'i]

QUEENGRACE TIUMALU - TAUTU VA'ALELE SAMOA AIRWAYS

 

Ua auai se tasi o tama'ita'i - na soifua a'e i Fagatogo i lona olaga atoa se'ia o'o ina ulufale i le Kolisi i Samoa, ona ua si'itia ona matua e avea ma Faife'au Tausi Ekalesia i Samoa, Rev. Paulo ma Alice Tiumalu - e tautua i luga o le va’alele a le Samoa Airways.

 

O lenei tama'ita'i o Queengrace Tiumalu, sa aoga i Samoana High, ma fa'au'u ai i le 2013. Sa ulufale fo'i i le Kolisi Tu'ufa'aatasi o Amerika Samoa.

 

O le tele o le olaga talavou o Queengrace o si ona tina matua o Kirisitina Ieremia ma Pulesili Ieremia peita'i ua maliu o ia, ae le'i leva ona o ese atu Alice & Paulo i le galuega i Samoa.

 

"E avea lava si a'u fanau lea ma fa'amalosi'au ia te a'u, talu fo'i ona malolo le tama o le aiga, ae le mafai ona motusia le ma'ua mafutaga ma si a'u tama. Peita'i, o lenei lava tausaga i le vaitau o tu'uaga uma o le a'oga, na matou malaga ai i Samoa ma le Faletua ma la'u fanau uma lava ua matutua fo'i, se'i asiasi ma tafafao. O iina na o'o loa i ai Queengrace fai mai loa, Mama so'u nofo ia su'e sa'u galuega iinei. E matu'u atu lava ma le tatalo ia maua sana galuega lelei.”

 

O le agaga fiafia ia Kirisitina Ieremia ina ua maua mai ata o si ana tama i le laina o Tama'ita'i Tautu i luga o le Samoa Airways.

 

E le gata la i le tina matua le agaga fa'agae'etia, ae ua fa'apena fo'i i uso laiti o si ona tina, le tama'ita'i o Chrissy Ieremia Shimasaki i le DOH ma ua ia fa'apea mai, "Ia sa nofonofo lava si teine ma fa'atumutumu pepa talosaga mo avanoa iinei, sa fa'apea fo'i e sili ai ona aga'i atu e fa'aauaua a'oa'oga i fafo, ae o lea ua tasi lava le nofo sa'o i nai ona matua, ae tali loa le Atua i le galuega e tatau ona ia faia."

 

O le aso 14 Novema na amata ai malaga a le Samoa Airways i le va o Samoa ma Aukelani, Niu Sila. E le o toe mamao amata malaga mo Sini, Ausetalia.

 

KALAPU A LE LIONA, SO'OFA'ATASI & MALAGA 20 FOMA'I A LE SDA

 

Ua fa'alauiloa e le Kalapu a le Liona se so'ofa'atasi ma le auaunaga a le Ekalesia Aso Fitu o le Toe Afio Mai, ina ia fa'ao'o nisi o tautua tau le soifua maloloina, e ala i Talavai Mata, Talavai o Nifo po'o Oloa, ma Talavai o Gasegase Tumau e aofia ai le Toto Maualuga ma le Ma'i Suka e fa'atautaia e le 20 o Foma'i mai Amerika.

 

Mai ia Tesema 4 e o'o ia Tesema 7, o le a fa'atautaia ai talavai i le Gov. Rex Lee Auditorium i Utulei, ma e le tu'ufa'atasia se lisi o nisi e vaaia foma'i, ua tatala le avanoa mo tagata uma. Ua fa'aigoaina lea talavai ole Amen Free Clinic, ma e tatala mai le itula e 8:00 i le taeao se'ia o'o i le itula e 4:00 i le afiafi.

 

Ua fa'ailoa mai o nisi o a'oa'oga fou ua mafai ona fa'alauiloa ai, e aofia ai ma ituaiga o mea'ai e aoga tele mo le tausia lelei pea o lou soifua maloloina, fa'atasi ai ma gasegase ua a'afia ai lou tagata soifua.

 

O nei galuega uma ua ofo fua mai e ali'i ma tama'ita'i foma'i o lo ua fa'alauiloa o le "AMEN Clinic," Adventist Medical Evagelism Ntework, ma o le vaega a le Va'aiga po'o Tioata faitau tusi ma le siakiga o Fofoga o le a fa'atautaia e nei foma'i, ae a maua ai lau va'aiga e Oka ona taumafai lea o le Liona e totogia lona tau aofa'i.

 

"O se meaalofa sili lea mo nisi, ae pito i maoa'e ai, le sao o le Kalapu a le Liona i Pago Pago nei, aua e le taugofie lava,” se tala lea a le tasi tama o lo'o tatalia lana mata e $545 na totogia ai lana pili.

 

Na fa'ailoa e Tupuola e fa'apea, "Afai lava o i ai le agaga o le fia fesoasoani o tagata lautele i lenei sao o le Liona, o lo'o i ai pepa se'i olo ua saunia, ina ia gafatia ona totogia le tele o talavai nei mo va'aiga faitau tusi. O le tau o na lulu e fa'aagaaga lea mo le fa'amoemoe."

 

Sa ia taua foi, "E ese mai ai fo'i ma le Ta'amilosaga Tapolo lea e faia ia Tesema 02, 2017 ina ia saili tupe lava mo lea auaunaga. Manatua e mae'a le tagapolo lea ia Tesema 2, ae Tesema 4 amatalia talavai nei mo le 4 aso."

 

O le sao o le Hawaiian Airlines lea ua faia mo lea fa'amoemoe, e lua lelei Pepa Malaga sau ma le toe fo'i ua taua'aoina mai. Toe faia fo'i ma le isi vaega o le foa'i, ua le totogia ma le mamafa o uta o mea faigaluega uma o le a fa'aaogaina e foma'i nei i le va'alele, ma le sapalai o vaila'au mo mea e togafitia ai gasegase i le fa o aso e faia ai talavai i le Lee Auditorium.

 

Ua fa'ailoa mai, o Fomai nei e to’a 20, ofo mai o latou taimi ona o le tautuaina o tatou tagata. Ua feso'ota'i lea tautua ma le SDA i Amerika Samoa nei, ma ua fiafia ai isi pa'aga uma ua latou galulue fa'atasi nei e so'oso'o tau'au ina ia tausia le soifua maloloina o tatou tagata lautele.

 

E le gata ina faafetaia le Ekalesia Aso Fitu i lenei so'otaga ma foma'i e 20, ae o le Hawaiian Airlines i le latou tautua ma le foa'i ua faia, o le Matagaluega o le Soifua Maloloina mo le fa'atinoga fa'atasi ma foma'i o nei siakiga ma a'oa'oga fa'apitoa o le a folasia mo tagata o le a auai, a'o le Kalapu a le Liona i Pago Pago Amerika Samoa mo le latou tautua mo le lautele e ala i Va'aiga Faitau Tusi ma siakia ai fo'i mata o tagata lautele i ia aso.

 

Ua fa'ailoa mai, a mae'a ona siakia lau va'aiga, ona piki lea o le ituaiga mata e fiafia i ai ma e aulelei ai, ona oka loa lea ae fa'atalia le o'o mai o lau mata tioata po'o le 5-6 vaiaso, ae totogia e le Liona.

 

Fai sou sao, fa'atau sau pepa se'i, po'o le ta se polo i le ta'amilosaga Tapolo mo lea fa'amoemoe ia Tesema 02, i le Lavalava Golf Course i Iliili.