Tala I Vaifanua


O ali'i e to'atolu o Saeanitisi mai Hawaii i suesuega tau tausaga ma le soifuaga o I'a o le gataifale lea ua faia nei se a'oa'oga fa'apitoa mo le aufaigaluega a le DMWR fa'apea ma le Kolisi Tuufaatasi i vasega o a'otauina ai fanau o sailia tusi pasi maualuluga i le tautuaina o le gataifale. O i latou ua i ai fa'atasi ma Tony Langkilde o le Maketi i Fagatogo lea e faia ai lenei a'oa'oga i le potu mo le Maketi o I'a. L-R Tonly Langkilde DOC, Erik Franklin mai le Hawaii Institute of Marine Biology, Ross Langston mai le Winward Community College i Hawaii ma Ken Longenecker mai le Bishop Museuma i Hawaii lea na tuuina mai le $202,611 mo lea lava a'oa'oga fa'apitoa. [ata: Leua Aiono Frost]

O se va'aiga lea e fa'auia mai le Maikorosikopi e iloa ai po'o le i'a fafine pe o le i'a po'a lea i'a, ma e fia fo'i tausaga e ao ina fa'afanaua ai le i'a fua mo ni i'a fou, ae maise o le matua fo'i o lea i'a. [ata: Leua Aiono Frost]

SUESUEGA FA'ASAEANISI - LAPOPO'A O I'A

 

I lo’o i le atunu'u Saeanitisi e toatolu mai le Bishop Museum i Hawaii, Ken Longenecker; le sui fo'i mai le Windward Community College o Ross Langston; ma Erik  Franklin mai le UH Institute of Marine Biology, ma ua latou fa'atautaia ni vasega e a'oa'oina ai sui o le matagaluega o le Puipuiga o le Vaomatua ma le Gataifale (DMWR), ia iloa lelei ona fa'aaoga masini maikoresikopi, e sailia ai le matutua o i'a o lo'o fagotaina e le lautele.

 

O nei vasega o lo’o faia i le potu o le Maketi i Fagatogo, lea e fa'aagaaga e fai ma Maketi o I'a.

 

Saunoa ia Longenecker e faapea, "Na vala'au atu Dr. Domingo Ochovillo, lea o lo’o avea ma Saeanisi o le DMWR, e mana'omia se fesoasoani tau tupe mo le sailiga fa'asaeanisi e iloa patino ai le matutua o i'a nei e fiafia tele le atunu'u o Samoa e taumamafa ai."

 

Na faia le vaega a nei ali'i Saeanisi i le Bishop Museum, ma ua latou maua ai se avanoa e mafai ona talosaga ai se vaega tupe toina mai e fa'atino ai lea galuega mo Amerika Samoa.

 

"Ua mafai ona ou talosagaina le fesoasoani mai le Bishop Museum, lea ua gafatia ai ona fa'atauina mai nei masini uma, fa'atasi ai ma le utaina mai iinei, fa'atino ma le suesuega ma fa'aa'oa'o ai tagata faigaluega uma a le matagaluega, ma ua fiafia fo'i i latou i lenei avanoa, toe maua ai ma latou masini maikorosikopi nei e fa'aaoga i taimi uma i a latou sailiiliga maumaua'i e fa'ailo ai le matutua o i ai i'a nei,” o se saunoaga lea a Longenecker.

 

O i'a ia ua fa'ailoa mai e ao ina maua'a le latou sailiga o latou matutua o le Poge, Alogo, Laea ma le Ume.

 

Ona o nei i'a, e o'o loa i le ono inisi le umi, ua gata loa, ae fia iloa le matutua, aua o le matutua e iloa tino ai le taimi e mafai ai ona tu'ufua i latou ma maua ai le tele o nisi i'a. E mana'omia ona iloa patino la'asaga o le olaga o i'a nei, ia le 'aina e tagata lautele ma i'u ai ina fa'aititia vave lo latou faitau aofai i o tatou ogasami ma mou malie atu ai lea ituaiga o i'a.

 

O tinoitupe sa talosagaina mai le "Saltonstall Kennedy Grant Program" ma sa maua ai le vaega tupe $201,611, o lea galuega mo le DMWR.

 

"O le aoga o lenei galuega ua fa'atino nei, ia le muta le fa'aauau ona fa'aaoga o masini nei, e i latou fo'i ua a'otauina, ma ia aoga e fa'ateleina ai le aofai o Poge, Alogo ma Laea i o tatou gataifale. O le Ume fo'i o lo'o mana'omia lava ona faia, aua e tele na'ua tagata e fiafia i le oka i'a lea,” o se tala lea a Longenecker.

 

E lua vaiaso o lenei a'oa'oga taua, ma ua le gata mo le aufaigaluega a le DMWR, ae ua faapea fo'i ona vala'auina le fanau a'oga mo lea matata i le lumana'i o lo'o sailia o latou tusi pasi maualuluga i le Kolisi Tu'ufa'atasi o Amerika Samoa, lea e fa'aavanoa i ai lea a'oga i le aso Tofi Novema 9.

 

TAGATA SOLITULAFONO TAU FEUSUA'IGA

 

Ua fa'asalalauina mai e le US State Deptartment o i latou uma ua mae'a palapala o latou igoa i soligatulafono tau Feusua'iga ma fanauiti, fa'amalosi tama'ita'i ma feusua'iga fa'asotoma, o le a tusia lea ituaiga o soligatulafono i luga o lou tusi folau pe afai o le a e mana'o e talosaga mo sou tusi folau ae ua mae'a ona fa'amaonia ma nofosala i ia ituaiga o soligatulafono.

 

O le fa'aupuga tonu ua fa'ailoa mai e tusia ai: "O le sui e ona lenei tusi folau, o se tasi na solitulafono i le feusua'i ma se teineititi po'o se tamaitititi e le'i uma le pule fa'aletulafono a matua. Ua fa'amauina lona suafa i le lisi o i latou ua solia lea ituaiga o tulafono i eleele o le Iunaite Setete o Amerika."

 

Ua fa'ailoa mai e lea matagaluega a le Malo tele, "O le faiga lea o le a le fai ma mea e talia ai uma talosaga a sui nei mo ni latou tusi folau. O le to'atele i le taimi nei, o lo'o te'ena lava latou talosaga mo ni tusi folau."

 

O talosaga uma lava o le a toe fa'aulu mai a i latou nei ua mae'a fa'amaonia ma nofosala i lea ituaiga o soligatulafono, o le a talia ae ua i ai lea fa'aupuga i tua o le latou tusi folau.

 

O lenei faiga ua mafai ona usita'ia ai le tulafono fetarale, ua fa'aigoaina o le Megan's Law, lea sa fa'apasia ina ia taofiofia ai le tele o soligatulafono e a'afia ai fanauiti ma sa mo'omia lava ona fa'atino se ala e mafai ai ona mataituina i latou ua mae'a faia nei soligatulafono.

Comment Here