Ads by Google Ads by Google

Tala I Vaifanua


Au faigaluega a le Nana’s Construction, ma le faletua ia Fiapa’ipa’i Fruean, i le aso Faraile ua te’a, i sa latou fesoasoani e fa’amama le nofoaga a le Tini Lam Yuen's Furniture i Happy Valley i Tafuna. Sa aafia lea pisinisi i se afi i le vaveao o le aso Tofi ua te’a. [ata: Leua Aiono Frost]

FESOASOANI NANA'S CONSTRUCTION TINI LAM YUEN'S FURNITURE:

 

Ina ua lutia se tasi o nofoaga o le pisinisi a le Tini Lam Yuen's Furniture i Happy Valley i Tafuna, e aofia ma le fale nofo o lea fo'i tama matua faipisnisi o le atunu'u, ona o le afi, sa lagona le o'otia fa'aleuso e le afioga Senatoa Tuaolo Manaia Fruean ma le Faletua Fiapa'ipa'i Fruean ma le fanau.

 

"O le mafutaga e maotua lava, ma e pei fo'i o se uso i le tama o le aiga, o lea sa mataituina fo'i se avanoa e fa'atino ai se galuega alofa. Ua lagona le o'otia ona o mea totino ma ala fo'i o le tautua mo le lautele o le atunu'u ua a'afia ona o le mu, ua matua fa'aleaogaina atoa ai le fale tele. O le ala lea o le tula'i ma le aufaigaluega, ma taumafai mai e fa'atino le alofa,” o se talanoa mai lea a le tina Fiapa’ipa’i.

 

Na amata lea galuega a le Nana's Construction i le itula e 1:00 i le aoauli o le aso Faraile ae ta a'e le 3:30 i lea lava afiafi, ua va'aia le mae'a ona kilia uma o le anoanoa'i o le laupapa ma le fale atoa sa fa'atama'ia e le afi. Ua tala ese toega a le afi, ma ua mae'a fesoasoani e fa'alautele le fale ta'avale sa i ai i le isi itu e mafai ona fa'atautaia ai ni galuega mo le aga'i i luma o le pisinisi.

 

O se tala mai a se tasi o le aiga sa momoe i le fale i le taimi na mu ai, "E fa'afetaia lava le oo mai o le lavea'i ma kiki mai le matou faitoto'a, ua tete'i ai ma iloa ua mu le fale atoa, ae sa momoe lava ma le filemu e le o mailoa se mea fa'apenei o lo'o tupu e amata mai tua o le fale, ae o i matou sa momoe ma le fanau i le potu tele ole fale i le pito lava i luma."

 

O le afi na sasao i le 4:00am i le vaveao o le aso Tofi. Peita'i e leai se mea e tasi o toe fa'asaoina o lea fale tele, ua fa'aleagaina uma lava!

 

Fa'afetai ua fa'atama'ia na'o mea totiono e tele, ae ua le maumau se soifua o se tasi o le fanau sa nofoia lea maota. O le faletele lava lea, e soso'o atu lava ma le nofoaga e tapena ma gaosia ai meafale eseese a le Tini Lam Yuen Furniture lea fo'i e fa'atauina atu i le latou pisinisi o le Fale Meafale i Futiga "Going Home!"

 

FA'ATINO TU & AGA ATUNU'U ESEESE AOGA I FEFA'ATAUA'IGA

 

Ina ia fa'aleleia atili tomai o le fanau i tulaga o fefa'ataua'iga ma isi atunu'u o le lalolagi, ma fesoasoani ai fo'i e fa'aleleia atili togi o le fanau aoga mo mataupu tau'avea i Kosi a le Pisinisi i totonu o le Kolisi Tu'ufa'atasi o Amerika Samoa,  na fa'atino ai e le fanau tu ma aga a Hawaii, Aferika i Saute, Pueto Rico ma Tahiti.

 

O latou fa'atinoga nei, e aofia ai tala fa'asolopito ole atunu'u ua filifilia, faitau aofai, oloa fa'atau atu, po'o fea fo'i le vasa o le moana sauau o lo'o tula'i mai ai, ta'ita'i ma le faigamalo o lo'o tula'i mai i le taimi nei, ituaiga tagata o lo'o avea ma o latou tagatanu'u moni, ae maise o ala fefa'ataua'iga o lo'o latou fa'aaogaina, po'o fea fo'i e matele i ai a latou fefa'ataua'iga.

 

Sa fa'atino fo'i fa'afiafiaaga, ituaiga la'ei, ma tausami e fiafia i ai o latou tagata ma le latou gagana.

 

O folasaga uma sa saunia e le fanau e matuaina mai lea i tusitusiga ma fa'amaumauga e maua mai tusi po'o masini komipiuta ma laina o feso'ota'iga i luga o le Initeneti.

 

O nei fa'atinoga uma, ia Novema 2 i le kolisi, sa vala'aulia le vasega o matua ma faia'oga o le fanau i a latou kosi fa'apisinisi i le Kolisi e maimoaina. O fanau sa fa'atinoa nei tu ma aga a atunu'u ua filifilia, o le fanau na latou filifili e fa'aaoga lea ituaiga o fa'atinoga, e togia ai i latou mo maka maualuluga.

 

"Ina ia fa'aleleia atili tomai mo fefa'ataua'iga ma isi atunu'u i fafo atu o Amerika Samoa, e faia ma una'ia ai le fanau ina ia latou iloa tu ma aga a nisi atunu'u e ese atu nai lo Samoa atoa. Ua tatou masani tele i le fa'aperetania lea e soifua ai fo'i Amerika le malo e fa'amalumalu ia Amerika Samoa, ae tatala le atamai o le fanau, e iloa atu ai isi malo i fafo atu, ma o malo e matele ina logologoa le ta'uta'ua e aoga mo i latou i fefa'ataua'iga o oloa e aumaia i totonu o le atunu'u pe fa'atau atu fo'i i ai a tatou oloa o lo'o gaosia e tatou pisinisi ma le malo,” o se faamatalaga lea ale tama'ita'i Faia'oga ma o le fa'auluuluga fo'i o kosi pisinisi a le Kolisi Tu'ufaatasi, Dr Faofua Va'apu'u Fa'atoafe.

 

FA'AAOGA LE 'TAMMS' I AOGA E FAUFAUTUA

 

Ua fa'afetaia e le Toe Afua Mai Matua Samoa (TAMMS) le fa'aulufaleina o i latou e le vaega a le Guidance & Counseling a le Matagaluega o A'oga ina ia avea ma sui agava'a e faufautua i fanau a'oga i a'oga tulaga auamua ma a'oga maualuluga a le malo.

 

O lea avanoa sa leva ona taumafai mai i ai lea itu o le matagaluega o a'oga. Peita'i, e ui ina sa loto i ai le fa'atonu o a'oga ua mae'a fo'i lana tautua, ae sa faigata ona fa'aofi i totonu lea itu o le tautua a matua nei, ona sa le ma'oti mai se vaega tupe mo le totogia o i latou.

 

E i ai fo'i taimi o le matagaluega sa fa'atino ai lava e matua nei o le TAMMS auaunaga fa'afaufautua i a'oga, ae sa le maua ma faigata ona tumau. Peita'i lea ua mae'a pasia le alagatupe mai le USDOE mo le tautua a Matua Samoa.

 

Mai le aso Gafua nei, e to'a 26 i latou mai le TAMMS ua toe a'otauina lelei mo latou tusi pasi e faailoa ai, ua agava'a i latou mo tofi "faufautua fa'amatua i le fanau a'oga."

 

Mai tausaga ua te'a, e ui ina sa lutia aoga eseese i fa'aletonu ona o vasega a le fanau ma latou fe'eseesea'iga, ae na matauina le aoga tele o le avea ai o Matua Samoa ma nisi e fautuaina ma talatalanoa i ai le fanau.