Ads by Google Ads by Google

Tala I Vaifanua


[ata: SN]

O se va'aiga i le taimi ua mae'a ai le tufaga lole ma sukalati mo fanau. Faafetai i le Faipule o Amerika Samoa i le Konekeresi Aumua Amata ma pa'aga sa latou fa'asoa mai nei mea mo fanau a le atunu'u. Itiiti pe tele, ae fa'asoa mai pea! [ata: Leua Aiono Frost]

O le vaega lea na asiasi mulimuli atu lava i le taumafaiga a le Faipule o Amerika Samoa Aumua Amata Coleman Radewagen lea sa ia tufatufaina atu ai lole ma sukalati faapea ma nai meaalofa tau penitala, peni, ma isi oloa fa'apena e aoga i a'oga a le fanau matutua teisi o le atunu'u. Matagofie le la'ua siva sa fai. [ata: Leua Aiono Frost]

MASINI FA'AMAMA TOTO - AFUAGA O LE MOTUSIA ONA FA'AAOGA:

 

O le fa'aletonu na taofia uma ai le toe fa'aaogaina o masini fa'amama toto i le potu o talavai "Fa'amama Toto" a le tatou falema'i tele i Faga'alu ua fa'ailoa mai nei, ona ua ofi le kololini i le suavai, ma e le tatau lava ona i ai le kololini i le vaila'au a'o fa'aaogaina mo le fa'amama o Toto o e gasegase ma e mo'omia le auaunaga.

 

Ina ua fa'ailoa aloa'ia mai ua le mafai ona fa'aaoga masini uma lava o lea talavai, e le o mea faigofie pe nofogofie i fa'alagona o aiga ae maise o e o lo'o gasegase e ao ina fa'aaogaina masini nei. O le le faigofie o lea tulaga, aua e moomia lava ona fa'amama toto o i latou i le ta'itolu o aso, afai e leai, e le mailoa le umi e toe soifua ai i latou.

 

Peita'i e le'i nofonofo ai aiga, na fevesia'i lagona ma ua o'o ina taumafai i latou i Samoa ma Niu Sila ina ia fa'ao'o i ai o latou pelega ina ia fa'amama o latou toto, tafafao teisi se'ia mae'a fa'afo'ia le fa'afitauli iinei toe malaga mai.

 

Peita'i ia i latou na o'o mai so latou fa'anoanoa ma le agaga tiga, a'o nisi i le popole ma le atuatuvale ona o le misialofa i o latou aiga o lo'o fa'amama toto, ua fai mai, "E leai ma se avanoa i talavai i Samoa, ua saili i Niu Sila ma Ausetalia, e maua avanoa peita'i, e matua faigata lava ona toe feoa'i i le pisi ma le tumutumu o avanoa o femalaga'iga i va'alele i le va o Samoa ma Ausetalia, Samoa fo'i ma Aukilani." O se tala lea a se tasi o tama'ita'i e alaala i Amerika a'o o lo'o fa'amama le toto o si ona tama iinei.

 

"Ma'imau e, e o'o mai lava i Amerika nei, e matua le maua lava se avanoa fo'i i le fa'asologa o gasegase e fa'amama le toto, ua le mafai. O se mea e tagi ma popole ai, e leai se isi auala e mautinoa ai le fa'aumiumi o le mafutaga ma le matua, e sili ia a'u le taofia o le fa'atau o mea'ai ae totogi le pasese o la'u tama e aumai ai, peita'i e matua leai lava se avanoa o talavai i lenei setete." O se tagi tautala mai lea a lenei tama'ita'i e alaala i Uosigitone.

 

O le tiga ai o tagata, aua ua motusia uma le so'otaga ma masini uma lava, se'i ola fo'i se tasi. Peita'i, i le aso na soso'o ai na toe ola ai le isi vaega itiiti o masini, ma ua fa'aaoga mo le tautuaina o tatou gasegase.

 

O le fa'aletonu na fa'atoa maua Olita Ta'afiti lea o lo'o va'aia lea itu o le Talavai mo se fa'apupulaga aloa'ia i le aso Gafua na te'a nei. O le vala'au na o'o atu ia te ia ae le'i usu mai e faigaluega i le aso Faraile ma na fa'atonuina loa e taofia atoa le talavai se'i oo mai i totonu e faia se su'ega pe moni o lo'o ua sao le Kololini i le vaila'au mo togafitiga.

 

Na fa'ailoa, ona muamua lava faia suega o lea suavai pe moni o i ai le Kololini, o se mea lelei lena aua o le ala maua lea, ua aofia le Kololini i lea vaila'au ma ua le tatau ai ona fa'aaoga masini mo e gasegase.

 

O i latou na aofia i le talavai i lea taeao sa fa'apupula ia i latou le mea ua tupu, peitai e ala ona vevesi tele o latou aiga, aua o le atugaluga, ua malamalama fo'i i latou e ao ina fa'amama toto o nai o latou pelega a'o le'i silia ma le tolu o aso.

 

Peita'i e leai se tasi na fa'ailoa mai e Tafiti sa talosaga e fa'auia o latou faila mo le tapenaga o latou talavai e fia fa'auia i Samoa po'o se isi lava atunu'u. Ua ia fa'ailoa mai fo'i, "O le amataga ona tapena o se tasi e gasegase i le Dialysis e malaga i fafo e ao ina amata atu ia te a'u, e kilia atu ai lana talavai ma siakia fo'i pe maua sa'o lava se avanoa i le setete ma le a'ai o le a aga'i atu i ai."

 

O le totogi fo'i o lea talavai i Samoa e $1,000 Amerika i le aso e tasi, o le isi lea afaina tele, pe afai e fia malaga i Samoa e faia ai talavai. O le isi mea o lo'o ua mae'a fa'ailoa mai e Samoa i sui sa taumafai e saili muamua ni avanoa o latou tagata e talavai ai, o lo'o tumu fo'i latou talavai e leai se avanoa.

 

O le mea ua tupu e toe tupu fo'i, o le a se fuafuaga ua fa'ataoto a lea tautua a le atunu'u ina ia toe tupu mai mea fa'apenei ae ua mafai ona faia se vaifofo i le fa'afitauli? Ona o lea ua tula'i mai e mafai ona tape masini ma toe fa'aleleia atoatoa lona tapenaga mo talavai, ia to'atele nisi o le aufaigaluega e iloa oso tatau i mea e fai, pe a toe ulu le Kololini i masini, aisea fo'i ua le sao mai ai se masini e tasi lava mai le ulu atoa i nei masini uma?

 

Afai e talia nei fesili, atonu ua lava tapena i tatou mo se fa'aleleiga o lea tautua e fetaiai ma ni fa'aletonu e alia'i mai i le lumana'i.

 

TUMUTUMU HALLOWEEN A LE FAIPULE I LE KONEKERESI:

 

O le agaga fiafia tele sa fa'ailoa mai e le afioga le Faipule i le Konekeresi a le Malo Tele Aumua Amata ina ua mae'a lona tula'i ai mo le lua ma le afa itula e tufatufa atu Lole ma nai maeaalofa taua mo le fanau a'oga matutua teisi o le atunu'u.

 

"O lenei tausaga ua fuafua e faia se mea e fa'afiafia ai fanau, e le ona o se manatu ina ia tausasami fanau i mea'ai suamalie, ae o le tasi pe lua i le tausaga ma atina'e ai fo'i le agaga auai o l fanau ma iloa nisi mea e ese mai mea e masani ai ona a'oa'o ma va'aia e i latou i le lotoifale o latou aiga."

 

O le isi mea na matauina ma fiafia i ai le afioga le Faipule, ona sa va'aia aiga ua o atu fa'atasi matua ma fanau e avatu tamaiti e fai le tauloto ma maua mai ai se taimi i sina sukalati.

 

O mea uma sa taua'aoina e Aumua Amata mo le fanau, o oloa po'o lole ma sukalati ua fa'atauina mai faleoloa i Amerika, ma ua fa'apea fo'i ona foa'i mai e nisi o Kamupani Tumaoti sa ofo mai le latou fesoasoani ia te ia mo le taumafaiga i lenei tausaga.

 

O Kamupani nei e aofia ai: Pacific Princess; Jeanette, KS Mart, Trdition Mariner, Manu'a Store, Tutuila Store ma Olivia C. Reid. Ua fa'ao'o atu le fa'afetai tele a le Faipule i Uosigitone Aumua Amata i nei kamupani ma le tama'ita'i faipisinisi o Olivia Reid ona o le lima foa'i ma le loto fesoasoani ia aluga tutusa fanau a le atunu'u i sina meaalofa e fa'ailoa ai le agaga o le fiafia fa'atasi.

 

Na amata tula'i Aumua Amata i le itula e 4:00 i le afiafi se'ia o'o i le 6:30 i le afiafi i lumafale o le Tedi of Samoa Fagatogo Square mo lea fa'amoemoe mo le fanau.

 

"Fa'afetai i matua ma fanau sa pa'au mai, fa'afetai fo'i mo le onosa'i i le uumi o laina, ae o le o le taui ae o le loto gatasi ia tatou tofusia i se tufa'aga o le alofa ma le fai mea fa'atasi. Fa'afetai ma fa'amalo i matua le tausi fanau." O sana fa'amatalaga lea na fa'amae'a ai lea afiafi fiafia.