Tala I Vaifanua


O se va'aiga i le tumu fo'i o le maimoaga o lenei ata tifaga fa'aleaoaoga sa fa'aalia lea i le Fatuoaiga Hall i le afiafi o le aso Tofi - "1,000 Ropes" Ola saisaitia i sauaga fa'alemafaufau ma le tino fo'i. O lea ata na tusia e Tusi Tamasese ma o le lona lua lea o ana ata ua fa'aalia i Amerika Samoa, ae o lo'o avea le ali'i tusitala Tuiasau Uelese Petaia ma tama e autu i ai le ata. [ata: Leua Aiono Frost]

TATALA MAIMOAGA O LE ATA - 1,000 MAEA [1,000 ROPES]

 

O le afiafi o le aso Tofi na fa'ato'a tatala ai le maimoaga a le mamalu lautele o le atunu'u sa fa'atau a latou pepa ulufale e fia maimoaina ai le ata "1000 Ropes." O se ata o lo'o aumaia ai se fe'au taua mo le soifuaga o tatou tagata lautele, ma o le ata fo'i e fa'aatagia ai le soifuaga masani o matua ma fanau i le tele na'ua o omiga ma fa'afitauli o lo'o soifua ai, i le li'o o le latou aiga.

 

O nisi o nei omiga e aofia ai le motusia o le mafutaga fa'aleaiga ona ua tete'a matua. O mafuaga ua ala ai, ma nisi o mea ua avea ma fa'atuatuaga o le tagata mai tulaga o e ua maliliu ma ua avea ma maea e saisaitia ai mafaufauga ma fa'aiuga a le ulu o le aiga.

 

I le ata ua aumaia ai le tulaga o talitonuga i e ua maliliu, tulaga o nifo fa'alanu, ma aitu o lo'o manatu nisi ua a'afia ai le soifua o e o lo'o soifua pea. Ua toe aumaia ai faiga o lo'o faia e nisi aiga o le fa'avaivevela o le tu'ugamau o le ua matauina o avea pea ma fa'asoesa i le soifua o tagata o lo'o soifua, ae ua leva ona maiu.

 

O le afe o maea o saisaitia ai le mafaufau o le tagata, ona o mea o lo'o feagai pea ma ia. O le fa'atinoga o uiga ma le soifuaga sa ola ai le ua autu i ai lea ata, ua matua matagofie. Aua ua va'aia lona le fetufa'i pe talanoa ma nisi e tusa o ona mafatiaga. Ua fa'amauina i lona loto le tele o omiga. Ua fiu nisi e tau talanoa atu ia te ia, ae na'o le gugu lava e tali ai.

 

I lana galuega, ua ia fa'aaogaina ona tiute e avea ma mea e aumaia ai i fafo lona ita ma ua so'ona faia ona tiute. O lana galuega o le paluga o manapua ma falaoa ma isi oloa fa'apena e fa'atau atu. Ua matele ina patapatatu lona paluga o nei mea tausami ona ua aumaia ai i fafo lona ita.

 

O lona alo ua fasi so'o e le sui o lo ua ma'itaga ai. O se tasi o fa'afitauli sa avea ma avega ia te ia. Ua atili ona le tautala mai le tama, ae ua va'aia o lo'o mamafa ia te ia lona fia tagolima i le sui talavou ua ma'itaga ai lona alo, ae ua matua tuga lona fa'asaua ia te ia.

 

E le'i tu'ua e le tama lona tiute fa'amatua. Sa ia tausia lona alo ma'itaga, ma ia fa'atauina mea uma mo le pepe e tapena ai mo lona fanau mai. Ua ia fautuaina fo'i lona afafine ina ia le toe fo'i i le tama o lana pepe teine ua fanau mai. E mafai lava e ia ona tausia i la'ua.

 

Matauina e le teine le i ai pea o le aitu lea e faasoesa i fa'ai'uga a lona tama. Ona faia lea e ia o le mea ua leva na tatau ona faia e lona tama, fa'avaivevela le tu'ugamau. I le taimi fo'i na ola ai le teine i lona ma'itaga, sa fa'amalosia e lona tama, e fai i ai lona loto, ma fanau lava i le la'ua fale.

 

Ua va'aia le ituaiga o soifuaga ma fa'ai'uga a matua e faia i fanau, pe a o'o ina sasi se fa'ai'uga a se tama'ita'i samoa talavou, ma ma'itaga ai. O le ata ua tu'uina mai i lenei ata, ua va'aia le moni lelei e tusa o soifuaga fa'alumaina o matua ona o mea e tutupu mai fanau.

 

Peita'i, e le o i ai se luma i lena mea, ia fa'afetaia le Atua i se agaga fou ua maua ona ua ma'itaga se tasi o fanau. E i ai nisi e le maua ni fanau i le soifuaga atoa. E ao ai ina le meleina manuia eseese mai le Atua.

 

Ua fa'amalosia e matua latou fa'aiuga ina ia mulimulita'ia e fanau, ae ua le faia ai e le fanau a latou lava fa'aiuga, e ui ina savalia ala fita i le amataga o mafutaga. I le tautalaga a le Tuiasau Uelese Petaia le sa avea ma tama e autu i ai lenei ata, sa ia fa'ailoa ai, "O le a'ano atoa o lenei ata tifaga, ia fa'ailo omiga ma mafatiaga mamafatu o lo'o feagai ma fanau po'o matua fo'i i totonu o mafutaga fa'aleaiga Samoa."

 

Sa ia toe fa'aauau lana tautalaga, "O sauaga fa'apenei e ao loa ona taofia, aua ne'i toe maumau se ola o se tasi o fanau ona o le omia o latou lagona, aua ua pulepuletutu e matua fa'ai'uga e ao ina latou mulimulita'i ai, aua sa sulufa'i atu mo se fesoasoani i ona taimi pagatia."

 

Sa ia fa'afetaia fo'i le vasega o tautua eseese o lo'o fa'aagaaga mo Sauaga i totonu o Aiga, i matagaluega o le Malo fa'apea ma fa'alapotopotoga Tumaoti i le atunu'u. Fa'afetaia fo'i le sao o sui faufautua i matua ma fanau i totonu o aiga, ae maise i latou ua mataituina o lo'o i ai ni fa'afitauli sa latou soifua mai ai. Fa'afetai i le galuega tima'i. Ua ia fa'afetaia fo'i le galuega mau a i latou o lo'o aga atu ina ia "Fausia se Aiga Mautu!"

 

O lenei ata, e ao ina maimoaina e aiga, aua o lo'o fa'asamoaina mo le silafia a o tatou lava tagata. Ua fa'aperetaniaina fo'i tusitusiga ina ia malamalama ai fo'i le lautele o i latou e le malamalama i le Gagana Samoa.

 

O le tama e autu i ai le ata lenei, ua aumaia ai se tama e le o maualuga sana galuega e galue ai, e tau fa'asoa fo'i le tamaoaiga tausi o lona aiga, ua tete'a ma le tina o le fanau, ua faia'iga fo'i le fanau, a'o le tama fo'i lea sa logologoa ona tala'ave i le lelei o lana fusu a'o talavou. I le li'o o ana uo iu ava samoa, e latou te toe tepa i le amataga mai o le soifuaga o lea tama, ae ua filemu lava ma le toe tautala so'o, ona o mea e tetele e mamafa pea i lona mafaufau.

 

TUFATUFAINA FA'AILOGA A LE POLOKALAMA: ASDOE - HOSA

 

O fa'ailoga na lautogia ai Polokalama HOSA a A'oga e 7 ua mae'a fa'aofi i ai lea polokalama e le ASDOE, na fa'ato'a taua'aoina lea i le faai'uga ole aso fa'apitoa na fa'aulu ai latou sui totino fou e 220, i le Fale Laumei Aso Lulu, 2:00 i le aoauli.

 

O nisi o nei fa'ailoga sa agava'a ai le fanau a'oga i a latou galuega fa'atino na tauva ai ia Aperila 2017, ma Tesema 2016.

 

E lua vaega sa fa'atauva ai lenei taumafaiga: Vaega muamua e ta'ito'atasi ai sui e tauva, filifili lava e le a'oga le latou sui, ma fa'atauva i le Lauga, ma le se isi sui e tauva i le "pu'eata sili ona matagofie ana ata o le a pu'ea.

 

O le vaega lea e na'o le tolu tulaga e lautogia i fa'ailoga ae to'a tolu fo'i a'oga na fa'ailoa mai a latou taumafaiga ae le maua se fa'ailoga: tulaga fa Fa'ava Saolotoga LHS, Lona lima o Vena Luafutu FHS ma Niko Tupuono THS.

 

Tulaga tolu o Rapiel Fa'ata mai le SPA; tulaga lua o Karalynn Fitisone mai le SPA, ma le tulaga muamua o Marynita Vaigatolo mai Tafuna Hgh School.

 

Tauvaga ata ta'ito'atasi lea na taualoa ai le taumafaiga a Ariel Sootaga FHS; Tulaga lima o Merita Liaina LHS, Tulaga ono o Jerico Buenaventura SPA; tulaga fitu o Salavatia Lauvao SPA ma le tulaga valu o Lilian Pritchard LHS.

 

O le na tulaga tolu o Merelama Chong SHS, tulaga lua o Mei-Ling Aga mai le SPA. Peita'i o le tulaga muamua lea sa ia mauaina fo'i le Ipu o lea tauvaga ua maua lea e Jantonina Atuatasi.

 

O le isi tauvaga na fa'atautaia e le fanau a'oga ua fa'atauva ai i latou i le aotelega o le latou Team i poloketi mo  Fa'asalalauga o Tautua Lautele; Fa'asalalauga Fa'alaua'itele ina ia Mataituina e le Atunu'u, [Community Awareness] ma le Fa'alauiloaga o Galuega Tau le Soifua Maloloina.

 

I le Tauvaga Galuega fa'atino a le Public Awareness na tulaga fa ai le Team Tafuna High, tulaga lima le Team Leone High ae tulaga 6 ai le isi fo'i Team Leone High.

 

Tulaga tolu le Team a Samoana High lea e aofia ai Finiana  Finau ma Simone Sanitoa. Tulaga lua ai le Team SPA e aofia ai Jean Pauloa Eseo, Juliana Rajamohan, Gayathri Murali ma Shobita Rajamohan. Ae o le tulaga muamua ua maua lea e le a'oga maualuga a Fagaitua.

 

O le tauvaga a le Community Awareness sa taualoa ai le tauamfaiga a le Team Leone i le tulaga fa. Peita'i o le a'oga na maua le tulaga tolu o Tafuna High lea e aofia ai Akenese Saleutogi ma Deborah Meleisea. Tulaga lua o le Team Leone lea e aofia ai George Fuimaono ma Mac Viliamu. Peitai o le tulaga muamua ua mautu atu nei i le South Pacific Academy.

 

O le Health Career Display na taualoa ai le tulaga fa o le SPA, tulaga lima Team Fagaitua, tulaga ono ai le Team Tafuna High, ae tulaga fitu ai le Team Tafuna High.  O le tulaga tolu na maua le fa'ailoga o le Team Samoana lea e aofia ai Paulina Ioane ma Maeli Matulino Jr. Tulaga lua le Team South Pacific Academy lea e aofia ai Monique Hollister ma Michelle Wisneske ae togisilia ai le Team Leone High School e aofia ai Menorah Otineru ma Clemente Savaiinaea.

 

Ina ua mae'a nei fa'ailoga uma, e aofia ai ma nisi sa tatau ona malaga i fafo ae ua le gafatia ona o tulaga tau tupe, sa taua'aoina fa'apitoa fo'i latou fa'ailoga e fa'amautu ai le latou taumafaiga i le tausaga ua te'a. O i la'ua nei mai le tausaga 2016-2017 sa lautogia ai Meroma Leifi ma Tamasipani Fa'afoi.

 

Fa'asolo mai loa i fa'ailoga o le aotelega o galuega fa'atino uma sa faia fa'aletausaga mo HOSA i a'oga ta'itasi na auai: Tulaga lima o Fagaitua High, tulaga fa o Samoana High, tulaga tolu o Tafuna high, Tulaga lua o Leone High ae Togisilia ai i lenei tausaga o le HOSA e na'o le to'a 12 latou sui totino fou na fa'aulu, ma e le atoa fo'i se 30 o latou sui totino i le polokalama atoa South Pacific Academy. Ua mautu nei i a'ao o lea a'oga le Ipu a le HOSA i lenei tausaga.

Comment Here