Ads by Google Ads by Google

Tala I Vaifanua


O nisi na usupo atu i le Ofisa o Tagata faigaluega a le Malo i Utulei e faatumu pepa faigaluega mo avanoa mai Kamupani mai fafo lea ua fa'ailoa mai e o'o mai mo le fa'afaigaluegaina o nisi o fia maua se avanoa. [ata: Leua Aiono Frost]

GASOLO TAGATA FA'ATUMU PEPA MO GALUEGA EOB

 

Ua le gata i tagata faigaluega a le StarKist Samoa lea ua gasolo i le Maota o le Malo (EOB) i Utulei e fa'atumu pepa talosaga mo avanoa, ae ua aofia ai ma tagata o lo'o leai ni galuega.

 

I le taeao ananafi ua o'o ai le faitau aofai o pepa fa'atumu mo talosaga i le 800, i le Matagaluega o Tagata Faigaluega a le Malo.

 

"O tagata uma lava ua manatu e fa'atumu se talosaga e fa'atumu e le taofia. E tusia fo'i po'o le a le ituaiga o galuega e te agava'a ai. Ona matou failaina lea e tatalia ai le to'ai taunu'u mai o sui o Kamupani Tetele e lua lea ua fa'ailoa mai e o'o mai mo le filifiliga o nisi e latou te manana'o e faigaluega mo i latou."

 

O lona uiga o le saunoaga a le tama'ita'i sui Fa'atonu o le Matagaluega o Tagata Faigaluega, Makerita Enesi, "E le faia lava e i matou se filifiliga o nisi e maua avanoa. O le a tu'u lava i le Kamupani mai fafo e filifilia latou tagata faigaluega, atoa ai ma le tele o tagata e latou te filifilia e ave."

 

O le tasi o kamupani, o se Kamupani I'a i Honolulu. E aoga tele lea ituaiga o galuega mo i latou sa faigaluega i le StarKist ma le Samoa Tuna Processor. Aua o lo'o ua mana'omia mai tagata faigaluega e le toe tau fa'asinoa i ai le faiga o le galuega lena. O le igoa o le kamupani lea o le United Fishing Agency. E faigaluega ma nofo ai lava i Honolulu sui e malaga ai.

 

O le kamupani lona lua, o le Practical Employee Solutions ma o tagata faigaluega latou te fa'afaigaluegaina e tatau ona fiafia e faigaluega i so'o se setete e maua ai avanoa faigaluega.

 

Ua fuafua e totogia mai e le Kamupani pasese mo ana tagata ua flifilia, fa'apea fo'i ma fale e nonofo ai i so'o se setete o le a faigaluega ai. E tasi le tausaga e maua ai lea avanoa, ona pule lea o oe pe suia sou fale ma faigaluega pea, pe suia fo'i sau galuega ma e alu ese ai e sailia se isi setete e te alaala ma faigaluega ai.

 

Ua fa'ailoa mai fo'i, "Ua aoga nei avanoa mo i latou na soifua a'e i Amerika Samoa, fa'apea ma i latou ua i ai visa ua mae'a toina mai e malaga ai i Amerika ma toe taliu mai mo sina vaitaimi."

 

Ua le fautuaina fo'i e le Ofisa o Tagata Faigaluega a le malo ina ia malaga se tasi e tapena sona visa, ina ne'i le pikia o ia e le Kamupani e malaga atu e faigaluega, ona maumau lea o lena avanoa ma le tupe sa talosagaina ai se visa mo Amerika.

 

O lenei fo'i faiga sa faia muamua i le tausaga na fa'aletonu ai fo'i avanoa faigaluega ina ua motusia mo sina vaitau galuega i le Kamupani I'a ma le tula'i ese fo'i o le Samoa Packing i lena vaitausaga, sa fa'atumu ai fo'i avanoa faigaluega mo i latou na masi'i atu i Guam.

 

O nisi o i latou na malaga ua alaala tumau o latou aiga i lena teritori ona ua mautu lava galuega a i latou na o. Peitai o nisi ua alaala solo fo'i i isi setete i galuega ua latou maua e ala mai le masi'i atu e faigaluega i Guam i lenei vaitau. Ua fa'apena fo'i lenei avanoa ua amata fa'atutumu ai talosaga faigaluega.

 

"E ui lava fo'i ina masi'i ona o le fia maua o avanoa lelei fa'apenei, ae le misia lava fo'i nei malaga ma ni fa'aletonu, aua o lo'o malaga isi ae ua mautu le naunauta'iga ina ia fa'aaoga tatau le avanoa. O nisi ua o atu fo'i umia loa le tupe fa'aaoga sese ma a'afia ai i nisi fa'aletonu, o mea na e afua ai ona toe tau punitia ala o nei manuia. Ae ave lava i ai le fa'amalosi'au ma le tima'i,” o se tala lea a Enesi e tusa o malaga muamua.

 

TELE PAUNA I'A TAUVAGA FAGOTA A LE WPRFMC

 

Taua e Nate Ilaoa o le WPRFMC, le sui o le Komisi i le teritori, "E 729.4 pauna aofa'i o i'a na maua i faigafaiva mo le tauvaga fagota lea sa fa'atautaia e le WPRFMC i le latou toe aso o le fonotaga i Amerika Samoa nei. Na matagofie fo'i ona fa'ailoga na tapena e le Komisi o Faigafaiva i le tatou Alamoana."

 

O tauvaga e leai se ulufale na totogia, a tofu fo'i va'a na alu faigafaiva ma le ta'i 20 kalona o le kesina fa'atulaga e le Komisi o va'a ua mae'a laisene mo faigafaiva i le teritori.

 

Tulaga muamua na maua e Double Hooked na mauaina le sa'ula e 346.2 pauna le mamafa. O le Double Trouble sa ia mauaina le fa'ailoga mo le tuna sili ona mamafa e 26.4 pauna le mamafa o le asiasi lea. O le Miami Vice lea na tulaga lua aua sa ia mauaina le i'a e 21 pauna le mamafa. Harley Rose na mauaina le fa'ailoga muamua i le masimasi sili ona mamafa e 24.2 pauna llona mamafa.

 

Peita'i na tutusa fa'ailoga o va'a na maua faiva sili ona mamafa i lona aotelega. Ua tulaga  fa'atasi ai le Miracle ma le Miracle 5 i la'ua faiva. O va'a uma na e lua, na tofu ma le 7 atu na maua mai.

 

TAGA TATAU & MALU LONA 13 - TISA’S TATTOO FEST

 

O le aso ua amtalia ai le Taga Tatau & Malu po'o La'ei Samoa Moni i le Barefoot Bar a Tisa Fa'amuli i Alega. Ua fa'atulaga e amatalia tonu i le fa'afeiloa'iga o le Matuaofaiva ma lana aufaigaluega. Ona soso'o lea ma le aso Faraile ona tatala lea o le nofoaga mo e gasolo atu, ma e fa'atautaia fo'i le suavai Samoa ua momo'o i ai le to'atele. E faia lenei masani i taeao ta'itasi uma atoa ai ma le faiva o le Matuaofaiva ma lona aiga Salemalama. E fa'ato'a mae'a lenei fa'amoemoe atoa i le fa'aaliga o Laei Samoa o Tausala ma Manaia.

 

O nisi fo'i sa taina a latou laei Samoa o le a sama i nei aso e fa'atautaia ai le fa'aaliga taua lenei. O le polokalama uma o mea e fa'atino i aso ta'itasi ua lomia lea, ae o le sini lava, ina ia o'o atu nisi e fia taina ni a latou pe'a o so'o se ituaiga, e mafai ona fa'amae'a ma sama ai lava a'o le'i fa'aalia mo le maimoaga a le lautele o le a aofia ai.