TAPUNIA GALUEGA STAR KIST LIMA VAIASO

O le aso 21 o Oketopa na amata tapunia ai galuega a le StarKist Samoa, ma aafia ai tagata faigaluega e tusa i le 1,500. E toe amatalia galuega i le aso 27 o Novema. A’o tapunia galuega, o lo’o faia nisi o tulaga o le faaleleia o le kamupani ae maise masini fou e fa’apipii.

Mo se fesoasoani i le aufaigaluega, ua taua'aoina ai pusa apa i'a ta'i fa i le tagata faigaluega e tasi fa'atasi ai ma taga i'a  (pouch tuna.)

Ua galulue fo'i nisi o sosaiete "Alofa i lou Tuaoi" mo le tapenaga e faia latou kalone e mafai ona foa'i so'o se tasi ua agalelei i nei aiga uma, ma e foa'i i mea'ai tu'u apa o so'o se ituaiga. Ua faia lea galuega i totonu o a'oga ma pisinisi tetele. O oloa e maua mai e taua'aoina lea i aiga ua le toe i ai se tasi e faigaluega ona o lenei tapunia le tumau o galuega. O lea vaega e ta'ita'ia lea e le susuga Tapumanaia Galu Satele ma e muta lea galuega saili ia Oketopa 28.

Ua i ai fo'i se tasi o kamupani, fa’afesagai ma le Kolisi Tuufaatasi, ua latou fa'asalalau e aga'i atu ni sui o aiga Star kist i le latou faleoloa ina ia taua'ao ane i ai pusa susu mai Siamani mo i latou ua fa'asalalauina lea i le Facebook lea foa'i aoga. O lea ituaiga susu e maua tele ai le soifua maloloina e tamaiti laiti.

Ua fa'apena fo'i le Kamupani a le Panamex i Tafuna, ua latou ofoina atu ni pusa susu o le Anchor Milk mo aiga o lo'o afaina le tamaoaiga tausi. E ese mai lea ae ua aofia i lenei foa'i le aufaigaluega a le Talofa Systems, lea fo'i ua tapunia. Peita'i, e i ai fo'i pusa susu ua fa'apa'u tau ina ia mautinoa ua lava ai latou fa'asoa.

O le sao o le tama'ita'i Faipule o Amerika Samoa i le Konekeresi, Aumua Amata, ua ia talosagaina ai le Matagaluega o Fa'amasinoga a le Malo tele ina ia vavae ese mai se vaega tupe o le sala lea ua sala ai le Star Kist e $6.3 miliona, ona o solitulafono tau le sasa'aina o lapisi i ogasami fa'atulafonoina o le faga i Pago Pago, ina ia toe fa'aaoga mo e ua leai se tamaoaiga tausi ona o le tapunia o le StarKist Smaoa.

O le tala mai, ua faia fo'i le vaega a le Malo. Sa fa'atumu pepa talosaga mo ni avanoa faigaluega i ni polokalama fa'atautaia e le malo.O lea tulaga sa faia i le Ofisa o Tupulaga ma Tina i Pago Pago a'o le'i taitai mai i lenei taofiga o galuega.

Peita'i, ua fa'ailoa mai o lo ua fa'atali mo lenei vaiaso, pe i ai se mea e fa'atula'ia e le Malo.

MCCONNELL DOWELL GALUEGA MALAE VA’ALELE

Ua taua'aoina e le Kamupani a le McConnell Dowell i Tafuna le galuega toe fa'aleleia le Malae Vaalele i ona alava'a e sese'e ai va'alele. O le tau aofai o lea galuega e $9.2miliona mo le alava'a e sese'e ai va'alele numera 05-23. O le galuega lenei e fa'atupe mai e le Federal Aviation Administraton [FAA] mo ana galuega toe fa'aleleia o malae va'alele.

O aso ua fa'atulagaina e fa'atino ai lea galuega e 210 mai le aso na taua'aoina ai le konekarate ia i latou, ia Aukuso 15.

Na talosagaina e Kovana Lolo Moliga le FAA ina ia le fa'aalia se pone mo le galuega lenei, ona o lo'o mana'omia e ia so'o se ituaiga fesoasoani e mafai ona fa'ataofiofia ai le tamaoaiga i totonu o le atunu'u ona o lo'o tele le mana'omia o i ai o le malo.

Ua fa'ailoa manino e le kovana, o so'o se kamupani lava o lo'o fa'atula'ia i totonu o Amerika Samoa i le taimi nei, e le o gafatia ona latou fa'amauina ni vaega tupe tau pone i le taimi nei.

Peita'i ua le taliaina e le FAA lea talosaga ma le faamatalaga, o le pone lea e ao ina totogia i le amataga o lenei Konekarate e fa'atino ai lenei galuega, e toe aoga ia Amerika Samoa pe afai e le mafaia e le Kamupani fa'a-Konekarate ona fa'amae'a le galuega.

E le pau lea o se galuega tele o lo'o galulue i ai le McConnell Dowell i le teritori, ua latou galueaina fo'i le Apitagalu o Taputimu e soso'o lelei ma Vailoatai, le ogasami o lo'o i ai tonu le fanuatanu i Vailoa.

Ua fa'ato'a va'aia lea ua galueaina le apitagalu lea aua e ui ina maualuga, ma'a ma e va'aia le louloua o lea ogasami lea o lo'o faatino ai lea galuega tele, ae ua fa'agaoioia lava ma le fa'aeteete o e o lo'o faigaluega ai.

PALOTAGA ANANAFI MO LE ITUMALO SUA #2 - MAOTA O SUI

Na asia le nofoaga o lo'o fa'atautaia mai ai le palotaga i Amaua, fa'apea ma Lauli'i i le palotaga fa’apitoa a le Itumalo Sua Numera 2 e saili sona sui i le Maota o Sui e fa'aauau le tofi Faipule mo le itumalo, lea sa tauaveina e Puleleiite Tufele Liamatua, ae o lea ua avea nei ma pule sili o le ASTCA, po o le Ofisa o Feso'ota'iga a le Malo.

O sui tauva e aofia ai: Fialupe Fiaui; Ketesemane Meaole, Laloniu P Maloa, Tuialofi F. Tunupopo, Tuifagalilo P. Vele ma Fale S. Uele. O le afiafi ananafi i le itula e 6:00 na fa'amuta ai le toe faia o palota i le itumalo.

O le a mafai ona maua atu i le lomiga a taeao a le Samoa News le faaiuga o lenei palota faapitoa.