Tala I Vaifanua


Ole vaega sa latou tu'ufa'atasia le sao o Samoana High i le WPRFMC, lea sa latou mauaina ai le tulaga lua i le fa'ailoga tupe e $400. [ata: Leua Aiono Frost]

Robert Faleafine Peresetene/CEO o le JR Prep Sports ma Pone Ta'ase - sui o le Komiti JPS i Amerika Samoa. [ata: Leua Aiono Frost]

SAO FANAU A'OGA - FONOTAGA WESTERN PACIFIC FISHERIES

 

O le fonotaga a e WPRFMC sa talimalo ai Amerika Samoa i le vaiaso ua te’a ua fa'amauina ai le sao o le fanau a'oga maualuluga i se tauvaga na fa'atautaia ai, folasaga ma ata e fa'atatau lea i "Faigafava: Tausami, Soifuaga & Lumana'i".

 

E tolu a'oga na tausinio i nei ituaiga o folasaga. O Manumalo Baptist Academy sa latou mauaina le tulaga muamua e $600 le fa'ailoga tupe. Tulaga lua na maua e Samoana High School e $400 ma le tulaga tolu South pacific Academy i le fa'ailoga e $200.

 

O le sao o Samoana sa fa'aulutalaina, "O le Kamupani I'a o le Malosi'aga tau le tupe, lea o Amerika Samoa, e 'ese mai lana faigamalo, aua e fa'alagolago i ai le silia ma le 2,000 tagata faigaluega i le tausiga o latou aiga. Afai o le a tapunia Kamupani I'a, e le'i i ai se isi fuafauga fa'atulaga a le Malo e fa'alagolago atu i ai mo le toe fa'afaigaluegaina o lea aotelega o tagata faigaluega uma. O lona uiga e matua matuia le a'afiaga o soifuaga o nei aiga uma, ae maise o le tamaoaiga tausi o le tatou atunu'u."

 

Sa latou aumaia nisi mau e fa'amaonia ai lenei tulaga o'otia o le tupe fa'asoa a le Malo pe afai o le a tula'i ese Kamupani I'a, e tele isi Kamupani fo'i o lo'o feso'ota'i a latou tautua ma nei Kamupani o le a le toe olaola lelei, ma i'u lava ina mou atu, ona ua leai se tautua sa latou fa'atautaia ma maua ai le latou fo'i alagatupe.

 

E mautinoa e le'i i ai se isi fuafuaga fa'ataoto a le malo ina ia soloa'i i ai i latou nei o le a le toe i ai ni avanoa faigaluega e latalata i le 3,000. O lea vaega tupe fo'i sa masani ona maua e le Malo ua le toe  i ai.

 

O isi aoga na tauva e aofia ai Kanana Fou High, Nuuuli Voctech High, Tafuna High ma Fa'asao Marist High. O a'oga uma e le'i lautogia na tofu maua le fa'ailoga e $100 ma latou fa'afanua ua fa'amau ai EEZ po'o le Sone fagota o le Vasa Pasefika.

 

O alo fo'i o le atunu'u sa aoga i ai avanoa fa'asikolasipi a le Komisi lenei, sa faia o latou sao i ni folasaga e tima'ia ai nisi o alo o le atunu'u ia sogasoga e maua se avanoa fa'apena mo a'oa'oga i fafo, ma taliu mai ma toe faigaluega i matata na a'o'oga sa'o ai lava.

 

ROBERT FALEAFINE: JR PREP SCHOOL & TA'AMILOSAGA PARADISE CLASSIC

 

O lo'o i fanua se alo o Amerika Samoa sa ia amataina le "JR Prep School" i Hawaii ma o lo'o avea nei o ia ma Peresetene /CEO o lea lava polokalama aoga tele, ina ia soso'o le atamai o fanau a atumotu e tauva ai i ta'aloga Football, Volleyball ma le Basketball.

 

"O le fa'amoemoe e fia va'ai toto'a fo'i i se tapenaga a le komiti a le JPS i Amerika Samoa nei e tusa o le Paradise Classic lona tolu lea e tapena atu i ai. Aua o le tolu ai lenei o tausaga talu ona fa'atula'ia mai le JPS i Amerika Samoa, ma ua aofia fa'atasi ai ma Hawaii ma Kalefonia i le ta'amilosaga o le a fa'atautaia ia Ianuari 8-14, 2018,” o se tala mai lea a Robert Faleafine.

 

O le fa'amoemoe e tolu 'au o le a masi'i i le Paradise Classic ia Tesema 2017, "All Stars High School Football Team, All Stars High School Volleyball ma le All Stars 7th & 8th Grades  Elementary Football Team."

 

Ua fa'ailoa mai fo'i e Falefine ma Pone Ta'ase, "O lo ua aga atu le JPS mo le fa'alauteleina o le Volley Ball ma le Basketball i tausaga o lumana'i, aua o lea ua sologa lelei lava le fa'atautaiga o ta'amilosaga Football."

 

Taua e Ta'ase, o se sui o le JPS Amerika Samoa, "O le tausaga ua te'a e silia ma le 30 fanau a'oga a Amerika Samoa ua aga atu nei mo a'oa'oga maualuluga i fafo e fa'aaogaina ai latou sikolasipi mai ta'aloga o le Football, aua sa maimoa le tele o Faia'oga Football i ta'aloga a fanau na i le Paradise Classics. O iina lava e maua ai avanoa e le tele o Kolisi ma Iunivesite e maimoa ai i ta'a'alo malosi fo'i a fanau i lea fa'agatama, ma latou matauina ai ma tulitulimatagau le fia maimoa pea i le olaga ta'a'alo o fanau a Amerika Samoa. Fa'afetai fo'i i lenei avanoa i le Paradise Classic lea na fa'auia e Kovana Lolo Moliga, ae taofia ai le Samoa Bowl sa sau a'i mai isi nofoa'iga."

 

"Ua le gata le taumafaiga a le JPS na'o fanau a'oga, ae ua la'asia fo'i le ki o le tomai mo e fa'afoea ta'aloga a le fanau i le tatou nei malo. O sui e to'alua o le a malaga fa'apitoa mo lea fa'amoemoe o Valusia Talataina ma Mike Whites."

 

O nei ali'i o le a fefa'asoa'i ma le susuga Matt Sumstine, o se tasi o lo'o fa'auluulu i ai Laufali o nei ta'aloga i le setete o Hawaii. O lo ua mafai ona maua le tele o isi fa'amaumauga e tusa o le amataga o le JPS i le latou Uepesite www.jrprepsports.com.

 

O Falefine na fa'au'u mai Leone High i le tausaga e 1978. Tu'ua aiga mo a'oa'oga i le Washington State University ma fa'au'u mai ai. Ulufale i le US Army mo le 10 tausaga ma sa ia mauaina le pine Bronze Star ina ua mae'a lana lea tautua i le vaega au.

 

Avea lea ma Faufautua i le University of Michigan ma faliu ane ai fa'atu lana pisinisi Real Estate i Honolulu lea sa mafai ai ona ia fa'atuina le JR Prep Sports Program, e fesoasoani atili e fa'aleleia tomai ta'a'alo fa'atauva o fanau a atumotu ma Hawaii i le ta'aloga o le Football, ma ua soloa'i atu nei i le ta'aloga Volley Ball ma le Basketball.

 

O le tausaga muamua na tatou auai ai i le Paradise Classic sa tatou ta'a'alo ai ma Hawaii e su'ea le siamupini, peita'i o le tausaga lea na te'a ua o'o ai le taumafaiga a tatou i luga ae o lenei la malaga ua sauni, "ua fa'aolioli mai manuia," e pei ona fa'ailoa mai e Ta'ase.

Comment Here