Ads by Google Ads by Google

Tala I Vaifanua


O se va'aiga i le Kapeteni o le Va'a "USCG Walnut" lea sa taula i le uafu i Fagatogo mo maimoaga a le fanau ma tagata lautele ina ia malamalama i le tele o ituaiga o galuega e mafai ona e galue ai i le US Coast Guard. l-r Sui Fa'asalalau mai le ofisa Autu Coast Guard i Hawaii Sara Muir, Sui e Fa'ato'ai i ai Tagata e fia maua avanoa e faigaluega ai US Coast Guard MST1Derek Franklin, Kapeteni o le Walnut ma se tasi o le auva'a a le Walnut. [ata: Leua Aiono Frost]

MANA'OMIA COAST GUARD FA'AFAIGALUEGA FANAU TALAVOU

 

O le asia mai o le teritori e le Va'a o le US Coast Guard "Walnut" ua fa'ailoa mai o lana asiasiga i o tatou ogasami ma afea fo'i le atunu'u ina ia fa'ataunu'u se latou galuega fa'atulaga mai e le Ofisa Ulu o lenei tautua. Lona lua o le fa'atulagaina lea o galuega e fa'aosofia ai le fia tautua ai o alo talavou o setete ma teritori fa'apea ma isi atumotu e feso'ota'i so'o ma le tautua a le USCoast Guard, ina ia fa'aopoopo se isi 5,000 o tagata faigaluega i le aufaigaluega o i ai i le taimi nei. Lona tolu o le asiasi lea i atumotu ma saili ni ala e mafai ona fesoasoani ai i na atumotu o tau atia'e o latou malo, ina ia fa'aleleia se auaunaga e aoga mo tagata uma.

 

I luga o le "Walnut" e to'a 44 le 'au va'a. Ua afea le teritori e le "Walnut" mai lana malaga sa tu'usa'o mai le Malo o Tonga. Lea ua fa'ailoa mai sa latou taula ai mo le silia ma le 2 vaiaso, ae faia se galuega alofa mo lea malo. O le falema'i o le Prince Wellington Hospital i Tonga sa latou fa'amamaina uma lava, i ona vaega uma o fale e tausia ai ma'i ma ofisa eseese o le falema'i.

 

I le teritori, sa latou tima'ia le fanau talavou, ae maise fo'i o matua, ina ia taumafai e fa'ailoa i fanau le taua o le auaunaga i le US Coast Guard e sailia ai ni latou avanoa faigaluega. E tusa ma se saunoaga a le ali'i Ofisa e fa'ato'ai i ai avanoa faigaluega a le US Coast Guard o lo ua feso'ota'i nei ma le o'o mai o le USCG Walnut, MST1 Derek Franklin, "Ua iloga e fiafia tele Amerika Samoa e fa'auia auaunaga a latou fanau i le vaega au, o se tasi fo'i lenei o tautua a le Malo tele, ae ua le aga ina ia auai i taua, ae ua fa'amalosia e i matou tulafono tau feoa'iga i le sami, atoa ai ma galuega fa'aola ma sailia i latou e tutupu ai fa'alavelave le ma'alofia a'o folau i le sami."

 

Mo se avanoa a le Coast Guard Reserve faafesootai Derek Franklin, i le telefoni 252-3670.

 

Na i ai Franklin i ta'aloga o lo'o fa'atautaia e le Asosi Volley Ball, ASVBF i le faleta'alo i Tafuna High, ma sa ia molimauina ai le agava'a o tino o le fanau talavou a Amerika Samoa i lea fa'agatama.

 

Ua una'ia malosi e le US Coast Guard le fa'ateleina o le faitau aofai o le latou aufaigaluega i nei tausaga e lua, 2017-2018 ona o lo ua tele galuega fesoasoani ua mana'omia ona fa'ataunu'u, atoa ai ma le fa'amalosia o tulafono tau le feoa'iga i le vasa i so'o se vaega o lo'o i ai ogasami e pule e le Iunaite Setete o Amerika ae maise o atumotu tau atia'e o lo'o mana'omia le fesaosoani.

 

FESILIGIA A'OGA PISINISI ASCC TULAGA TAMAOAIGA AMERIKA SAMOA

 

O le aso Lua  na vala'auina ai e le Pulega o le ASCC,  Faia'oga ma le Vasega Pisinisi, sui mai le Ofisa o le Kovana Sili, e fa'amalamalama le tulaga o i ai le tamaoaiga tausi o le tatou atunu'u. Ua tele na'ua fa'amatalaga ma tusitusiga ua avea ma atugalu ai i latou, po'o a mai le tamaoaiga e fa'agaoioia ai le Malo i le taimi nei, ae maise le lumana'i lea e aga atu i ai i latou.

 

O se tasi o sui sinia i le Ofisa o le Kovana, le tofa Iulogologo Joseph Pereira, na talia ni fa'afesili tau le tamaoaiga tausi o le Malo i le taimi nei.

 

Na fesiligia le ta'ita'i mo le fa'amoemoe o le fanau a'oga ina ia maua ni avanoa fa'asikolasipi i le fa'alauteleina o le atamai i matata nei e sili ona mana'omia e aofia ai: Suetusi ma Tausitusi ua mae'a maua tikeri sili ona maualuluga, Foma'i e tautuaina le mamalu o le atunu'u ua mana'omia togafitiga mai gasegase matuia, Inisinia ua ausia agava'a sili ona maualuluga mo galuega atina'e o le atunu'u, o nisi e sili ona mo'omia, ae ua toe saili ai e Amerika Samoa tagata mai fafo e faigaluega.

 

Na fa'ailoa e Iulogologo, "O le auga lea o taumafaiga o fa'atautaia nei, ina ia mautu lelei le alagatupe e fesoasoani ai mo ni sikolasipi mo ituaiga matata nei e sili ona mo'omia. Ua taofiofi mai le ofoina atu o sikolasipi i le lautele o kosi ua to'atele i latou ua fo'i mai ai ma fa'ailoga maualuluga, ae ua amata ona va'ai toto'a i matata nei ua sili ona mana'omia.”

 

Na fesiligia fo'i e le fanau a'oga, tulaga o le tupe Litaea, aua o lo’o faia ai nogatupe a le malo,

 

Na fa'ailoa, o lenei vaega tupe e nono atu i vaega o le Malo, e toe totogi mai ma le tupe fa'asili mama, e atili ai ona fa'ateleina ma ola le teugatupe o le Litaea. O lo'o avea fo'i le nogatupe nei i aiaiga e le gata ina vave ona toe fa'atupu mai le nogatupe na faia, ae toe fa'aauau ona maua mai le isi tupe fa'asili ona sa nono atu nai lo le tu'u ai lava na'o le vaega atoa o le teugatupe e le nonoina.

 

Fesiligia le tulaga o le Kamupani I'a pe mata e tula'i pe tumau pea i le atunu'u.

 

"Ia tatou mautinoa e tasi lava le mea e ala ai ona o mai tagata nei e faia latou pisinisi i le atunu'u, ina ia lava ma totoe latou polofiti e maua e fa'ailo ai le tulaga olaola lelei o latou pisinisi. Afai la ae fa'aauau pea ona ave'esea e le Malo tele o aiaiga sa mua'i fa'afiafiaina ai le au faipisinisi e fa'atula'ia latou falei'a iinei, e le matua fesiligia e i tatou le tulaga tula'i ese o nei Kamupani mai lo tatou malo,” o le tali lea a Iulogologo.

 

Na fesiligia fo'i le lafoga 7% e fa'ae'e i oloa fa’atau, ae na tali Iulogologo, "O le 7% lea ua na'o le 4.5% le mea mama e ese mai le 3% sa sau a'i le lafoga lea. O lona uiga e na'o le $4.5miliona le tinoitupe e maua mai ai, ma e le taitai ona lava ai le taumafaiga e toe fa'aleleia atoatoa le tamaoaiga tausi o Amerika Samoa."

 

Sa ia fa'ailoa foi, "E le o fa'atamala le faigamalo ma o tatou ta'ita'i e taumafai ala uma ina ia mautu le tamaoaiga tausi o le tatou malo, e ui ina faigata, ae taumafai. E taua outou i le malo, aua o outou o le lumana'i o le tatou atunu'u. Aua ne'i outou fa'atamala, ua matua outou tago e saili le atamai i mataupu ma tomai o lo'o outou va'aia o sili ona mana'omia e Amerika Samoa e fa'amautu ai lona tamaoaiga. Alu ai i le ala faigata lena, aua o lenei vaitau ua sousou lava le tatou folauga. Ae mautinoa, o le ta'ita'i agava'a, e na te fa'atautaia lo tatou sa i aso sousou ma tai fita o le soifuaga."