O le aso To'ona'i na te'a nei na toe fa'aauau ai ta'aloga o le Liki Volley Ball o lo'o fa'atautaia a le Asosi Volleyball a Amerika Samoa, ASVBF, i malae e lua i le faleta'alo o le Kolisi Tu'ufa'atasi.

Mai le malae numera tasi na tu'u na amatalia ai ta'aloga a au a tama'ita'i ma sa fetaui ai le 'au a le Measina ma le All For One, ma sa manumalo le Measina i seti e lua i le tasi a le All For One. Ta'aloga na soso'o ai o le Pala na fetaui ma le 'au tama'ita'i a le Tanoa manumalo fo'i le Pala i seti e lua ae tasi le Tanoa.

I le ta'aloga lona tolu o le CTR na fetaui ai ma le 'au tama'ita'i a le Sons na malo fo'i le CTR e lua latou seti. O le fetauiga a le Mizuno ma le BTI i le latou talita na malo ai le BTI i le talita i le lua o latou seti, ae tasi le Mizuno.

Soso’o lea ma ta'aloga faitaulia a le Mens B na fetaui ai le Uso ma le Manu'ula ma sa malo ai le Manu'ula i seti fo'i e lua i le tasi le seti a le Uso.

O le ta'aloga na soso'o ai sa faia mo le vaega a le U19 a Alii ma sa fetaui ai le Laumuatasi ma le Breakers, na sola le Laumuatasi ma le malo ina ua malo i latou seti e lua, i le tasi a le Breakers.

O le ta'aloga mulimuli a le U19 na fetaui ai le 'au a le Annex mai Fagatogo ma le 'au a le Uso ma sa malo fo'i le Uso i latou seti e lua i le leai a le Annex.

I le vaega a le "B Alii" na fa'aauau ai latou ta'aloga mo le Ta'amilosaga 4, ma sa fetaui ai le Uso ma le Aliitaoso. Malo le Uso i lea ta'aloga i a latou seti e lua na ta'a'alo ai. O le Manu'ula  na ta'a'alo ma le Tama Samoa Moni ma sa malo ai le Manu'ula i le lua o latou ta'aloga ae tasi le Tama Samoa Moni.

O le toe ta'aloga o le latou talita lea, sa fetaiia ai le CTR ma le Annex ma ua mautu fo'i i a'ao o le Annex le talita ina ua latou avea a latou seti e lua ae tasi le seti a CTR.

Mai le Malae 2, lea sa fa'atautaia ai ta'aloga a le "Men's A," na muamua tatala malae ai le ta'aloga a le Laumuatasi ma le Uso peita'i ua sola fo'i tama o le taulaga, le Laumuatasi ma le malo.

O le Annex na ta'a'alo ma le Tama Samoa moni ua le gafatia fo'i e Tama Samoa Moni le malosi o tamaiti mai Fagatogo ina ia se'i e i latou ta'aloga uma e lua o le latou ta'aloga faitaulia. O le Sinapi sa fetaui ma le Alii Taoso, peita'i e lua lava seti na ave uma e le Sinapi ma ua see atu ai fo'i ma le malo. O le Uso na fetaui ma le Au a Tama Amouli na malo ai le Uso i latou seti e lua. Pioneer na fetaui ma Tama o le Puataunofo ma se'i ai le malo e tama o le Puataunofo ina ia malo i seti e lua o le latou ta'aloga faitaulia.

O le 'au a le No Mercy na fetaui ma Fagatogo, na se'i e tama o le taulaga le latou ta'aloga ina ua malo i seti e lua i le tasi a le No Mercy. Fetaui le Tanoa ma le West Point i le talita, e tolu seti o lea ta'aloga finau, peita'i na tumau pea le talita i le Tanoa ina ua lua latou seti na malo ai, i le tasi a le West Point.

Na toe fa'atautaia le ta'amilosaga lona fitu o ta'aloga faitaulia a le "Mens A" ma tatala malae ai Amouli Youth ma le Tama Samoa Moni, na malo le au a Tama Samoa Moni i a latou seti e lua i le tasi a Amouli.

Ta'aloga a CTR ma Fagatogo na malo ai Fagatogo i seti e lua o le fetauiga lea.  O le ta'aloga i le va o Alii Taoso ma  le West Point na malo ai le West Point i seti e lua o le latou ta'aloga finau. O le ta'aloga i le va o Pioneer ma No Mercy na malo ai le No Mercy ina ua latou malo i seti e lua o le latou fetauiga. Annex na fetaui ma Puataunofo ma sa malo ai tamaiti o le Taulaga a le Annex. Sinapi na fetaui ma Laumuatasi na malo ai le Laumuatasi i a latou seti e lua o le ta'aloga lea.

O le toe ta'aloga o le ta'amilosaga 7 ma o le toe ta'aloga fo'i o le aso To'ona'i na fetaui ai loa le Sons ma le Tanoa i le ta'aloga o le Talita a le Men's A. O le i'uga o lea ta'aloga, ua toe tumau fo'i le Talita i le Tanoa ina ua manumalo i seti e lua o le latou fetauiga mataina.

O le fonotaga fa'apitoa fo'i a le Laulau a le ASVBF ua latou taumafai e solalaupule ni sailiga tupe e mafai ona fa'atupe ai le fa'amoemoe o le Asosi i a latou fa'ailoga ae maise o isi fuafuaga fa'ataoto a le Asosi ia aluga lelei liki volleyball o lo'o mulimuli mai.

"O le mautu lava o nei mea uma, o le lava o le seleni e to'omaga i ai le asosi i a latou ta'amilosaga fa'atulaga o le tausaga, ma e tatau fo'i ona faia se isi ta'amilosaga volleyball i le fa'aiuga o lenei tausaga. O le ala i mea uma o le vave ona fa'atulaga se seleni mo nei mea uma ma e tatau ona lafoma'a uma lava i ai tagata o aofia i ta'amilosaga ma le komiti fo'i o le tatou Asosi Volley Ball." O se fa'amatalaga aloaia lea a le Taitaifono o le Komiti a le ASVBF o Dr, Mikaele Etuale.