Ua taofia nei i le toese i Tafuna se Tina talavou e aunoa ma se tupe ua fa’atulaga e tatala ai o ia i tua, e fa’atali ai taualumaga o lana mataupu lea ua i luma o le Fa’amasinoga Fa’aitumalo, e mafua mai i le tagi ua fa’aulu e le malo fa’asaga ia te ia, ona o tu’uaiga i lona fa’ao’olima lea i se isi tama’ita’i e ala i lona fa’aaogaina o se a’upega ma’ai.

O moliaga e 2 ua tu’uaia ai e le malo ia Fa’anenefu Hall e aofia ai le moliaga mamafa o le fa’ao’olima i le tulaga muamua atoa ai ma le moliaga mama o le fa’atupu vevesi i nofoaga faitele, peita’i na taua e le loia a le malo ia Gerald Murphy i luma o le fa’amasinoga ananafi le sauni o le malo e faila isi moliaga fa’aopoop fa’asaga ia Hall.

O le mataupu e pei ona tu’uaia ai e le malo ia Hall, na tula’i mai i Leone i le amataga o le vaiaso nei, ina ua talosagaina e se molimau le fesoasoani a le Ofisa o Leoleo ina ua molimauina manu’a tuga i le tino o le na a’afia, e mafua mai ina ua fa’aaoga e le ua molia se fasi tioata e ta tui ai lona lima taumatau ma ona foliga, e pei ona tu’uaia ai e le malo.

E tusa ai ma fa’amaumauga a le fa’amasinoga, sa i ai fa’atasi Hall ma le ua molia i totonu o le fale i le taimi na tula’i mai ai le fa’alavelave.

Na taua e se molimau i Leoleo lona fa’alogoina o se pao mai totonu o le fale, e foliga mai o se mea o lo o ta’e, ae mulimuli ane manino le mea sa tupu, na fa’aaoga e Hall se fasi tioata ta’e e fa’ao’o ai manu’a i le na a’afia, ma fa’anatinati atu ai loa o ia i le falema’i mo togafitiga, ma o lo o taofia pea o ia i le falema’i i Faga’alu i le taimi nei.

O le tama’ita’i loia fautua ia Kate Hannaher o lo o tula’i mo Hall, lea sa ia talosagaina ai le fa’amasinoga ina ia fa’atulaga se tupe e tatala ai le ua molia i tua e alu e fafaga lana pepe e 6 masina o lo o i ai, i le mae’a ai lea ona fa’atulaga e le afioga i le ali’i fa’amasino ia Fiti Sunia le taofia o Hall i le toese e aunoa ma se tupe e totogi.

Na finau Hannaher i le fa’amasinoga ina ia fa’atulaga se tupe e tatala ai le ua molia, ina ia mafai ai ona tatala o ia i tua e mafuta i lona aiga aemaise lana pepe o lo o fa’asusu ia te ia, e fa’atalitali ai taualumaga o lona fa’amasinoga.

Na fa’aalia atili e Hannaher e fa’aepa, e le o se tagata e ono sola ese ma le atunu’u le ua molia, poo se tasi fo’i na te toe fa’atinoina se isi solitulafono matuia, o le mataupu fo’i e pei ona tu’uaia ai o ia, o se mataupu na tupu fa’afuase’i.

Saunoa Sunia e fa’apea, talu ai le matuia o le mataupu e pei ona tu’uaia ai Hall, ua manatu ai le fa’amasinoga e teena le talosaga ina ia fa’atulaga se tupe e tatala ai o ia, ae o le a tumau pea ona taofia o ia i le toese e aunoa ma se tupe e tatala ai, e fa’atalitali ai moliaga fa’aopoopo ia ua sauni le malo e faila.

Na talosaga Sunia i le Leoleo o le Falepuipui pe mafai ona latou fa’atulagaina se auala e mafai ai ona maua e le ua molia le avanoa e fafaga ai lana pepe ao taofia ai o ia i le toese, lea fo’i na taua e le tama’ita’i Leoleo, o le a latou silasila toto’a i ai i le tulaga lena ma fa’atulaga taimi ma avanoa e mafai ai ona fafaga e le ua molia lana pepe a o taofia ai i le toese.

O le taeao nei lea ua fa’amoemoe e toe tula’i ai Hall i luma o le fa’amasinoga fa’aitumalo, mo le failaina lea e le malo o a latou moliaga fa’aopoopo fa’asaga ia te ia.