Ads by Google Ads by Google

Ta’utino le ali’i kovana e i ai suiga i le la Kapeneta fou

ausage@samoanews.com

O le fa’aiuga o le fonotaga mulimuli a le afioga i le ali’i kovana ia Lolo Matalasi Moliga ma lana Kapeneta mo lenei nofoaiga, lea na fa’ataunu’u i le taeao ananafi i le potu fono a le Ofisa o Faatoaga i Tafuna, sa ia fa’ailoa aloaia ai i luma o le Kapeneta le i ai lea o suiga ua la fuafua ma le lutena kovana e faia i le la kapeneta fou.

 

“E i ai suiga ua ma fuafua ma le afioga a Lemanu e faia i le ma kapeneta mo le isi 4 tausaga o loo lumana’i nei, e le o ni suiga tetele peita’i o suiga e taua ma aoga mo le manuia o le tatou faigamalo mo le lumana’i”, o se vaega lea o le saunoaga a le alii kovana i luma o le kapeneta.

 

“E le fesiligia la outou tautua sa ofoina mai mo le atunu’u i le 4 tausaga ua mavae atu, o lea fo’i ua silasila i ai le atunu’u atoa i le tele o atina’e ma suiga ua mafai ona tatou fa’atinoina, e mafua mai na suiga lelei uma i le tautua sa outou fa’atinoina”.

 

“Ae ui i na galuega lelei ua mae’a ona outou faia, e le taofia ai i maua mai le faia o suiga lelei mo le manuia o le atunu’u, e le mafai fo’i ona ma tuuina se tagata fa’aletonu i le faigamalo mo le isi 4 tausaga, e tatau lava ona tofia le tagata ua i ai le agava’a talafeagai mo Ofisa ta’itasi”.

 

“E oo mai lava i le taimi nei e lei faia sa maua faaiuga ma Lemanu poo ai sui fou o le tatou kapeneta mo lena tausaga, ae afai fo’i e toe tofia oe i le galuega, ia sauni e tautua ma fai le mea sili mo le atunu’u, ma te mana’omia fo’i a outou talosaga mo i maua ao ma sauni e filifili ni isi e avea ma ta’ita’i o le atunu’u i le lumana’i”.

 

O le aso tonu o le fa’auuga o le kovana ma le lutena kovana i le aso 3 Ianuari 2017 i le itula e 12:00 i le aoauli, o le taimi lea ua atofaina e le ali’i kovana e amata fa’alauiloa ai sui o le la kapeneta fou ma Lemanu.

 

“O le taimi lava e tofia ai oe e avea ma sui o le Kapeneta, ona outou tauaveina loa lea o le tofiga o le Faatonusili le tumau, e fa’atali ai le taimi e faamaonia mai ai outou i luma o le Fono Faitulafono”.

 

Na faafetaia e le alii kovana le kapeneta e tusa ai o galuega lelei sa latou fa’atinoina, ae o le avanoa lea ua tu’u atu e malolo ai mai a latou galuega, o le a fa’aaoga lea e mafuta atu ai i aiga, e fa’atalitali ai le taimi e toe filifilia ai i latou mo le toe fa’aauauina o le latou tautua.

 

“Ae mo outou uma o le a tuua le galuega i lena tausaga, e tele naua mea taua ua mafai ona ma a’oa’oina mai ma Lemanu ia te outou, o mea taua ia ua fai ma oso o le savaliga i le nei 4 tausaga o loo lumana’i nei, e le gata i fa’aiuga fai ae o fautuaga fo’i sa mafai ona tuuina mai e fesoasoani ai i le galuega”.

 

Na talosagaina fo’i e le ali’i kovana afioga i Fa’atonusili ina ia fa’atonu a latou tagata faigaluega ina ia auai uma i le aso o le fa’auuga o le kovana ma le lutena kovana, ina ia fai ma faata’ita’iga mo i latou i le lumana’i.

 

Na fa’afetaia e ni isi o kapeneta ta’ita’i o le malo e tusa ai o le galuega sa latou galulue mai ai i le 4 tausaga ua mavae, ma e ui o ni isi o taimi latou te faia ai faaiuga e le tusa ma o latou finagalo, peita’i sa vaaia lo latou galulue faatasi pea mo le manuia o le atunu’u.