Ta’usala Vaega Iloilo Iuga ia Mamona fa’ao’olima tulaga muamua


Se tasi o sui fou o le Kapeneta a le ali’i kovana, tofa Leseiau T. Laumoli lea ua filifilia e avea ma Fa’atonusili o le Matagaluega o Polokalame mo le tetee atu i Solitulafono i le atunuu (CJPA).

Le taimi na tula’i fa’aaloalo ai le Kapeneta e aloaia ai le soifua galue o le afioga i le Kovana o le Falelima i Sisifo ia Lualemaga E. Faoa ua tuumalo, fa’apea ai soifua o i latou e to’a 3 na maliliu i le fa’alavelave lea na tula’i mai i le Manu’a Store i le 3 vaiaso talu ai. [ata AF]
ausage@samoanews.com

Na fa’ailoa e le afioga i le ali’i kovana ia Lolo Matalasi Moliga i le ulua’i fonotaga a lana Kapeneta i le vaiaso na te’a nei, lona talitonuina o i latou uma ua mae’a ona filifilia e avea ma Ta’ita’i o Matagaluega ma Ofisa ta’itasi uma a le malo, e ala i o latou tomai ma agava’a e mafai ona fa’atinoina ai le galuega.

 

Na tatala le ulua’i fonotaga a le kovana ma lana kapeneta i se tula’i fa’aaloalo sa valaauina e le Tiakono ia Malaki Timu, e aloaia ai le tautua a le afioga i le Kovana o le Falelima i Sisifo ia Lualemaga E. Faoa ua fai i lagi i le folauga, atoa ai ma soifua o ali’i e to’atolu ia na maliliu i le fa’alavelave na tula’i mai i le Manu’a Store i le 3 vaiaso talu ai.

 

O le ulua’i mataupu na saunoa i ai le ali’i kovana e tatala ai lana saunoaga, o lana fa’afetai lea i le au fa’asalalau a le atunu’u ma le sootaga fai fai pea ma le malo talu mai le ulua’i 4 tausaga ua mavae atu, lea fo’i ua toe sauni e galulue fa’atasi mo le isi 4 tausaga o loo lumana’i nei.

 

“O le agaga atoa o i maua ma le afioga ia Lemanu Peleti Mauga, ia fa’aauau pea le mafutaga ma le au fa’asalalau a le atunu’u mo e isi 4 tausaga o loo lumana’i nei, ina ia mafai ai ona fa’alauiloa e le au fa’asalalau taualumaga o galuega o loo fa’atino e le malo, ina ia manino mea moni ma le fa’amaoni o loo tutupu i le faigamalo a le atunu’u”, o le saunoaga lea a le ali’i kovana.

 

O le mataupu lona lua i lana saunoaga, o le tu’uina atu lea o lana fa’afetai ia i latou uma ua mae’a ona filifilia e avea ma Fa’atonu le tumau o Matagaluega a le malo atoa ai ma Ofisa tumaoti mo le isi 4 tausaga.

 

“O i latou uma ua filifilia e avea ma Ta’ita’i o Matagaluega ma Ofisa a le malo, ua mafua ona tofia oe ona ua talitonuina lou agava’a ma lou tomai i le fa’atinoina o le galuega, e to’atele naua i latou o loo i ai le tomai ma le agava’a e mafai ona fa’atinoina le galuega, peita’i ua filifilia oe ona ua ma talitonuina oe mo le fa’atinoina o le galuega”, o le saunoaga lea a le afioga i le ali’i kovana.

 

Ina ua fa’alauiloa e le ali’i kovana lana ulua’i tofiga sa faia mo lana kapeneta fou ua i ai nei, e pei ona toe filifilia ai le afioga i le Maoputasi ia Mauga Tasi Asuega e avea ma Failautusi o le Ofisa o Mataupu Tau Samoa, sa ia taua ai lagona fa’anoanoa ina ua motusia le mafutaga ma le afioga i le Kovana o le Falelima ia Lualemaga, lea na fa’amanavaina e le Atua ana galuega i le vaiaso na te’a nei.

 

Na fa’aauau pea lana saunoaga ma ia fa’afetaia ai sui tuai uma o le Kapeneta ua toe filifilia e avea ma ta’ita’i, ae fa’apitoa ai i sui fou o lea ua avea ma totino o le Kapeneta mo le isi 4 tausaga.

 

“E leai ni suiga tele ua faia i le kapeneta mo lenei nofoaiga fou ua tatou savalia, pau le agaga o i maua ma le ali’i kovana, ua ma talitonuina le galuega o le a outou fa’atinoina, ina ia fa’amuamua pea le atunu’u i soo se galuega tou te faia, ina ia mautinoa e fa’atino pea la tatou anavatau o le tautuaina lea o le atunu’u i soo se taimi”, o le saunoaga lea a le ali’i kovana.

 

O se tasi o tofiga fou sa ia fa’alauiloa i le fonotaga i le vaiaso na te’a nei, o le filifilia lea o le tofa a Fagafaga Daniel Langkilde e avea ma sui sooupu atoa ai ma fesootaiga ma le au fa’asalalau a le atunu’u.

 

Na fa’ai’u le saunoaga a le ali’i kovana i lona fa’amanuia lea i lana kapeneta fou ua mae’a ona filifilia, aemaise ai lo latou sauni atu mo le fa’amaoniaina o latou suafa i luma o le Fono Faitulafono i le vaiaso fou.

Comment Here