Ta’usala Vaega Iloilo Iuga ia Mamona fa’ao’olima tulaga muamua


[ata: archive]
ausage@samoanews.com

E ui e lei lava mau a le malo e fa’amaonia ai le moliaga mamafa o le fasioti tagata i le tulaga lua fa’asaga i le ali’i o Mataupu Mamona, peita’i na mafai e mau sa tu’uina atu i luma o ali’i ma tama’ita’i iloilo iuga ona faamaonia ai le moliaga mamafa o le fa’ao’olima i le tulaga lua lea ua ta’usala ai le ua molia.

 

Mai moliaga e 5 na tu’uaia ai e le malo ia Mamona, ua ta’usalaina nei o ia i moliaga mamafa e lua o le fa’aoolima i le tulaga lua, fa’apea ai ma le tu’uina atu o fa’amatalaga sese i Leoleo, aemaise ai o le moliaga mama o le fa’atupu vevesi i nofoaga faitele, ae ua le mafai ona fa’amaonia isi moliaga e lua sa totoe ai i le pepa o tagi, le moliaga mamafa o le fasioti tagata i le tulaga lua, atoa ai ma le moliaga mama o le fa’atupu vevesi i nofoaga faitele.

 

O moliaga e pei ona ta’usala ai Mamona, na alia’e mai le fa’alavelave lea na tula’i mai i le masina o Fepuari o le tausaga na te’a nei, ina ua ia fa’aoolima i lona to’alua e ala i lona fa’aaoga o se maea e titina ai lona ua, ma taofia ai lona to’alua i le falema’i i Faga’alu ona o manu’a tuga sa a’afia ai o ia, ma i’u ina maliu ai lava o ia i le silia ai i le vaiaso o taofia i le falema’i.

 

Na fa’amaonia e le atali’i a Mamona e 9 tausaga le matua lea sa avea ma molimau autu a le malo i lenei mataupu i luma o ali’i ma tama’ita’i iloilo iuga, lona vaai tino o titina e lona Tama le ua o lona Tina e fa’aaoga i ai se maea uliuli, seia oo lava ina mole si ona Tina ma ua le toe gaioi o ia.

 

Na taua fo’i e le tamaititi i lana molimau le pepelo o lona Tama i sui o le EMS ina ua taunu’u atu e ave lona Tina i le falema’i, lea na ia fai i ai o lona Tina o loo maua i le ma’i sela.

 

Na finau le malo e fa’apea, ina ua fa’atoa tu’uina atu le Tina ua maliu i le falema’i, sa fa’ailoa e le ua molia i Leoleo o lona to’alua na a’afia i le ma’i sela, mulimuli ane ina ua fesiligia maosia sa maua i lona ua, na toe sui ai le tali a le ua molia, o lona to’alua na taumafai e pule i lona ola.

 

O le aoauli o le aso Faraile na te’a nei na tu’uina mai ai e ali’i ma tama’ita’i iloilo iuga la latou fa’aiuga e nofosala le ua molia i moliaga e pei ona taua, i le mae’a ai lea ona latou iloiloina o mau fa’amaonia o lenei mataupu, lea e aofia ai fa’amatalaga tauto a molimau uma sa valaau e le malo, e aofia ai ma le molimau a le ali’i a le ua molia e 9 tausaga le matua, lea sa avea ma molimau autu o lenei fa’amasinoga.

 

E lei mafai e fa’afinauga malolosi a le loia a Mamona ia Douglas Fiaui sa tu’uina atu i luma o le vaega iloilo iuga, ona liliu ai le fa’aiuga na autasi ali’i ma tama’ita’i iloilo iuga e to’a 6 e tu’uina mai mo lenei mataupu.

 

Na taua e Fiaui i lana fa’afinauga e fa’apea, o loo manino le ripoti sa tu’uina mai e le Foma’i e tusa ai o lenei mataupu, o manu’a na a’afia ai le tino o le Tina na a’afia, na mafua mai ina ua pule o ia i lona soifua.

 

Na finau Fiaui i le vaega iloilo iuga, e le o i ai se vaega o le ripoti o taua ai ni manu’a na mafua mai ina ua titina e le ua molia le ua o lona to’alua e fa’aaoga ai se mae’a, poo le faia fo’i i ai o ni sau’aga mamafa ma le le alofa, peita’i na tumau pea le finau a le loia a le malo ia Gerald Murphy, na mafua ona maliu le tina o le aiga, ona o manu’a tuga na a’afia ai lona tino, e mafua mai i le taimi na fasi ai o ia e lona to’alua e ala i lona fa’aaogaina o se maea e titina ai lona ua.

 

O le moliaga mamafa o le fa’aoolima i le tulaga muamua, e mafai ona fa’asala ai se tasi i le toese mo le olaga atoa, poo le fa’asala fo’i i le isi fa’asalaga fa’a falepuipui, o le taofia lea mo le umi e le itiiti ifo i le 10 tausaga ae le sili atu fo’i i le 30 tausaga le umi.

Comment Here