Ads by Google Ads by Google

Ta’usala se ali’i talavou i moliaga mamafa e 4 o le talepe fale


[ata: archive]
ausage@samoanews.com

E 4 moliaga o le talepe fale ua ta’usala ai e le Fa’amasinoga Maualuga se ali’i talavou e 20 tausaga le matua, e mafua mai ina ua talia e le fa’amasinoga se maliliega na sainia e le malo ma le ua molia ma le fa’amoemoe e fa’amuta ai taualuamga o lana mataupu sa fa’agasolo i luma o le fa’amasinoga maualuga.

 

E 2 tagi na fa’aulu e le malo fa’asaga i le ali’i o Edward Jr Eary. O le tagi muamua sa tu’uaia ai o ia i le moliaga mamafa o lona umia fa’asolitulafono lea o vaega o le pauta fa’asaina o le aisa. Ae i le tagi lona lua sa faila fa’asaga ia te ia, na tu’uaia ai o ia e le malo i moliaga mamafa e 4, lea e aofia ai moliaga e 3 o le talepe fale i le tulaga muamua, atoa ai ma le moliaga e tasi o le talepe fale i le tulaga lua.

 

Ae i lalo o le maliliega na sainia e le malo ma Eary lea fo’i ua talia e le fa’amasinoga, na malie ai le malo latou te toe faia se suiga i le tagi lona 2 sa latou fa’aulu fa’asaga ia Eary, ina ia suia ai moliaga mamafa e 3 o le talepe fale i le tulaga muamua i moliaga e 3 o le talepe fale i le tulaga 2.

 

O le maliliega la i le va o Eary ma le malo, lea fo’i ua talia e le fa’amasinoga, ua ta’usala ai o ia i moliaga mamafa e 4 o le talepe fale i le tulaga lua. Ua talia fo’i e le fa’amasinoga le talosaga a le malo ina ia solofua le ulua’i tagi sa latou fa’aulu fa’asaga ia Eary, lea e aofia ai le moliaga o le umia fa’asolitulafono o vaega o le pauta fa’asaina o le aisa.

 

I le tali ioe ai o Eary i moliaga mamafa e 4 o le talepe fale i le tulaga lua, sa ia ta’utino ai e fa’apea, i se taimi o le po i le aso 14 Fepuari 2017 i Amerika Samoa, sa ia ulufale fa’amalosi ai i totonu o le fale o se aiga ma le fa’amoemoe e fa’atino ai le solitulafono o le gaoi.

 

A o i ai o ia i totonu o le fale o lea aiga, sa ia gaoia ai se Televise e 16 inisi le tele ma le fa’amoemoe e le mafai e lea aiga ona toe maua la latou meatotino, ma ia fa’atinoina ai le solitulafono o le talepe fale i le tulaga lua.

 

I le po lava lea o le aso 14 Fepuari i Amerika Samoa, sa ia osofaia ai fo’i se faleoloa i Leone ma le fa’amoemoe e fa’atinoina ai le solitulafono o le gaoi. Na ta’utino Eary e fa’apea, a o i ai o ia i totonu o le faleoloa, sa ia gaoia ai se pepa sa teu ai i totonu tupe siliva atoa ai ma ni pepa sikaleti, ma ia fa’atinoina ai le tulafono o le talepe fale i le tulaga lua.

 

I le po o le aso 8 Fepuari o le tausaga lava lenei i Amerika Samoa, na ta’utino ai Eary i lona ulufale fa’amalosi lea i totonu o le fale o se isi aiga ma le fa’amoemoe e fa’atino ai le solitulafono o le gaoi. A o i ai o ia i totonu o lea fale, sa ia gaoia ai ni sipika se 2, lea na mulimuli ae ona fa’atauina atu i se isi tagata i le tau e $150, ma ua ia fa’atinoina ai le solitulafono o le talepe fale i le tulaga lua.

 

Ma le po o le aso 13 o Fepuari, sa ia ulufale fa’amalosi ai i totonu o le fale o se isi aiga ma sa ia gaoia ai se Televise, ma ua ia fa’atinoina ai le solitulafono o le talepe fale i le tulaga lua.

 

Ua finau loia i le fa’amasinoga ina ia tu’uina atu se fa’asalaga fa’anofovaavaaia mo Eary, peita’i ua malamalama le ua molia, tusa lava pe finau loia mo se fa’asalaga mama mo ia, e pule le fa’amasinoga pe talia pe teena ia fa’afinauga, aua o loo i ai i le fa’amasinoga le malosi e fa’asala ai o ia i soo se fa’asalaga e talafeagai ma lana solitulafono.

 

O lo o taofia pea Eary i le toese i Tafuna e fa’atali ai le aso 11 Aokuso lea ua fa’atulaga e lau ai lana fa’asalaga.

 

O le afioga i le ali’i fa’amasino ia Elvis P. Patea sa iloiloina le mataupu a le ua molia, fa’atasi ai ma le lagolagosua a afioga i ali’i Fa’amasino Lagolago ia Su’apaia Pereira ma Satele Lilio Ali’itai.