Mai le lata ai i le 2 tausaga o taumafai pea le malo o Amerika Samoa e tu’u fa’atasi a latou mau fa’amaonia e lagolago ai tu’uaiga fa’asaga i ali’i e to’afa mai le pisinisi o le Aute, lea sa tu’uaia i le fa’alavelave lea na tafana ai le Ofisa o Leoleo i Leone i le 2014, o le taeao ananafi na fa’ai’uina ai lenei mataupu ina ua ta’usala i latou nei i le moliaga mama o le taupulepule e fa’atino le solitulafono o le fa’aleaga meatotino i le tulaga muamua.

O ananafi na fa’atulaga e amata aloaia ai le fa’amasinoga autu a ali’i e to’afa o lo o tu’uaia i le tafanaina o le Ofia o Leoleo i Leone, ae i le mae’a ai o ni feutanaiga sa faia i le va o Loia ma i latou o lo o tu’uaia, na latou sainia ai loa se maliliega ma tu’uina atu loa i luma o le fa’amasinoga.

A o le i fofogaina le maliliega i le va o le malo ma i latou e to’afa ua ta’usalaina nei i luma o le fa’amasinoga maualuga, na mua’i fa’ailoa e le afioga i le ali’i fa’amasino ia Elvis P. Patea i le mamalu o le atunu’u na tofia e saili mai ai se vaega iloilo iuga le tulaga ua o o i ai le mataupu, e aofia ai le leai lea o se fa’amasinoga autu e fa’ataunu’uina, ona o lea ua sainia e itu e lua sa latou maliliega e fa’amuta ai loa lenei mataupu.

O i latou e to’afa na tu’uaia e le malo i lenei mataupu e aofia ai Manu Lefatia, Sinapati Tu’ufa’anatu, Tuliese Taliu ma Mosegi Solia Jr.

O moliaga mamafa e 3 na ulua’i tu’uaia e le malo i latou nei e to’afa e aofia ai moliaga e lua o le fa’ao’olima i le tulaga lua, fa’apea ai ma le moliaga o le fa’aleaga meatotino i le tulaga muamua, ae i lalo o le maliliega lea na sainia e itu e lua ma ua taliaina fo’i e le malo, ua tali ioe ai i latou nei i le moliaga lona 3 lea ua toe teuteu e le malo, ina ia fa’ailoa ai le solitulafono o le taupulepule lea e fa’atino le solitulafono o le fa’aleaga meatotino i le tulaga muamua.

I le tali ioe ai o i latou e to’afa ua ta’usala e le fa’amasinoga i lenei mataupu, na latou ta’utino ai i le fa’amasinoga e fa’apea, i se taimi o le aso 1 Novema 2014 i Amerika Samoa, sa latou taupulepule fa’atasi e fa’atino se gaioiga ina ia fa’aleagaina ai meatotino a le malo o Amerika Samoa.

Ma, i lo latou malilie fa’atasi ai e fa’atino lenei gaioiga, na latou fa’atinoina ai loa le solitulafono o le taupulepule lea e fa’atino le solitulafono o le fa’aleaga meatotino i le tulaga muamua, o se solitulafono A lea i le fa’atulagaina o solitulafono mama, lea e mafai ona fa’asala ai se tasi i le toese mo le umi e le silia i le tasi le tausaga, pe fa’asala fo’i i le salatupe e le silia i le $1,000.

Ina ua fesiligia e le fa’amasinoga i latou e to’afa ua ta’usala e tusa ai o lenei solitulafono, sa latou ta’utino ai e fa’apea, i se taimi o le aso 1 Novema 2014 i Amerika Samoa, sa latou fa’aleagaina ai ni meatotino a le malo o Amerika Samoa.

E le o taua i totonu o lenei maliliega se vaega e aofia ai le tafanaina o le Ofisa o Leoleo i Leone, e ui o le fa’alavelave lea na mafua ai ona taofia ma tu’uaia i latou e le malo i lenei mataupu.

I le taliaina ai e le fa’amasinoga o tuutuuga uma o lenei maliliega, na talia ai loa e ali’i fa’amasino talosaga a le itu tete’e, ina ia fa’aagafua le talosagaina o se ripoti e fuafua i ai se fa’asalaga, ae ua sauni i latou mo se fa’asalaga a le fa’amasinoga.

E silia i le 10 minute na malolo ai ali’i fa’amasino mo le iloiloina o sa latou fa’aiuga, ae fofogaina loa e le afioga i le ali’i fa’amasino ia Patea le fa’asalaga a le fa’amasinoga, lea e aofia ai le taofia o i latou nei i le toese i Tafuna mo le tasi le tausaga, e aofia ai le umi lea ua maea ona latou tuliina i le falepuipui.

Talu ai ua silia i le 20 masina o taofia i latou nei e to’afa i le toese i Tafuna, na poloina ai loa e le fa’amasinoga le tatalaina lea i tua o ali’i e to’atalu, o i latou ia e aofia ai Lefatia, Tu’ufa’anatu ma Taliu, se’i vagana ai Solia Jr e taofia pea i le toese i Tafuna, ona o lo o i ai le isi mataupu lea o lo o tu’uaia ai o ia e le malo, i lona umia fa’asolitulafono lea o vaega o le fualaau fa’asaina o le mariuana.

O le aso Tofi o le vaiaso nei lea ua fa’amoemoe e toe tula’i ai Solia Jr i luma o le fa’amasinoga maualuga mo le isi iloiloga o lana mataupu lea.

E lei finagalo le loia a le malo ia Gerald Murphy e talanoa mai i le Samoa News e fa’atatau i le fa’aiuga ua i ai lenei mataupu, peita’i na taua e le ali’i loia fautua ia Michael White, o le loia lea a Solia e fa’apea, e lagona lona fiafia i le tulaga ua i ai le fa’aiuga o le mataupu, ina ua le mafai e le malo ona fa’amaonia moliaga mamafa sa latou tu’uaia ai Solia.

Saunoa atili White e fa’apea, e foliga mai sa tatau i le mataupu ona latou su’esu’e atili i lenei mataupu, ina ia mafai ai ona latou tu’uina mai mau fa’amaonia e lagolago ai moliaga fa’asaga i ali’i na molia.