Ads by Google Ads by Google

Ta’usala ali’i 62 tausaga faia uiga mataga i se fafine 52 tausaga


[ata: SN]
ausage@samoanews.com

O le itula e 8:30 i le taeao nei lea ua fa’atulaga e lau ai le fa’asalaga a se Tama matua e 62 tausaga mai Amaluia i luma o le Fa’amasinoga Maualuga, i le mae’a ai lea ona ta’usala o ia e ali’i Fa’amasino i lona faia o uiga mataga i se Fafine e 52 tausaga le matua mai Amaluia lava.

 

O le susuga a Michael Agasiva, lea sa faailoa e lana loia ia Joshua Rovelli, o ia o se tasi o Matai taua ua mae’a ona lesitala i totonu o Amaluia, na ulua’i tu’uaia e le malo i le moliaga mamafa o le tagofia o itutinosa o se tamaitai i le tulaga muamua, atoa ai ma moliaga mama e lua o le soli fua o le fale o le isi aiga e aunoa ma se fa’atanaga, atoa ai ma le faaoolima i le tulaga tolu.

 

I lalo o se maliliega na sainia e Agasiva ma le malo, lea fo’i na talia e le Fa’amasinoga, na suia ai e le malo le moliaga mamafa o le tagofia o itutinosa o se tamaitai i le tulaga muamua, ae avea ma moliaga mama o le tagofia o itutinosa o se tamaitai i le tulaga lua.

 

I le tali ioe ai o Agasiva i le moliaga e pei ona ta’usala ai o ia e le Fa’amasinoga, sa ia ta’utino ai e fa’apea, i se taimi o le vaveao o le Tausaga Fou o le tausaga e 2017, na ia faia ai ni uiga mataga i le Fafine na a’afia, e ala i lona susu’e i lona o lona ofu sa fai ae tago i vaega o ona itutinosa.

 

E pei ona taua i fa’amaumauga a le Fa’amasinoga, o le po o le Tausaga Fou i le tausaga na te’a nei, sa faia ai se fiafia a le aiga o le Fafine na a’afia, ma valaaulia atu ai fo’i ma aiga tuaoi. Na amata mai lava le fiafia i le po seia oo i le taeao na sosoo ai.

 

I se taimi o le vaveao i le aso o le Tausaga Fou, na manatu ai loa le Fafine na a’afia o le a alu i le fale e fai sana malologa.

 

Na aga’i atu o ia i totonu o lona fale, ma taoto ai i luga o le nofoa umi o lo o i totonu o le potu malolo ma i’u ina moe atu ai lava, ae o le taimi lea o lo o i ai pea lava lana fanau i totonu o le fale.

 

Ina ua tuua e tamaiti le fale ma o ese atu, sa galo ona latou loka le faitoto’a, ma maua ai loa le avanoa o Agasiva e ulufale faamalosi ai i totonu o le fale i se taimi o le vaveao, ma ia fa’atino le solitulafono e pei ona ta’usala ai o ia.

 

O le faateia o le Fafine na aafia ina ua ia faalogoina se tagata o lo o tago atu i lona fatafata, na mafua ai loa ona ia ala i luga ma ia vaaia ai Agasiva i ona tafatafa, ma ia e e atu i ai e alu ese ma le fale. Na usita’i Agasiva ma ia tuua le fale o le Fafine na a’afia.

 

O le taimi lava na ulufafo ai Agasiva mai le fale o le Fafine na a’afia, na ia alu atu ai ma tapuni le faitoto’a, ma ia faafesootai ai loa Leoleo mo se fesoasoani.

 

Ina ua fesili le afioga i le ali’i Faamasino ia Elvis P. Patea ia Agasiva e ta’u atu agava’a o loo ia te ia, na taua ai e le ua molia, o lo o ia umia le faailoga o le BA i le Fa’a Faiaoga mai le Iunivesite o Hawaii.

 

E le o se taimi muamua lenei ua a’afia ai Agasiva i lalo o le tulafono. O le faalavelave lata mai e pei ona ta’usala ai o ia, o le faalavelave lea na ia fa’aaogaina ai se agaese e faaoo ai manu’a i se ali’i i le aso 29 Setema 2009, lea na ta’usala ai o ia e le Fa’amasinoga Maualuga i le moliaga mamafa o le fa’aoolima i le tulaga lua, ma poloaina ai loa le fa’asala o ia i le toese mo le umi e 5 tausaga.

 

O lo o taofia pea Agasiva i le toese i Tafuna e faatali ai le taimi lea ua faamoemoe e fofoga aloaia ai lana faasalaga i le taeao nei.