Ta’amilosaga ta’ito’a 7 a le ASRU mo le aso malolo o Tuugamau


Ta’amilosaga lakapi ta’ito’a 7 sa fa’agasolo i tausaga ua mavae a le Iuni Lakapi a Amerika Samoa (ASRU). [ata AF]

Ni isi o tapenaga a au lakapi i ta’amilosaga ta’ito’a 7 ua mavae. [ata AF]
ausage@samoanews.com

E 8 au lakapi mai Kalapu Lakapi eseese i le atunu’u ua fa’amaonia le mae’a lea ona lesitala, mo le ta’amilosaga ta’ito’a 7 a le Iuni Lakapi a Amerika Samoa (ASRU), lea ua fa’amoemoe e faia i le taeao o le aso Gafua, aso 29 Me, 2017 le aso malolo mo Tuugamau i le malae taalo i Tafuna.

 

O au lakapi o le a tausinio mo le ta’amilosaga ta’ito’a 7 i lenei masina e aofia ai a’u lakapi e 2 mai Leone, 2 au lakapi mai Pago Pago, Aua, Sa’ilele, Mapusaga ma Fagatogo.

 

Na taua e se sui o le Iuni Lakapi a le atunu’u i le Samoa News le taua tele o le ta’amilosaga ta’to’a 7 lea ua fa’atulaga mo le vaiaso fou, o se tasi lea o la’asaga ua fuafua le Iuni e fa’atino ina ia mafai ai ona si’itia le tulaga o le ta’aloga lakapi i le atunu’u.

 

E pei ona masani ai i ta’amilosaga ta’ito’a 7 faapenei, e 2 lava aso e fa’agasolo ai ta’aloga i vaega ta’itasi (pool games), fa’atoa fa’asolo ai loa le ta’amilosaga o le pau ma nofo (play-off) i le isi aso e sosoo ai, ae talu ai o le to’a laiti o ‘au lakapi ua mafai ona lesitalaina o lenei fa’amoemoe, ua manatu ai le Iuni ina ia fa’agasolo le ta’amilosaga i le aso e tasi ma mae’a ai lava.

 

Ua molimauina e le Samoa News tapenaga a le tele o kalapu lakapi i le atunu’u, mo le sauni atu ai i lenei ta’amilosaga.

 

Na taua e le faiaoga a se tasi o kalapu lakapi i le itu i Sisifo o le atunu’u e fa’apea, o se tasi o itu o lo o taumafai e fa’aleleia i koleniga i afiafi, o le tulaga i le malosi o le manava mo tama ta’aalo (fitness).

 

“Ua maitauina le i ai o le poto masani i le fa’aaogaina o le polo i totonu o le ta’aloga, pau le itu o loo taumafai e fa’aleleia o le lava lea o le manava, ona o le isi lea auala e mafua ai ona lavea le tama ta’aalo, e le o lava le malosi ma le manava e faatino ai le ta’aloga, ma avea ai loa ma itu e tula’i mai ai fa’afitauli pe lavea ai fo’i i totonu o le malae”, o le saunoaga lea a se tasi o ali’i faiaoga mai se tasi o au lakapi i le atunu’u.

 

Ae na taua e le susuga a Jeff Viliamu o le au lakapi a le afioaga i Fagatogo e fa’apea, ua moomia le toe si’itia o le tulaga o le lakapi i Amerika Samoa, ina ia mafai ona tausinio mo le sailia o sona avanoa e ofi atu ai i ta’amilosaga fa’avaomalo a le Fa’alapotopotoga o Lakapi a le lalolagi (IRB), lea sa tatou ausia i ni tausaga ua mavae ina ua maua le avanoa o le au lakapi a le atunu’u, le Talavalu e ofi atu ai i le ta’amilosaga sa faia i Hong Kong.

 

“O lo o tele lava tupulaga o lo o i ai le taleni i totonu o le atunu’u peita’i o le itu o loo fa’aletonu e le o lava ta’amilosaga o lo o fa’atino e le Iuni e fesoasoani ai i le unaia o le ta’aloga, ae afai loa e toe fa’aolaola tulaga ia e pei ona amata mai ai i tausaga ua mavae, ona mautinoa loa lea ua toe maualuga le ta’aloga lakapi i le atunu’u”, o le saunoaga lea a Viliamu.

Comment Here