Ads by Google Ads by Google

SUNIA: Maitauina pea tulaga fa’aletonu i le Ofisa Femalagaaiga


Le afioga i le ali’i Fa’amasino ia Fiti Sunia [ata AF]
ausage@samoanews.com

O le iloiloina ai e le Fa’amasinoga Fa’aitumalo i le taeao ananafi o mataupu a ni tagatanu’u mai fafo se to’alua, e le o tusa ma tulafono tau Femalagaaiga lo la aumau ai i totonu o le atunu’u, ae o lo o i ai pea i laua i le teritori ma o lo o tu’uaia i solitulafono eseese i luga o le alatele, na fa’ailoa ai e le afioga i le ali’i Fa’amasino ia Fiti Sunia i le loia a le malo o Gerald Murphy, le tumau pea lea ona i ai o tulaga fa’aletonu i le Ofisa o Femalagaaiga, e ui o lo o taumafai malosi pea le Fa’amasinoga e saili se auala e foia ai.

 

O le mataupu muamua e fa’asaga i se ali’i ave taxi na mae’a le aoga o lona pepa nofomau (I.D) i le masina o Ianuari 2017, ae o lo o fa’aauau pea ona galue o ia o se ave ta’avale la’upasese i totonu o le atunu’u, ma le isi mataupu, o se ali’i Asia ua 9 masina talu ona mae’a le aoga o le pemita e 30 aso na ulufale mai ai, ae o lo o i ai pea o ia i le atunu’u.

 

Na fa’ailoa e Sunia i le ali’i loia ia Murphy e fa’apea, talu ai o ia lea o lo o fai ma sui o le malo i luma o le Fa’amasinoga, ae o le Ofisa o Femalagaaiga o lo o i lalo lea o le Ofisa o le Loia Sili, lea o lo o avea ma sui o le malo, e tatau ai ona ia talatalanoa i ona ta’ita’i i auala e fa’aleleia ma foia ai le tula’i so o mai o nei fa’afitauli i le lumana’i, o tagata mai fafo o lo o nonofo fa’asolitulafono i totonu o le atunu’u ae o lo o a’afia i latou i solitulafono eseese.

 

O le ali’i ave taxi ia To’afitu Roberts, na pu’e fa’apagota e le Masela o le Fa’amasinoga ma tula’i ai i luma o le fa’amasinoga i le taeao ananafi, ina ua le oo atu o ia i le vaiaso na te’a nei na fa’atulaga e toe valaau ai lana mataupu.

 

E tusa ai ma fa’amaumauga a le fa’amasinoga, e $280 le salatupe a Roberts e mafua mai i ana sala o solitulafono i luga o le aualatele e le i totogia i le fa’amasinoga.

 

Na tau le mau le afa a le afioga i le ali’i fa’amasino ia Sunia ina ua fesili atu ia Roberts pe aisea na le oo atu ai i le aso na fa’atulaga e valaau ai lana mataupu, ae na tali le ua molia ua galo ia te ia, ae na atili ai ona le fiafia le fa’amasinoga ina ua manino i fa’amaumauga a le Ofisa o Femalagaaiga, o le aso 18 Ianuari o le tausaga nei na mae’a ai le aoga o le I.D a le ua molia, ae o lo o fa’aauau pea ona galue o se ave taxi i totonu o le atunu’u.

 

“Afai ua galo ia te oe le aso na poloa’i ai oe e te oo mai i le fa’amasinoga, e sili la pe a taofia oe i le toese e faigofie ai ona matou maua oe”, o le saunoaga lea a Sunia ia Roberts, ma ia fa’atonuina ai le taofia o ia i le toese se’i vagana ua totogi lana sala e $280 ona fa’atoa tatala lea o ia i tua.

 

Na talosaga le tama’ita’i loia fautua ia Kate Hannaher i le fa’amasinoga mo se avanoa e tatala ai Roberts i tua e saili se tupe e totogi ai lana sala, ae na saunoa Sunia, “Totogi muamua le tupe ona fa’atoa tatou talanoa”, ma ia fa’atonuina ai loa le Leoleo o le toese ina ia taofia le ali’i ave taxi i le falepuipui, se’i vagana ua ia totogi lana salatupe ona fa’atoa toe tatala lea.

 

Ae mo le mataupu a le ali’i mai Asia ia Tran Van Hung, e 3 moliaga tau ta’avale afi ua tu’uaia ai o ia e le malo, e mafua mai i le fa’alavelave lea na ia fa’afoeina ai se ta’avale i se auala fa’atautala ma le fa’atamala, ae le o i ai sona laisene ave ta’avale.

 

O fa’amaumauga e pei ona maua e le fa’amasinoga, o le ali’i o Hung na ulufale mai i le atunu’u i le pemita e 30 aso, ma ua 9 masina talu ona mae’a le aoga o lea pemita ae o lo o i ai pea lava o ia i le atunu’u.

 

O le taeao nei lea ua fa’atulaga e toe valaau ai le mataupu a Roberts ma Hung i luma o le fa’amasinoga fa’aitumalo, mo le iloiloina lea o le tulaga e tatau ona o i ai i laua, ona o lo o fa’aletonu tulaga o a la pepa nofomau i totonu o le atunu’u.