SUNIA: E le tusa Fa’avae taofia tagata a’afia gasegase mafaufau toese

ausage@samoanews.com

Na fa’amanino e le afioga i le ali’i fa’amasino ia Fiti A. Sunia i le taeao ananafi, e le tusa ma ala o le Fa’avae le taofia i le toese i Tafuna o se tagata e a’afia i le gasegase o le mafaufau, ae tatau ona tu’uina atu o ia i le falema’i mo togafitiga.

 

O lea saunoaga mai le afioga i le ali’i fa’amasino, na tu’uina atu lea ina ua mae’a ona finau le loia a le malo, e leai se nofoaga e tatau ona taofia ai se tama’ita’i e a’afia i le gasegase o le mafaufau, lea fo’i ua toe molia mai i le fa’atupu vevesi i nofoaga faitele, e mafua mai i le fa’atamala e inu ana fualaau o le mafaufau ma ia fa’atupuina ai ni gaioiga e ono save’u ai le nonofo filemu o tagata, ua na o le taofia lava o ia i le toese.

 

O le taeao ananafi lea na toe tolopo mai i ai le fa’ataunu’uina o le iloiloga o le mataupu a se tama’ita’i e a’afia i le gasegase o le mafaufau, ae o lo o tu’uaia i moliaga mama e lua o le fa’atupu vevesi i nofoaga faitele.

 

O le masina o Aokuso na taofia mai ai o ia ma tu’uaia i le fa’atupu vevesi i nofoaga faitele, peita’i na toe tatala e le fa’amasinoga o ia i lalo o tuutuuga, o le a alu e nofo i lona tuagane ma ia fa’amaoni e inu ana fualaau e fesoasoani ai i le gasegase o le mafaufau o lo o a’afia ai o ia.

 

E lei atoa se masina talu ona tatala o ia i tua ae toe taofia fo’i i le amataga o le masina o Setema, ma toe tu’uaia i le moliaga o le fa’atupu vevesi i nofoagatele, ma mafua ai loa ona faia le fa’aiuga a le fa’amasinoga ina ia taofia pea o ia seia oo mai i le taeao ananafi, se’i tau fa’amautu ni togafitiga e mafai ona fesoasoani ai mo ia.

 

O le Foma’i o le mafaufau o lo o galue mo le falema’i o le LBJ na molimau e uiga i lenei mataupu, ma ia taua ai fa’afitauli o lo o mafua ai ona a’afia so’o lenei tama’itai i le tulafono, o le leai lea o se isi e fesoasoani ia te ia ina ia mautinoa e inu ana fualaau.

 

Na taua e le ali’i foma’i i lana molimau e fa’apea, e le o se nofoaga talafeagai le taofia o lenei tama’ita’i i le toese i Tafuna, e le mafai ona fesoasoani ai lea nofoaga i le inuina o ana fualaau, ae ina ua fesili Sunia i le ali’i foma’i pe le mafai ona ave le ua molia e taofia i le falema’i mo i latou e a’afia i le gasegase o le mafaufau, sa leai se tali a le ali’i foma’i, se’i vagana ai le lulu o lona ulu.

 

“Aisea e te tau mate mai ai le tali, lona uiga e le mafai ona taofia le tama’ita’i lea i le Falema’i mo i latou e a’afia i le gasegase o le mafaufau”, o le fesili lea a Sunia, ae na taua e le ali’i foma’i e fa’apea, “O le fa’afitauli o lo o tula’i mai i le Falema’i mo i latou e a’afia i le gaesgase o le mafaufau, e 10 potu o le falema’i fo’u le e lei leva ona tatala, ae na o le 4 potu o lo o mafai ona fa’aaoga e tausi ai i lato o lo o a’afia i lenei gasegase matuia”, o le molimau lea a le foma’i.

 

Na toe fesili le ali’i fa’amasino pe aisea e fa’aaoga ai na o potu e 4 ae 10 potu o le falema’i na fausia, na tali le ali’i foma’i, e na o le to’afa gasegase e mafai ona tausi ma vaaia e le aufaigaluega o lo o i ai, ona e le to’atele se aufaigaluega.

 

Na finau le loia fautua o lo o tula’i mo le tama’ita’i ua molia ina ia tatala o ia i tua, ae poloaina o ia ina ia nofo i lona tuagane ma fa’amaoni e inu ana fualaau, peita’i na finau le malo ina ia taofia pea lenei mataupu..

 

“O le taofia o se tagata e a’afia i le gasegase o le mafaufau i le falepuipui i Tafuna, o se gaioiga lea ua le tusa ma ala o le Fa’avae, ma e le tatau fo’i ona tupu lena fa’aiuga”, o le saunoaga lea a Sunia, ma ia poloaina ai loa le tatala i tua o le tama’ita’i na molia, e fa’atali ai lana iloiloga lea ua fa’atulaga mo le isi 2 vaiaso, aemaise ai o le poloaiga ina ia fa’amaoni e inu ana fualaau o le mafaufau.

Comment Here