SUNIA: Aua avea poloaiga fa’amasinoga ma itu soli ai tulafono

ausage@samoanews.com

Na fautuaina e le afioga i le ali’i fa’amasino ia Fiti A. Sunia le Tama lea na loka e Leoleo ina ua ia taumafai e fa’amata’u lona afafine ina ua le usita’i ia te ia, e le tatau ona avea poloaiga a le fa’amasinoga ua tu’uina atu fa’asaga i lona afafine ma auala na te soli ai le tulafono, poo le faia fo’i o ni isi gaioiga e fa’amata’u ma fasi ai lona afafine.

 

O se fa’alavelave na tula’i mai i le masina o Setema na te’a nei ina ua ‘ona atu le ua molia ma fa’alala se laau e sasa ai lona afafine ina ua le usita’i i le fa’atonuga sa tu’uina atu ia te ia, na mafua ai loa ona tu’uaia o ia e le malo i le moliaga mama o le fa’atupu vevesi i totonu o lona aiga.

 

O le taeao ananafi na ta’usala ai e le fa’amasinoga fa’aitumalo le Tama na molia i le moliaga o le fa’atupu vevesi i totonu o lona aiga, i lalo o se maliliega sa latou sainia ma le malo ma talia fo’i e le fa’amasinoga.

 

Ina ua fesiligia e le fa’amasinoga le ua molia i le mafua’aga o le fa’alavelave ua mafua ai ona ta’usala o ia, na taua ai e le ua molia e fa’apea, o se tasi o ona afafine, o loo faanofovaavaaia o ia i luma o le fa’amasinoga, ma o loo i ai tuutuuga ua mae’a ona tuuina atu e le fa’amasinoga e tatau ona usita’i ai lona afafine, e pei o le fa’asa lea ona ia alu ese mai le fale i le itula e 6:00 i le afiafi seia oo atu i le itula e 6:00 i le taeao.

 

O le aso na tula’i mai ai le fa’alavelave ina ua manava atu i le fale, sa ia iloa ai e le o i ai lona afafine i le fale, o le mafua’aga lea na alu ai loa e saili mai lona afafine ma fa’alala i ai le lala laau, ona o loo i ai lona talitonuga, o loo i ai lona aia fa’a matua e sasa ai lona afafine, ona o le poloaiga ua tu’uina atu e le fa’amasinoga.

 

“E fa’afetai atu le fa’amasinoga e tusa ai o lona taumafai e fa’atino lou tiute fa’amatua, e tusa ai o le poloaiga a le fa’amasinoga sa tu’uina atu i lou afafine, peita’i e fia fa’ailoa atu e le fa’amasinoga ia te oe, e le avea poloaiga a le fa’amasinoga e fa’ataga ai oe ona e soli le tulafono”, o le fautuaga lea a Sunia i le Tama na molia.

 

“Afai e toe i ai se isi fa’alavelave faapea e tula’i mai i lou afafine, fa’afesoota’i le Ofisa o Leoleo, poo se sui o le Ofisa o le Nofovaavaaia, poo se tasi lava fo’i e i ai le malosi e fetaia’i ai ma le mataupu, ae aua ne’i e toe taumafai e fa’atino le fa’aiuga o le mataupu i ou lava lima”, o le isi lea fautuaga a Sunia i le ali’i na molia.

 

O le lua vaiaso talu ai na tula’i mai ai fo’i se isi mataupu fa’apenei, ina ua molia se tama i le fa’atupu vevesi i totonu o le aiga, e mafua mai i lona taumafai e fa’atonu lona atali’i na maua ua le usita’i i le poloaiga a le fa’amasinoga mo lana nofovaavaaia, o le fa’asa lea ona ia tagofia le ‘ava malosi.

 

E 6 masina lea ua fa’anofovaavaaia ai e le fa’amasinoga le Tama na molia i lalo o poloaiga e ao ona ia usita’i i ai. O ni isi o ia poloaiga e aofia ai le fa’asa lea ona ia toe soli se tulafono, fa’asa ona ia toe tagofia le ‘ava malosi, ma ia aua fo’i ne’i ona toe faia ni gaioiga e fa’afefe pe fa’amata’u ai lona afafine.

 

Ua poloaina fo’i o ia ina ia aua ne’i ona toe tagofia le ‘ava malosi, a ia auai i aoaoga e fesoasoani ai i tulaga o le ita ma a’afiaga o le ‘ava malosi.

Comment Here