Ads by Google Ads by Google

SUNIA: Atonu ua tatau ona tatala se lala Fa’amasinoga i Manu’a


[ata: archive]
ausage@samoanews.com

“Atonu ua tatau ona tatala se lala o le Fa’amasinoga i Manu’a, ina ia mafai ai e le fa’amasinoga ona iloilo mataupu faapenei e afua mai i Manu’a, ma fa’asao ai tupe a tagata o le Manu’atele i le tau malaga mai i Tutuila e auai i a latou fa’amasinoga”, o le saunoaga fa’atupu manatu lea a le afioga i le ali’i fa’amasino ia Fiti Sunia i le taeao ananafi, i le taimi na tau fa’atulaga ai e le fa’amasinoga se taimi talafeagai e fa’ataunu’u ai le iloiloga autu o le mataupu fa’asaga i ni tagatanu’u se to’alua mai Manu’a ua i luma o le fa’amasinoga.

 

O lea mataupu, o le tagi lea a le afioga i le ali’i Senatoa ia Nuanuaolefeagaiga S. Nua fa’asaga i se ulugali’i mai Manu’a, o Sose ma Mauola Mauola, ina ia toe totogi atu ana meatotino o lo o la nofo aitalafu ai.

 

E pei ona fa’ailoa e Nua i luma o le fa’amasinoga i le taeao ananafi, e le gata o lo o nofo aitalafu le ulugali’i i ni isi o ana meatotino, ae fa’apena fo’i i lana manu papalagi (povi) na fasimate e Mauola ma fa’aaoga e aunoa ma le logoina atu o ia.

 

O Iuni 19, 2017 na fa’atulaga ai e le fa’amasinoga le mataupu i le va o Nua ma Mauola, ae talu ai e le i auai Mauola i luma o le fa’amasinoga, na toe tolopo mai ai loa i le taeao ananafi.

 

Na fa’amanino e le susuga a Mauola i le ali’i fa’amasino le mafua’aga na le o o atu ai i luma o le fa’amasinoga, ona o le tulaga le talafeagai o femalagaaiga mai Manu’a, ona o lea fa’atoa maua mai loa avanoa e malaga mai ai i le aso Lulu i le va’alele, ma le fa’amoemoe e auai i le iloiloga.

 

Na fesili Sunia ia Nua ma Mauola pe ua la sauni mo le iloiloga o lenei mataupu, ae na tali Mauola e fa’apea, e le i maua se la talanoaga ma le ali’i Senatoa, e le o malamalama fo’i o ia i le mafua’aga ua faila ai e le ali’i Senatoa lenei tagi fa’asaga ia te ia ma lona to’alua.

 

Ae na fa’ailoa e Nua i le fa’amasinoga e fa’apea, ua ia sauni mo le iloiloga, pau le itu o lo o ia fiamalamalama i ai, pe mafai e Mauola ona toe totogi atu tupe mo ana meatotino sa ia fa’aaogaina.

 

Na umi se taimi o taumafai Sunia e tau fa’atulaga se taimi talafeagai e fa’ataunu’u ai le iloiloga autu o lenei mataupu, ina ia taofia ai le alu o tupe a Mauola e toe fo’i ai i Manu’a ma tau toe malaga mai fo’i mo le aso o le iloiloga.

 

Sa tau fa’atulaga i le aoauli nei, sa tau toe fa’atulaga fo’i i le aso Gafua o le vaiaso fou, ae i le mae’a ai ona toe fetu’una’i e le fa’amasinoga o lana kalena atoa ai ma taimi avanoa o Nua ma Mauola, na manatu ai loa le fa’amasinoga e fa’atulaga loa le iloiloga autu o lenei mataupu i le taeao o le aso 7 Aokuso 2017 i le itula e 10:00.

 

Na taua e Mauola i le Samoa News e fa’apea, o le povi o lo o tu’uaia e Nua o ia na ia fasimate ma fa’aaoga, e le o se povi a Nua, ae o povi e ta’aloa solo i luga o atumauga o Manu’a, ma fa’aleaga ma’umauga ma meatotino a tagata.

 

Sa ia taua atili e fa’apea, talu ai le fa’aleaga e le povi o lana fa’atoaga, o lea na ia fa’alalo ai loa le povi (fana). Sa ia logoina se tasi o Matai taua o le afioaga e tusa ai ma le povi ua ia fasimate, ma fa’atonu ai loa e le Matai matua taulele’a e sae le povi ma fa’amama, ona fa’atoa tufatufa ai loa lea i aiga uma o le nu’u e fa’aaoga.

 

Na ta’utino Mauola i le Samoa News e fa’apea, e leai ma sana fasipovi na maua mai le taimi na tufa ai le povi mo le nu’u, a o lea ua tagi le ali’i Senatoa i le fa’amasinoga na te totogiina atu le $1,500 mo le tau o le povi sa ia fasimate.