Ua taoto nei i luma o le maota maualuga se i’ugafono soofaatasi, e aiaia ai se malosi o le Fono Faitulafono e fa’aleaogaina ai saini tete’e a le Kovana e aunoa ma se gaioiga a le Failautusi a le Initeria, ma suia ai le Vaega II, Maga 9 ma le Vaega II, Maga 19 o le Fa’avae Toe Teuteu a Amerika Samoa.

I le Vaega II, Maga 9 o le Fa’avae Toe Teuteuina a Amerika Samoa o lo o i ai, i le Faagaioia o tulafono atoa ai ma le teena, i le silia i le 14 aso talu ona teena e le Kovana se pili sa pasia e le Fono Faitulafono, e mafai ona fa’aleagaina o le teena lea i se palota fulisia a le 2/3 a sui uma lava o maota ta’itasi i soo se tauaofiaga a le Fono Faitulafono. O se pili e fa’apea ona faia, “o le a tu’uina atu i le Kovana mo lana fa’amaoniga”.

“Afai na te le fa’amaoniaina i totonu o le 15 aso, ona ia aumaia lea fa’atasi ma ana mafua’aga i le Failautusi o le Initeria. Afai e fa’amaonia e le Failautusi o le Initeria ona avea loa lea ma tulafoano i totonu o le 90 aso talu ona ia mauaina, a leai ona le faapenaina lea”.

I le suiga o le Fa’avae e pei ona atagia i le iugafono soofa’atasi lea ua i luma o le Senate, o le mae’a ai ona fa’aleaogaina e le Fono Faitulafono o le teena a le kovana e ala i se latou palota fulisia e 2/3 a maota taitasi i soo se tauaofiaga, “o le a avea ma tulafono i le 90 aso talu ona uma le malologa a le Fono lea sa toe pasia ai”, ae o le a le toe tu’uina atu i le Kovana mo lana fa’amaoniga

I le Vaega II, Maga 19 o le Fa’avae Toe Teuteuina a Amerika Samoa o lo o i ai, o lo o taua ai le tulaga lea, “o se tulafono e mana’omia ina ia fa’amaonia e le Failautusi o le Initeria na o ia pe a uma ona teena e le Kovana ma fa’amaonia fa’apena e aloaia e le itiiti ifo i le 40 aso talu ona toe fa’afoi atu i le Kovana e le Failautusi o le Initeria”, o le a aveesea uma lea vaega o le Fa’avae.

O le agaga o le suiga o le Fa’avae e pei ona fuafuaina, o tulafono uma e pasia e le Fono Faitulafono, e tu’uina atu i le Kovana mo lona fa’amaoniaina, ma o le a taualoa fo’i i le tuana’i ai o aso e 60 talu mai le tauaofiaga a le Fono na pasia ai lea tulafono, ae o le a le toe tu’uina atu se tulafono i le Failautusi o le Initeria e fa’amaonia mai ai.

Ua talosagaina ma le fa’aaloalo i totonu o lenei iugafono soofaatasi le afioga i le ali’i kovana, ina ia fa’aoo atu suiga o lo o fa’atu atu i totonu o lenei iugafono soofaatasi i le au palota a le atunu’u, i le palotaga tele aoao e sosoo ai i le masina o Novema 2018.

Ua fautuaina fo’i le tatau lea ona tu’uina atu se kopi o lenei iugafono soofaatasi i le afioga i le ali’i kovana ia Lolo Matalasi Moliga, fa’apea ai ma le Failautusi a le Ofisa o le Initeria ia Ryan Zinke.

O ni isi nei o suiga e pei ona taua soo e le afioga i le ali’i kovana i ana saunoaga, ina ia manatunatu toto’a i ai ta’ita’i o le atunu’u fa’apea tagatanu’u uma o Amerika Samoa, ina ia mamao le silasila i suiga lelei e manuia ai le faigamalo a Amerika Samoa i le lumana’i.

E talitonu le afioga i le ali’i kovana ma ni isi o ta’ita’i o le malo ma le atunu’u, ua o o i le taimi ua tatau ai lava e Amerika Samoa ona ia faia fa’aiuga e manuia ai ona lava tagata, ma ua i ai fo’i le tomai ma le agava’a i fanau a le atunu’u e avea ai i latou ma ta’ita’i o le malo i le lumana’i.