Ads by Google Ads by Google

Suesue pea Kruse fa’amaoni o ripoti mai le Ofisa o Femalagaaiga

ausage@samoanews.com

E le o mapu taumafaiga a le afioga i le Fa’amasino Sili ia Michael Kruse, i lona sailiili malie pea lea o ripoti e 2 na tu’uina atu e le Ofisa o Femalagaaiga i le Fa’amasinoga, pe fa’amaoni nei ripoti poo ni ripoti pepelo fo’i.

 

I totonu o ia ripoti, o lo o taua ai e le Ofisa o Femalagaaiga tagata e to’alua, o i latou ia o sponsors a le ali’i o Joeita Fa’aaliga, lea na ulufale mai i Amerika Samoa ia Aokuso 2012, ma nofo fa’asolitulafono ai lava i le teritori seia oo ina molia o ia i le tausaga e 2013 i moliaga o le talepe fale ma le gaoi, ma fa’aauau mai ai lava seia oo mai i le taimi nei.

 

O le masina o Fepuari na lau ai le fa’asalaga a le ali’i o Fa’aaliga, e pei ona poloaina ai e le fa’amasinoga o ia na te tuliina tausaga na fa’amalumalu o ana fa’asalaga ua mae’a ona tuuina atu, ina ua fa’amaonia lona le usitaia o poloaiga a le fa’amasinoga sa tu’uina atu na te tausi ma usita’i i ai.

 

Ae o le iloiloga sa faia i le aso Faraile na te’a nei a Fa’aaliga, o le talanoaina lea o le mataupu e fa’atatau i ripoti mai le Ofisa o Femalagaaiga, lea o lo o taua ai ana sponsors e to’alua.

 

O molimau na aami e le fa’amasinoga e aofia ai le Loia Sili ia Talauega Eleasalo Ale atoa ai ma le Pulesili o le Ofisa o Femalagaaiga ia Peseta Dennis Fuimaono.

 

A o le i valaau e le fa’amasinoga le afioga a Peseta i luga o le nofoa molimau, na fa’atonu e Kruse le Pulesili o le Ofisa o Fa’anofovaavaaia, susuga Malcolm Polu ina ia aga’i i luga o le nofoa molimau ma fa’amatala mai i le fa’amasinoga le ata atoa o le mataupu a Fa’aaliga, e aofia ai le mataupu lea ua faamoemoe le fa’amasinoga e iloilo i le vaiaso na te’a nei.

 

I le mae’a ai o le molimau a Polu, na valaauina ai loa Peseta e tula’i i luga o le nofoa molimau. Na fesili le afioga a Kruse ia Peseta pe na alu atu ma avatu le faiila a Fa’aaliga sa fa’atonuina ai o ia e le fa’amasinoga, na tali Peseta ioe.

 

Na toe fesili Kruse poo mafai e faamaumauga o lo o i totonu o le faila ona tali ai le fesili i le mafua’aga e 2 ai sponsors a Fa’aaliga, na tali Peseta e leai.

 

“Sei e tago e fa’amatala mai pe aisea”, o le fesili lea a Kruse ia Peseta. Na taua e Peseta e fa’apea, na mafua ona eseese fa’amatalaga na tuuina mai i totonu o ripoti a lua a lona Ofisa, ona e sese le sipelaina o le igoa o Fa’aaliga na tuuina atu e le Ofisa Faanofovaavaaia.

 

Na taua e Peseta e fa’apea, o le igoa sa avatu e le Ofisa Faanofovaavaaia, o JOEITA, ae o le igoa sa maua i fa’amaumauga a le Ofisa o Femalagaaiga, o JOITA.

 

E le i talia gofie e le afioga i le ali’i fa’amasino le molimau a Peseta. Na toe fesili Kruse pe aisea na ia sainia ai ripoti e lua na tuuina atu i le fa’amasinoga pe afai na ia iloa o lo o sese le sipelaina o le igoa, ae na saunoa Peseta, e na o le tasi le ripoti sa ia sainia, e na o le ripoti o lo o sa’o ai le sipelaina o le igoa, o le isi ripoti na saini e le sui o lona Ofisa.

 

Na toe fesili Kruse ia Peseta pe na te silafia e le tatau ona fa’alauiloaina fa’amaumauga o lo o i totonu o le faila a Fa’aaliga, na tali Peseta ioe.

 

“Ae aisea la na e fa’alauiloa fa’alaua’iteleina ai le faila”, o le fesili lea a Kruse. E leai se tali a le afioga a Peseta i lea fesili.

 

AMATAGA O LE MATAUPU A FA’AALIGA:

 

O le aso 21 Iuni 2013 na ta’usala ai e le fa’amasinoga maualuga ia Fa’aaliga i le moliaga o le talepe fale i le tulaga muamua atoa ai ma le talepe fale i le tulaga lua, ma poloaina ai loa o ia na te tuliina masina e 40 i le toese, o se tasi lea o tuutuuga o lana nofovaavaaia e 7 tausaga.

 

A o tuli ai lana fa’asalaga i le toese, na faila e le malo isi moliaga faaopoopo faasaga ia Fa’aaliga i le aso 8 Mati 2014, e mafua mai i se solitulafono sa ia fa’atinoina a o lei tupu le solitulafono lea ua fa’a falepuipui ai o ia.

 

Na ta’usala e le fa’amasinoga maualuga ia Fa’aaliga i le moliaga o le gaoi, ma poloaina ai loa o ia na te tuliina masina e 28 i le toese i Tafuna, o se tasi lea o tuutuuga o lana nofovaavaaia e 7 tausaga, ma o le fa’asalaga fa’atoa tuli pe a mae’a ona tuli lana fa’asalaga e 40 masina i le toese.

 

I le 2016, na faila ai e le malo mataupu tau solitulafono e 2 fa’asaga ia Fa’aaliga, e mafua mai i taimi na ia sola ese ai mai le toese a o tuli ai lana fa’asalaga.

 

O le mataupu muamua na molia ai o ia i le sola i tua mai le toese atoa ai ma le gaoi, e mafua mai i le fa’alavelave lea na ia fao fa’amalosi ai le ato tupe a se Tina sa nofonofo i totonu o lana ta’avale i luma o le Ofisa o le Pulega o le Eletise ma le Suavai i Tafuna. Na fa’amaonia e le fa’amasinoga moliaga o le gaoi ma le sola ese mai le falepuipui, ma fa’asala ai Fa’aaliga i le toese mo le umi e 12 tausaga.

 

O le mataupu lona lua na molia ai Fa’aaliga i le moliaga o le gaoi, e mafua mai i le fa’alavelave lea na ia sola ai i tua ma gaoi se tupe mai totonu o se faleoloa e tusa ma le $1,500. Na ta’usala o ia e le fa’amasinoga i le gaoi ma poloaina ai loa lona tuliina o le umi e 7 tausaga i le toese.

 

O le fa’asalaga a Fa’aaliga e 7 tausaga e fa’atoa tuli pe a uma ona tuli lana fa’asalaga e 12 tausaga.

 

Ina ua talosagaina e le Ofisa Faanofovaavaaia ripoti mai le Ofisa o Femalagaaiga e fa’atatau i le faila a Fa’aaliga i le 2013 ma le 2014, sa maitauina ai le eseese o fa’amaumauga sa tuuina atu e le Ofisa o Femalagaaiga i le fa’amasinoga i ripoti e lua sa tuuina atu. E le gata e eseese aso o lo o taua na ulufale mai ai Fa’aaliga i le atunu’u, ae eseese fo’i igoa o sponsor.

 

O le mafua’aga lena na fa’atulaga ai loa e le fa’amasinoga le iloiloga e pei ona valaauina i le aso Faraile na te’a nei, se’i fesiligia ai le moni o ripoti a le Ofisa o Femalagaaiga.