Ua tauaao e le afioga i le Loia Sili a le malo se tusi fa’asea mai se tagatanu’u, fa’asaga i le fa’aaoga le tatau e ni ali’i Leoleo sinia se to’alua o lo la malosi i lalo o le tulafono, e faia ai uiga ma lafoga e ono taomia ai i lalo ona aia fa’aletulafono.

O le masina na te’a nei na tauaao atu ai e le tama’ita’i sa tusia lenei tusi le kopi o lana tusi i le afioga i le ali’i loia sili ia Talauega Eleasalo Ale, ma ia tofia ai se tasi o loia lagolago mai lona Ofisa na te su’esu’eina lenei mataupu. Sa faapea fo’i ona tauaao atu e le tama’ita’i le kopi o lana tusi i le Ofisa o le Komesina.

O le autu o le tusi fa’asea, o loo talosagaina ai e le tama’ita’i na tusia le tusi le tatau lea ona faia se suesuega fa’asaga i le auala sa fa’atino ai e ali’i Leoleo sinia e to’alua le la galuega i le aso na tula’i mai ai se fa’alavelave sa a’afia ai le tama’ita’i na tusia le tusi, o lona uso, ma se ali’i leoleo sinia sa laei savili i le aso na tula’i mai ai le fa’alavelave.

E pei ona taua i le tusi, o le fa’alavelave na tula’i mai i le vaega e paka ai ta’avale i le Kolisi Tuufaatasi i Mapusaga, ina ua fa’asea le ali’i leoleo sinia sa laei savili e ala i le fa’aee o le pu o lana ta’avale, ina ua poloka e le ta’avale a le tama’ita’i na a’afia le auala.

Na faamanino e le tama’ita’i sa tusia le tusi i totonu o lana tusi e faapea, e lei poloka e lana ta’avale le auala, sa lava ma tele le avanoa e ui ane ai le ta’avale a le ali’i leoleo sa laei savili, peita’i, sa fa’aauau pea ona fa’aee le pu o lana ta’avale, ma avea ai ma itu na tula’i mai ai lagona le fiafia ia te ia, ma ia faia ai loa se gaioiga e ala i le tuu atu i ai o lona lima ogatotonu.

O le le fiafia o le ali’i leoleo sa laei savili i le gaioiga a le tama’ita’i na tusia le tusi, na mafua ai loa ona ia valaauina ta’avale Leoleo e taofi le ta’avale a le tama’ita’i lea.

Na taua e le tama’ita’i na tusia le tusi e fa’apea, o luma o le paka i Fagaalu na taofi ai e Leoleo lana ta’avale e aunoa ma se mafua’aga tatau. Sa ia fesiligia Leoleo i le mafua’aga na taofi ai lana ta’avale, peita’i e foliga mai e le o malamalama tonu Leoleo i le mafua’aga na latou taofia ai lana ta’avale, se’i vagana ai lo latou fa’apea atu ia te ia, o le fa’atonuga mai le Leoleo sinia na mafua ai ona taofi lana ta’avale.

Na fa’ai’u le mataupu i totonu o le ofisa autu o Leoleo i Fagatogo. O iina lea o loo taua e le tama’ita’i na tusia le tusi, na alu atu ai le isi ali’i Leoleo sinia, o ia fo’i o se Kapeteni ma soona lafo atu ni fa’aupuga ia te ia ma lona uso, ma folafola le loka o ia ona o lona le fa’aaloalo i le ali’i Leoleo sa laei savili.

Na taua e le tama’ita’i i lana tusi e fa’apea, e talitonu o ia e fa’aituau le faaiuga a le ali’i Leoleo Kapeteni sa faia i le aso lea, i lona lafo o tala ma folafolaga malolosi ia te ia ma lona uso, ae leai sana tala na fai i le Leoleo sa laei savili i le mafua’aga na ala ai ona ia valaauina Leoleo e taofi le ta’avale a le tama’ita’i i luga o le auala.

E talitonu le tama’ita’i lenei, ua fa’aaoga sese e ali’i Leoleo nei e toalua lo la malosi i lalo o le tulafono e faia ai nei uiga le talafeagai ia te ia ma lona uso, ma e tatau ona i ai se faaiuga talafeagai e faia ia tei laua.