Ads by Google Ads by Google

Su’ifefiloi lagona tagata faigaluega i le tulafono mo totogi amata


Se vaaiga i ni isi o tagata faigaluega mai le Samoa Tuna Processors a o le i tapunia lana tautua i le fa’aiuga o le tausaga na te’a nei. [ata AF]
ausage@samoanews.com

E su’ifefiloi finagalo fa’aalia mai ni isi o le mamalu o le atunu’u o lo o galulue i le kamupani i’a a le StarKist Samoa, ina ua fesiligia i latou e le Samoa News e fa’atatau i le tulafono taufa’aofi lea ua fa’aulu e le Faipule i le Laumua i Uosigitone e Fa’atumauina ai Pisinisi i Amerika Samoa, ae faia ai suiga i le tulafono na pasia e le Konekeresi i le 2007 e taua o le “Fair Minimum Wage Act of 2007”.

 

O ni isi o tagata faigaluega sa fesiligia i lenei mataupu, sa latou fa’afetaia taumafaiga uma o lo o galue malosi i ai le tofa Aumua Amata ma lona Ofisa, i le sailiina lea o auala e fa’amautu atili ai kamupani i’a i totonu o Amerika Samoa, e ala i le faia o suiga i le tulafono e fa’atonutonu ai le si’itia pea i luga o totogi amata e pei ona pasia e le malo tele, peita’i sa taua e ni isi lo latou naunau pea ina ia fa’aauau si’itaga o totogi amata ina ia ausia le tulaga o lo o i ai totogi i Amerika, ina ia fesoasoani ai i le lima vaivai o tagata atoa ai ma le maualuga ua i ai le tau o le tamaoaiga i le atunu’u.

 

“E taua tele le tulafono lea ua fa’aulu e Aumua i le Konekeresi, e le gata e fesoasoani ai i le fa’atosinaina mai o pisinisi fou i le atunu’u, ae mafai ai fo’i ona saga fa’atumau pisinisi tuai o lo o i ai aemaise lava i kamupani i’a o lo o tua i ai le malo ma le to’atele o tagata e i ai lo’u aiga”, o le saunoaga lea a le Tina ia Maletina Amituana’i.

 

Saunoa Amituana’i e fa’apea, na te matua lagolagoina le tatau lea ona si’i i luga totogi amata i le teritori, peita’i e leai se taua o nei taumafaiga uma ae emo ane le ata ua tapunia ai galuega.

 

“Ou te naunau ia si’i le totogi amata, ina ia maualuga lo’u totogi ma maua ai se isi tupe fa’asili mo maua ma le fanau, ae afai o nei taumafaiga uma ina ia sii lo’u totogi amata e i’u ina tapuni ai ma le kamupani ma le toe maua sa’u galuega, e sili atu ai loa le talia o le totogi ua maua i lenei taimi”, o le saunoaga lea a Amituana’i na lagolagoina e le susuga a Fred Viliamu.

 

Na taua e Viliamu lona mana’o ia oo i le $7 i le itula le totogi maualalo, ae afai e afaina ai galuega ma tapuni ai kamupani i’a ma pisinisi i lea taumafaiga, e sili ai pe a vaavaai le malo i se isi auala e mafai ai ona fa’atumau pisinisi i le atunu’u.

 

“Ou te fa’afetaia taumafaiga a Amata e pei ona i ai le tulafono lea ua ia fa’aulu i le fono a le malo tele, e toe tu’u mai ai le iloiloina o totogi amata i Amerika Samoa, talosia ae talia e tama papa’e lena taumafaiga”, o le saunoaga lea a Viliamu.

 

O le to’atele o isi tagata faigaluega na fesiligia e le Samoa News, sa latou lagolagoina le manatu ina ia toe tu’u mai i Amerika Samoa le iloiloina o totogi amata, sei vagana ai ni isi sa fa’aalia o latou lagona e fa’atatau i le taua o le si’itia o le totogi amata i Amerika Samoa.

 

“E taua le si’i i luga o le totogi amata, e le taitai fa’atusatusaina totogi o i matou o lo o galulue i le kamupani i’a ma totogi o le to’atele o tagata faigaluega i Amerika Samoa, e le gata i lea, ua molimauina fo’i le maualuga o le tulaga ua i ai le tau o oloa i le atunu’u, e mafua mai i le tele o isi totogi fou ua fa’aee e le malo i le aufaipisinisi, ma manatu ai loa le aufaipisinisi e toe fa’ae’e mai nei totogi i luga o oloa ma atili ai lava ona pagatia tagata lima vaivai”, o le saunoaga lea a Leilua Apulu.

 

O le vaiaso nei na fa’aulu ai e Aumua i luma o le Konekeresi se tulafono taufa’aofi e fa’aulutalaina, “Puipuia ma le Fa’alauteleina o Galuega i Amerika Samoa”, ma o lea tulafono taufa’aofi e pei ona taua e Aumua i se pepa o fa’amatalaga, o le a matua fesoasoani atili ai lea i le fa’atumauina atoa ai ma le fa’atosinaina mai o pisinisi fou i le teritori.

 

“O se taimi umi na tu’uina ai e le malo feterale ia Amerika Samoa i le tulaga o tauiviga o le atina’e o le tamaoaiga ma tutusa ai ma setete, ma ua mafua ai ona tutupu le tele o tulaga eseese i le fa’atosinaina mai o pisinisi fou i le atunu’u, ma avea ai ma mafua’aga e tapunia ai ma o ese isi pisinisi mai le teritori”, o se vaega lea o le saunoaga a Amata.

 

O le tulafono taufa’aofi a Aumua o le a suia ai le tulafono na pasia e le feterale i le 2007, ina ia mafai ai ona toe fa’afo’i le tulaga sa iloiloina ai totogi i Amerika Samoa a o le i pasia e le feterale lana tulafono.

 

O le iloiloga o le totogi amata i Amerika Samoa, sa gafa ma se Komiti Fa’apitoa i lalo o le fa’amalumaluga a le Matagaluega o Leipa a le malo tele, lea e mafai ai e kamupani i Amerika Samoa ona fa’atumauina pea tulaga tutusa o faiga fa’atauva ma pisinisi i fafo, lea e le o fa’atulagaina ai ni totogi amata.

 

Na taua e Amata le silafia lelei lea e o tatou tagata o le taua o le fa’atumauina o kamupani i’a i le atunu’u, ina ia fesoasoani ai i le atina’eina o lo tatou tamaoaiga.