Ads by Google Ads by Google

Solofua Fa’amasinoga moliaga sa tu’uaia ai Titifalaula Siaumau


[ata: archive]
ausage@samoanews.com

Ua solofua e le Fa’amasinoga Fa’aitumalo moliaga mamafa sa tu’uaia ai e le malo le ali’i o Titifalaula Siaumau, i le mae’a ai lea ona talia e le afioga i le ali’i fa’amasino ia Fiti Sunia o se talosaga sa fa’aulu e le loia a le malo ia Jerald Murphy, mo se avanoa e solofua ai moliaga sa faila fa’asaga i le ali’i ua molia ma le fa’amoemoe e toe faila e le malo lana tagi fa’asaga i lenei mataupu i se taimi o i luma.

 

O Siaumau o lo o tu’uaia i le moliaga mamafa o le umia fa’asolitulafono o vaega o le laau fa’asaina o le mariuana, atoa ai ma le isi moliaga o lona fesoasoani lea i se isi tagata e fa’atino le solitulafono o le umia fa’asolitulafono o vaega o fualaau fa’asaina o le mariuana.

 

O le mataupu e pei ona tu’uaia ai Siaumau na alia’e mai i le mataupu lea na maua ai se vaega o fualaau fa’asaina o le mariuana sa aumai fa’anana i totonu o se speaker sa aumai i se fa’amomoli mai fafo, lea na aumai i le uta i le malae vaalele i Tafuna.

 

E pei ona taua i fa’amaumauga a le fa’amasinoga, o le afifi sa fa’atuatusi mai i le igoa o se tagata faigaluega a le kamupani la’u uta o le CSL Cargo Services, le susuga ia Felix Bavarosa, ma e tusa ma le 5 pauna le mamafa o vaega o mariuana o lo o tu’uaia na aumai fa’anana i totonu o le speaker.

 

E 2 molimau sa fuafua le itu a le malo e valaau i le taimi o le ulua’i iloiloga a Siaumau i le taeao ananafi, ae o le mae’a ai ona fesiligia o le ulua’i molimau a le malo ia Bavarosa, e loia a itu e lua, na poloaina ai loa e Sunia loia a itu e lua mo sa latou talanoaga puupuu i luga o le laulau a le ali’i fa’amasino.

 

O le mae’a ai o le talanoaga puupuu a loia ma fa’amasino, na fa’aulu ai loa e le loia a le malo ia Murphy le mau ina ia solofua le tagi sa latou fa’aulu fa’asaga ia Siaumau, ina ia mafai ai ona toe tu’u atu le avanoa i le malo latou te toe failaina ai la latou tagi fa’asaga ia Siaumau i se taimi o i luma, lea fo’i na ioe i ai le loia a Siaumau ia Sharron Rancourt ma talia loa e le fa’amasinoga.

 

O le susuga a Bavarosa ma le ali’i leoleo su’esu’e ia Det. John Paselio, o molimau ia sa fuafua le malo e valaau i le iloiloga ananafi.

 

O le amataga o le mataupu lenei e pei ona manino i le molimau a Bavarosa, na amata mai ina ua talanoa atu Siaumau ia te ia i lona Ofisa, o lo o i ai sana afifi o loo fia aumai mai Amerika, o se speaker e fa’aaoga mo ia.

 

O Bavarosa ua silia i le 3 tausaga o galue i le CSL i Tafuna, ma o ni isi o vaega o ona tiute fa’atino o le pikiina mai lea o uta a le kamupani mai le malae va’alele i Tafuna pe a taunu’u le va’alele o le Hawaiian Air, e le gata o uta a le kamupani ae aofia ai fo’i ma uta a tagata lautele o le atunu’u.

 

Talu ai o le pisi o Bavarosa i lana galuega atoa ai ma lona manatu e fa’a faigofie le auala e uia e Siaumau mo le aumaia o le afifi o loo aumai ai lana speaker mai fafo, na ia malie ai loa e tusi lona igoa i le fa’amomoli a Siaumau pe a aumai, e ui e le tusa ai ma faiga fa’avae a le kamupani, ae sa ia manatu e fa’a faigofie lea tulaga mo Siaumau.

 

A o fa’atalitali ai Bavarosa ma Siaumau i le taimi e taunu’u mai ai le afifi mai fafo, sa masani ona fesootai i laua i le telefoni, mo le fa’amautuina o tulaga uma e uiga i le afifi. E lei faigaluega Bavarosa i le po na taunu’u mai ai le afifi, ae o isi sui o le latou kamupani na o e piki mai le uta, ae taofia ai e sui o le Ofisa o Tiute le afifi sa fa’atuatusi mai i le igoa o Bavarosa ina ua masalomia, ma fa’afesootai ai loa e tagata faigaluega a Bavarosa o ia e tusa ai o le fa’aletonu, ma ia alu ai loa i le malae va’alele i le po lava lea.

 

Na taua atili e le molimau i lana fa’amatalaga le taimi na siaki ai e sui o le Ofisa o Tiute le afifi ma maua ai le speaker, ae o totonu o le speaker sa maua ai mariuana. Ina ua fesiligia e Leoleo ia Bavarosa e uiga i lenei mataupu, sa ia fa’amatala atoa i ai le auala na mafua ai ona tusia lona igoa i luga o le afifi sa aumai.

 

Ina ua fesiligia e Rancourt ia Bavarosa pe sa ia iloaina fualaau fa’asaina sa aumai i totonu o le speaker, na tali le molimau e leai. Na toe fesiligia o ia e Rancourt pe sa talanoa atu Siaumau e fa’atatau i fualaau fa’asaina o loo aumai i totonu o le speaker, na tali le molimau e leai.

 

Ae ina ua toe fesiligia e Rancourt ia Bavarosa poo molia o ia e le malo i le mataupu lenei, na tali le molimau e leai, pau le tulaga lea ua ia malie i ai, o le a ia molimau ma le fa’amaoni mo le itu a le malo e tusa ai o le mea sa tupu.