Ads by Google Ads by Google

Solofua Fa’amasinoga le moliaga mamafa fa’asaga ia Jane Vasa


Jane Vasa [ata AF]
ausage@samoanews.com

Ua solofua e le afioga i le ali’i Fa’amasino ia Fiti Sunia le moliaga mamafa o le faia o gaioiga tau fa’asese sa tu’uaia ai e le malo ia Jane Vasa, lea o lo o tu’uaia i le mataupu e pei ona alia’e mai i le Matagaluega o Tautua ma Auaunaga Lautele (DHSS), i le fa’aaoga fa’asolitulafono o pepa ‘ai mai le polokalame a le Food Stamp.

 

O Vasa, o le isi lea e to’atolu i ai i latou o loo molia e le malo i le mataupu o faiga fa’aalatua i le Matagaluega a le DHSS. O isi e to’alua e aofia ai Vincent Toeava ma Liren Zhang poo Kevin e pei ona iloa ai e le to’atele.

 

O le taeao o le aso Lua na te’a nei na fa’atulaga e faia ai le ulua’i iloiloga a Vasa i luma o le ali’i Fa’amasino ia Sunia.

 

Ina ua valaau le mataupu a Vasa, na fa’ailoa e le loia a le malo ia Woodrow Pengelly, le leai o ni molimau ua sauni le malo e valaau e lagolago ai mau o le latou tagi fa’asaga ia Vasa.

 

Talu ai e le i valaauina e le malo sa latou molimau i le taimi o le ulua’i iloiloga a Vasa, na tuuina mai ai loa le fa’aiuga a le afioga a Sunia, e solofua ai le moliaga mamafa e tasi sa tu’uaia ai Vasa e le malo.

 

O le moliaga o le faia o faiga fa’aalatua sa tu’uaia ai e le malo ia Vasa ao lea ua solofua e le Fa’amasinoga, o se solitulafono C lea i le fa’atulagaina o solitulafono mamafa, lea e mafai ona fa’asala ai se tasi i le toese mo le umi e le silia i le 7 tausaga, pe fa’asala foi i le salatupe e le silia i le $5,000, poo le fa’asala fo’i i fa’asalaga uma ia e lua.

 

O se tasi o vaega o le gaioiga a le malo e le valaauina sa latou molimau i le ulua’i iloiloga a Vasa, o le latou failaina lea o le moliaga fou fa’asaga ia Vasa, le moliaga mama o le gaoi.

 

Ina ua fesiligia e Sunia ia Vasa poo le a lana tali i le moliaga mama o le gaoi lea ua molia ai o ia e le malo, na tali le ua molia na te ioeina le moliaga ua faila fa’asaga ia te ia.

 

Na talia e Sunia le tali ioe a Vasa e tusa ai o le moliaga mama o le gaoi e pei ona ta’usala ai o ia e le fa’amasinoga, ma fa’atulaga ai loa le aso 27 Aperila 2018 i le itula e 8:30 i le taeao e lau ai lana fa’asalaga.

 

O lo o tumau pea le tatalaina i tua o Vasa e fa’atali ai le aso lea ua fa’atulaga e lau ai lana fa’asalaga.

 

Ae tusa ai o le tagi a le malo, o lo o taua ai le tulaga lea e fa’apea, ina ua fesiligia e Leoleo ia Vasa i le aso 16 Ianuari 2018 e uiga i lenei mataupu, sa ia taua ai e fa’apea, i se taimi o le masina o Tesema 2017, na alu atu ai Toeava ma fai atu ia te ia, pe mafai ona ia avatua se pusa o lo o i ai kopi o pepa ‘ai a le Food Stamp se’i fesoasoani ai i le faiga o ana pepa mo le galuega (business card).

 

Na taua e Vasa i Leoleo lona musu e talia le talosaga a Toeava, peita’i mulimuli ane, sa ia taliaina ma ia tuuina atu ai loa le pusa e pei ona ia talosagaina. O le vaiaso na sosoo ai na ave ai e Toeava le $4,000 ia Vasa e tusa ai o lona taliaina o lona mana’o.