Ua solofua e le afioga i le ali’i Fa’amasino ia Fiti Sunia o le Fa’amasinoga Fa’aitumalo le moliaga mamafa e tasi na tu’uaia ai e le malo Sio Godinet Jr, ina ua le mafai e le malo e ala i mau sa latou tuuina atu i luma o le fa’amasinoga, ona lagolagoina tu’uaiga sa fa’asaga i lenei ali’i.

Na tu’uaia e le malo ia Godinet Jr i le moliaga mamafa o le umia fa’asolitulafono o vaega o le pauta fa’asaina o le aisa (methamphetamine) - o se solitulafono e mafai ona fa’asala ai se tasi i le toese mo le umi e le mafai ona itiiti ifo i le 5 tausaga, poo le fa’asala foi i le salatupe e le mafai ona itiiti ifo i le $5,000 - poo le fa’asala fo’i i fa’asalaga uma ia e lua.

O tu’uaiga fa’asaga ia Godinet Jr na alia’e mai ina ua taofi e Leoleo mai le Vaega Fa’apitoa a le Ofisa o Leoleo o lo o sailia fualaau fa’asaina, le ta’avale a le ua molia i le aso 5 Setema 2017, ina ua maitauina se moli emoemo na fa’apipi’i e le ua molia i le laisene pito i tua o lana ta’avale, ae le tusa ai ma tulafono tau ta’avale afi.

Na tu’uaia e le malo le maua e Leoleo i tua o le nofoa sa nofo ai le ua molia se paipa e fa’aaoga e ula ai fualaau fa’asaina. I totonu o lea paipa sa i ai vaega o le pauta pa’epa’e. Na faia se suega i lea pauta ma fa’amaonia ai, o vaega ia o le pauta oona o le aisa.

E to’alua molimau na valaau e le malo i le taimi o le ulua’i iloiloga. O ia molimau o ni ali’i Leoleo uma mai le Vaega Faapitoa a Leoleo o lo o sailia fualaau fa’asaina i le atunu’u, e pei o le susuga ia Alwin Sorensen ma Det. John Seumanutafa.

O le tama’ita’i loia sili lagolago ia Kristy Dunn sa tula’i mo le itu a le malo, ae o le tama’ita’i loia fautua ia Kate Hannaher sa tula’i mo Godinet Jr, lea na toe tatala ai lava i tua mai le toese i Tafuna i le vaiaso na te’a nei - ina ua solofua e le Fa’amasinoga le moliaga e tasi sa tu’uaia ai o ia le malo.

Na taua e Sorensen i lana molimau e fa’apea, a o fa’agasolo le poloka masani a le Vaega Faapitoa a Leoleo e sailia fualaau fa’asaina i le aso 5 Setema e pei ona taua, sa fa’afuase’i ona latou vaaia le ta’avale a le ua molia o lo o aga’i atu i luga o le auala, ma se moli emoemo o lo o fa’apipi’i i le laisene pito i tua o lana ta’avale.

Na finau le malo e faapea, e le fa’atagaina i lalo o tulafono tau ta’avale le i ai o ni isi lava moli emoemo e fa’aopoopo i le tino o le ta’avale, sei vagana ai moli na fa’atau fa’atasi mai ma le ta’avale.

O le mafua’aga lea na taofi ai loa e Leoleo le ta’avale a Godinet Jr, ma talosaga i ai e sau i fafo ma lana ta’avale.

A o talanoa atu Leoleo e fa’amalamalama ia Godinet Jr le mafua’aga ua taofia ai lana ta’avale, o le taimi lea na fa’aaoga ai e Leoleo a latou ta’ifau e sosogi solo ai i le tino o le ta’avale, ma fa’ailoa atu ai loa e le ta’ifau i Leoleo gaioiga e iloa ai, o lo o masalomia le i ai o fualaau fa’asaina i totonu o le ta’avale, ma maua ai loa ma le avanoa o Leoleo e su’e ai le ta’avale.

O tua i le nofoa o le ave ta’avale lea na nofo ai le ua molia i le taimi na taofi ai e Leoleo lana ta’avale, na tu’uaia ai e Leoleo lo latou maua o se paipa e fa’aaoga e ula ai fualaau fa’asaina. I totonu o lea paipa e pei ona taua e le malo - o lo o i ai vaega o le pauta fa’asaina o le aisa.

Na taua atili e le ali’i Leoleo ia Sorensen i lana molimau e fa’apea, e 3 ta’avale leoleo sa i ai i le taimi o le osofaiga, to’a 6 leoleo ma le ta’ifau e tasi.

Na fesili le loia a le malo ia Dunn, e fa’amatala le mafua’aga na ala ai ona taofi e leoleo le ta’avale a Godinet Jr, atoa ai ma le mafua’aga na fa’atonuina ai o ia e alu i fafo ma lana ta’avale.

Na taua e Sorensen i lana molimau e fa’apea, o faiga masani i le faatinoina o galuega a leoleo, e pei o le taofia lea o ta’avale e le usitaia tulafono o ta’avale afi i luga o le aualatele, aemaise ai le puipuiga o le saogalemu o le ave ta’avale i le taimi e taofia ai e Leoleo lana ta’avale, o ni isi uma ia o gaioiga sa fa’atinoina i le taimi na taofia ai le ta’avale a Godinet Jr.

Ina ua maua le avanoa o le loia a Godinet Jr e fesiligia ai le molimau, na taula’i ai ana fesili i le mafu’aaga tonu na ala ai ona taofia e Leoleo le ta’avale a le ali’i na molia, atoa ai ma le mafua’aga na fa’aaoga ai e Leoleo a latou ta’ifau i le taimi na taofia ai le ta’avale.

Na fa’amanino atili e Sorensen e fa’apea, e tasi lava le mafua’aga na ala ai ona taofia le ta’avale a le ua molia, ina ua vaaia lona le usitaia o tulafono tau ta’avale afi i luga o le alatele.

E ui i le molimau a le ali’i Leoleo, na fa’aalia manino e Hannaher i lana fa’afinauga i le fa’amasinoga e faapea, e tasi lava le mafua’aga na taofi ai e Leoleo le ta’avale a Godinet Jr, o le sailiina lea o fualaau fa’asaina. O le mafua’aga fo’i lea na fa’aaoga ai e Leoleo a latou ta’ifau.

O le autu atoa o le ulua’i iloiloga lea e fa’agasolo i luma o le Fa’amasinoga Fa’aitumalo e pei ona saunoa Sunia, o le iloilo lea e le Fa’amasinoga o mau a le malo, pe lava ma totoe e lagolago ai tu’uaiga ua soli le tulafono, ae poo Godinet Jr fo’i lea o lo o tu’uaia i le soliina o le tulafono.

I le mae’a ai ona iloilo e Sunia o mau uma na folasia e le malo, na tu’uina mai ai loa lana fa’aiuga e solofua ai le tagi sa faia fa’asaga ia Godinet Jr, ona e le i lava mau a le malo e lagolagoina ai le latou tagi sa fa’aulu fa’asaga i le ua molia.