Ads by Google Ads by Google

Sola le Fuao mai Vatia ma le siamupini tuuga fautasi 2018


Le siamupini o tuuga fautasi o lenei tausaga 2018, Fuao mai Vatia [ata AF]
ausage@samoanews.com

E ui o lea ua aloaia le faaiuga o le tuuga fautasi mo le fu’a o lenei tausaga, e pei ona sola ai le Fuao mai Vatia ma le siamupini o le fu’a o lenei tausaga 2018, ina ua sili lana taimi e ‘27.56’, peita’i na taua e le afioga i le Malu a le Fale, le afioga i le ali’i Senatoa ia Faiivae Iuli Godinet e fa’apea, o le auala na fa’ataunu’u ai le tuuga o lenei tausaga, na faia ina ia faamalie ai le Komiti ae taoto ai finagalo o nu’u ma afioaga.

 

O le saunoaga lea a Faiivae na tuuina atu i le fonotaga mulimuli a le Komiti o Tuuga Fautasi ma Kapeteni o Sa na tausinio i le tuuga, lea na faia ina ua mae’a tuuga e 2 sa faia i le aso Gafua o le vaiaso lenei.

 

“Atonu e le toe suia le faaiuga a le Komiti ua tuuina mai i le faaiuga o le tuuga, ae i lo’u lava taofi, o le tuuga o lenei tausaga sa faia ina ia fa’amalie ai le finagalo o le Komiti, ae ua taoto lava finagalo o nu’u ma afioaga sa taumafai mai ai lenei fa’amoemoe”, o le saunoaga lea a Faiivae.

 

“E le taugofie le tausiga o auva’a i masina na taumafai mai ai lenei fa’amoemoe, sa taumafai fo’i le afioaga ina ia amata mai le tuuga mai le mamao masani ai, ae paga lea, ua faia lava le finagalo o le Komiti”, o le saunoaga lea a Faiivae.

 

Na faasea le afioga i le ali’i Senatoa i le le usitaia e le Sa mai le afioaga o Aua o le laina sa tatau ona tausinio ai i le amataga o le tuuga. Sa ia taua fo’i e fa’apea, e pa le fana e amata le tuuga e lei sauni lona Sa.

 

“O le a matou fo’i ma le le malilie o matou loto ona o lea ua faia le finagalo o le Komiti ae faatuatuana’i ai finagalo o afioaga. E le taugofie le tausiaina o au va’a ao lea ua fa’apea le tulaga o le tuuga o lenei tausaga”, o le saunoaga lea a Faiivae, le Kapeteni o le Sa o le Taema II mai le afioaga i Leone.

 

Na lagolagoina e le Kapeteni o le Sa a le God is Great, le afioga i le Fofoga Fetalai ia Savali Talavou Ale fa’asea e fa’atatau i le le lelei lea o le faatautaia o le tuuga.

 

“Ana leai le maea o le va’a a le Komiti na faalavelave i le matou Sa, semanu e maua sa matou tulaga lelei, ae soia ia ua fai le faaiuga a le Komiti”, o le saunoaga lea a Savali.

 

Sa i ai fo’i sui o isi Sa na fa’aleo o latou lagona faasea i le le lelei o le auala na faatautaia ai le tuuga, peita’i na latou taua le faigata ona toe faasoa ni o latou lagona ona o lea ua taoto le faaiuga a le Komiti.

 

I le amataga o le fonotaga a le Komiti ma Kapeteni ina ua fa’atoa mae’a le tuuga, na faafetaia ai e le Taitai o le Komiti, afioga i le Lutena Kovana ia Lemanu Peleti Mauga afioaga uma e tusa ai o le tuuga.

 

“O le mea moni lava sa i ai faaletonu na tutupu i le tuuga, peita’i e le avea ia fa’aletonu e taofia ai le faaiuga lea ua autasi i ai le Komiti, ina ia aloaia loa le faaiuga o le tuuga e pei ona i ai”, o le saunoaga lea a Lemanu.

 

Sa ia faailoa fo’i i Ali’iva’a e fa’apea, o a faaletonu na tutupu i le tuuga, e le toe manatu le Komiti e ave i ai se faamamafa, ae aloaia loa le faaiuga ua taoto.

 

Sa faia se fonotaga faapitoa a le Komiti o le Tuuga Fautasi ma Kapeteni i le itula e 8:00 i le taeao, ao lumana’i ai le tuuga i le itula e 10:00 i le taeao lava o le aso Gafua.

 

O lea fonotaga sa faia i le vaega e tini atu i ai le tuuga, i luma o le Asco Motors i Pago Pago. I lea fonotaga, sa talosagaina ai e ni isi o Kapeteni le Komiti ina ia amata mai le tuuga i le vaega e masani ona amata mai ai i le 5 maila i tai i le moana.

 

Na taua e ni isi o Kapeteni i le ulua’i fono ma le Komiti e faapea, e le talafeagai le amata atu o le tuuga i uta i le vaega e tini ai, ona e le tutusa uma fausaga o Sa.

 

“E le lelei mo a matou Sa le amata atu o le tuuga i uta ona alu lea toe mimilo mai tai, aua e le tutusa fausaga o Sa, ae sili pe a amata mai i tai le tuuga, o iina lea sa koleni fuafua i ai a matou au va’a”, o le saunoaga lea o le sui o le Iseulaalemoana II.

 

Saunoa Lemanu e fa’apea, e mafua ona lagolagoina e le Komiti le amata atu o le tuuga i uta, ona e le o tulaga lelei le gataifale, e popole fo’i le Komiti ina ne’i tula’i mai se faaletonu i se Sa ma aafia ai se soifua o se tasi, ona fai lea ma lape o le fa’amoemoe o le malo i lenei tausaga.

 

Na umi se taimi o fefaloa’i le tofa ma le uta i le ulua’i fono lea, ona sa taumafai pea le Komiti e fa’amalie finagalo o Kapeteni. E ui i le naunau pea o le to’atele o afioaga e amata mai le tuuga i tai, ae na tasi le filiga ma le faautaga e ala i le fautuaga a le Komiti, o le a amata atu i uta le tuuga.

 

E 2 tuuga na saili mai ai le siamupini mo faigamea i le tai mo lenei tausaga. O le tuuga muamua na mua mai ai le Sa o le Fuao mai Vatia, sosoo ai le Matasaua mai Manu’a, sosoo ai le Felanofani Samoa II, sosoo mai ai le Iseulaolemoana II mai Fagatogo, ae lona lima le Aeto II mai Pago Pago.

 

O le tuuga lona lua na manumalo ai le Sa o le Paepaeulupoo II mai Aua, sosoo mai ai le Taema II mai le afioaga o Leone, sosoo mai ai le Sinapioa na alo e le Vaega o le Army Reserve, ma le Sa o le God is Great na alo e le Fono Faitulafono.

 

O le faaiuga la lea o le tuuga fautasi na tuuina mai e le Komiti o le Tuuga Fautasi.

 

1 - FUAO         27.56

 

2. PAEPAEULUPOO        28.30

 

3. MATASAUA                   29.06

 

4. TAEMA II     29.21

 

5. FEALOFANI SAMOA II          29.41

 

6. ISEULAALEMOANA II           30.04

 

7. SINAPIOA   31.49

 

8. AETO II        33.29

 

9. GOD IS GREAT (FONO)        33.39