Ads by Google Ads by Google

Silia miliona o lo o aitalafu ai le malo i le Kolisi Tu’ufa’atasi

 Sui o le Kolisi Tu’ufa’atasi a Amerika Samoa i le taimi na molimau ai i luma o le Komiti Soofaatasi a le Fono mo le iloiloina o le latou paketi mo le tausaga tupe fou i le taeao ananafi.  [ata AF]
ausage@samoanews.com

O lo o fa’aauau pea ona fetaia’i le pulega a le Kolisi Tu’ufa’atasi a Amerika Samoa (ASCC) ma lu’itau tau tupe i le taimi nei, e mafua mai i le vaega tupe e silia i le $1 miliona lea o lo o aitalafu ai le malo i le Kolisi Tu’ufa’atasi, e ala i vaega tupe ua mae’a ona fa’atulafono e tatau ona totogi atu e le malo i le Kolisi i masina ta’itasi, peita’i e le i mae’a ona fa’atinoina e le faigamalo lea tulaga.

 

Ina ua fesiligia e le Komiti So’ofa’atasi o le Paketi a le Fono Faitulafono sui o le Kolisi Tu’ufa’atasi i le taeao ananafi, i le tulaga ua i ai lea vaega tupe, na fa’amanino ai e le Teutupe a le Kolisi, Emey Silafau, le aofaiga e silia i le $1.1 miliona e le i totogiina atu e le malo, tusa lea e 6 masina.

 

Na fesili le afioga i le ali’i faipule ia Vesi Talalelei Fautanu Jr, pe o fa’apefea la ona fa’atino galuega a le Kolisi Tu’ufa’atasi pe afai e le o atoa atu le tupe e tatau ona fa’atino ai ana galuega, ae na tali Silafau e faapea, e ui i tulaga fa’aletonu o tupe sa tatau ona totogi atu e le faigamalo, ae o lo o galulue pea le pulega a le Kolisi Tu’ufa’atasi i auala eseese e mafai ai ona maua ni tupe e fa’atino ai lana auaunaga.

 

Na fesili le afioga i le ali’i Senatoa ia Soliai Tuipine Fuimaono pe aisea ua mafua ai ona le mafai e le malo ona totogi le tupe mo le Kolisi Tu’u fa’atasi, ae na tali sui o le Kolisi Tu’ufa’atasi e fa’apea, soo se taimi latou te feutana’i ai ma le Teutupe, o lana tali e masani ona tu’uina atu, “Onosa’i o lo o vaivai tupe maua a le malo”.

 

Na fa’auilavea le taitaifono o le Komiti So’ofa’atasi ia Laolagi Fonoti Savali Vaeao ma taumafai e fa’amanino i le Komiti So’ofa’atasi auala o lo o fa’atautaia ai galuega a le malo ma lana paketi, o le fa’avae lea i luga o tupe o lo o valoia e tatau ona maua, ae o le mea moni lava, o a uma tupe e maua e le malo i masina ta’itasi, o tupe ia e fa’atupe ai manaoga eseese e tula’i mai i le malo, e aofia ai ma le totogiina atu o le vaega tupe mo le Kolisi So’ofa’atasi.

 

E pei ona taoto i luma o le Komiti So’ofa’atasi o le Paketi a le Fono Faitulafono, o le paketi a le Kolisi Tu’ufa’atasi e $8.3 miliona mo le tausaga tupe lenei 2016, ua fa’aitiitia i le $7.8 miliona mo le tausaga tupe fou 2017.

 

O alaga tupe e 3 o lo o maua mai ai tupe e fa’atino ai galuega a le Kolisi Tu’ufa’atasi, e aofia ai le $3 miliona o lo o maua mai i le malo, o le $1.3 milionan o lo o maua mai i tupe fesoasonai mai le malo feterale, tauala mai i le Ofisa a le Initeria, ma le $3.5 miliona lea e maua mai i isi vaega tupe o lo o ao e le Kolisi Tu’ufa’atasi, e aofia ai totogi o pili a ni fanau aoga.

 

A o le i pasia le mau e fa’aagafua ai sui o le Kolisi Tu’ufa’atasi, sa i ai ni isi o mataupu taua na fesiligia ai i latou e afioga i Senatoa ma Faipule, e pei o le mataupu lea na fesiligia e le afioga i le tama’ita’i faipule ia Atalina Asifoa, i le mafua’aga e ala ai ona tele le tupe e alu i le polokalame o le Samoan Studies i le Kolisi, ae laititi le tupe e alu i le Aoga Fa’a Tausima’i.

 

Saunoa Asifoa e fa’apea, talu ai le mana’omia tele e le atunu’u o le tautua fa’a foma’i aemaise ai o le auaunaga fa’a tausima’i, e tatau ai lava ona tele se vaega tupe a le Kolisi Tu’ufa’atasi e alu mo le fa’atupeina o polokalame tau tausima’i, ae fa’aitiitia i isi mataupu e aofia ai ma Gagana Samoa, ae na taua e sui o le Kolisi e fa’apea, e mafua ona eseese le aofa’i o vaega tupe o lo o alu i mataupu ia e 2 e pei ona fesiligia, ona o le tele atu su’esu’ega ma sailiiliga a le mataupu o le Gagana Samoa e faia nai lo le vaega fa’a tausimai, ae tutusa lava le taua o mataupu ia mo fanau aoga.