Ads by Google Ads by Google

Silia $700,000 tu’uaia na maua mai gaioiga faasolitulafono mataupu DHSS


[ata: SN]
ausage@samoanews.com

E silia i le $700,000 le aofa’i o le tupe o lo o tu’uaia e le malo, na maua mai i gaioiga fa’agaoi sa fa’aaoga fa’asolitulafono ai pepa ‘ai mai le polokalame o le Food Stamp a le Matagaluega o Auaunaga ma Tautua Lautele a le malo (DHSS)

 

A o fa’aauau ai su’esu’ega a le Ofisa o Leoleo e fa’atatau i le mataupu lea o lo o tu’uaia ai tagata faigaluega e to’alua a le Ofisa o le DHSS, na maua ai e Leoleo le tele o fa’amaumauga e lagolagoina ai tu’uaiga i faiga fa’asolitulafono sa fa’aaogaina ai pepa ‘ai mai le Food Stamp.

 

Na maua e Leoleo i a latou su’esu’ega le fesoasoani o le ali’i faipisinisi Asia ia Feng Xiao Guo ma lona to’alua, lea o lo o pulea le Faleoloa o le Harbor View Mart ia Kevin, i le auina atu lea o pepa ‘ai mai le Food Stamp ma tala i le Faletupe, ona o le fa’amoemoe ia maua ai se tupe mo i latou.

 

Ina ua masalomia faiga fa’asolitulafono i pepa ‘ai a le polokalame o le Food Stamp, na tofia ai loa e le Fa’atonusili a le DHSS o lo o i ai nei, tofa Muavaefa’atasi John Suisala se Vaega faapitoa i totonu o lona Ofisa, latou te su’esu’eina tulaga uma e uiga i lenei mataupu, aemaise lava i Faleoloa Asia o lo o  masalomia i lenei mataupu, e pei o le JFL Malae Store ma le Fast By Food Mart lea e pulea e Kevin, ma le Faleoloa o le Harbor View Mart lea e pulea e Guo. O vaega la nei na mafai ona maua i lea su’esu’ega.

 

I le va o le masina o Oketopa 2014 e oo mai ia Setema 2017, tusa lea e 3 tausaga le va, e na o le $7,031 le tupe sa masani ona maua e le Faleoloa o le JFL Malae Store mai pepa ‘ai o le Food Stamp. I le masina o Oketopa 2017, e $80,186 na maua e le Faleoloa lea. E $63,997 na maua i le masina o Novema na sosoo ai, $80,789 na maua ia Tesema na te’a nei, ma le $20,640 na maua i le masina lenei o Ianuari, ae faia loa le faaiuga e tapunia ai le toe talaina o ni pepa ‘ai a le Food Stamp i le Faleoloa lea.

 

Mo le Faleoloa o le Fast By Food Mart, lea fo’i e pulea e le ali’i o Kevein ua fa’a falepuipui, sa mafai fo’i ona maua e le Vaega Suesue a le DHSS faamaumauga i ana tupe maua mai pepa ‘ai a le Food Stamp i masina o le tausaga ua tauna’i atu, atoa ai ma le taimi o lo o masalomia na alia’e mai ai lenei fa’alavelave.

 

I totonu o le 4 masina, amata mai ia Iuni e oo atu ia Setema 2017, e na o le $9,524 le tupe na maua e le Faleoloa lea mai pepa ‘ai. I suesuega sa faia, na maua ai le faafuase’i lea ona oso i luga le tupe sa maua e le Faleoloa i le masina o Oketopa, i le aofa’i e $26,161. O Novema na sosoo ai e $56,695 na maua, $105,464 na maua ia Tesema, ae $20,200 na maua ia Ianuari.

 

Na matai fo’i ona maua e le Vaega Suesue a le DHSS faamaumauga mo le Faleoloa o le Harbor View Mart lea e pulea e le ali’i o Guo. E le o taofia pe molia e le malo Guo i le taimi nei. I totonu o le 8 masina, amata mai ia Fepuari e oo atu ia Setema 2017, e na o le $1,188 le tupe na maua e le Harbor View Mart mai pepa ‘ai a le Food Stamp. O lea aofaiga na fa’afuase’i ona oso i luga i le masina o Oketopa 2017 i le aofa’i e $37,722, $52,000 mo le masina o Novema, $114,318 i le masina o Tesema, ae $20,000 mo le masina lenei o Ianuari 2018.

 

I le masina o Novema 2017, na telefoni atu ai le tofa a Taeaoafua Dr. Meki Solomona ia Kevin na fai i ai, pe mafai ona ia fa’atauina lana ta’avale i le tau e $15,000, le ituaiga o le 2008 Nissan Titan Truck, e fesoasoani ai i le totogiina o lana malaga e alu ai i fafo mo lana talavai. Na talia e Kevin le mana’o o Taeaoafua ma ia saini ai le siaki e $15,000 e fa’atau ai le ta’avale.

 

Sa fesiligia fo’i e Leoleo le tama’ita’i faigaluega a le DHSS ia Jane Vasa e tusa ai ma lona a’afiaga i lenei mataupu. Na faamaonia e Vasa i Leoleo lana vaega sa fa’atinoina i lenei mataupu, e ala i lona taliaina o le talosaga a Vincent Toeava, ma ave i ai le pusa o lo o i ai kopi o pepa ‘ai a le Food Stamp, e ui sa ia iloa e le tusa ma le tulafono, ae sa ia faia lava ona o lona manatu e fesoasoani i le taumafaiga a Toeava mo le tau amataina o lana pisinisi fou.

 

Ina ua maua e Toeava le pusa o lo o i ai kopi o pepa ‘ai o le Food Stamp mai ia Vasa, sa ia tuuina atu ai loa le $4,000 ia Vasa i le isi vaiaso e totogi ai o ia i le galuega sa ia faia.

 

I suesuega sa faia e Leoleo na maua ai, e tusa ma le $742,000 le aofa’i atoa o le tupe na maua mai i pepa ‘ai a le Food Stamp. O le $243,721 o lenei tupe na maua e Kevin.