E silia i le to’a 600 le aofa’i o tagata faigaluega a le Samoa Tuna Processors (STP), o le lala lea o le kamupani a le Tri Marine na fa’amutaina i le aso Faraile na te’a nei a latou galuega, ina ua tapunia se tasi o auaunaga a le STP ona o ni isi o mafua’aga le ma’alofia, e pei ona latou fa’ailoa mai i se taimi ua mavae.

Na taua e se sui sinia o le STP i le Samoa News i le vaiaso na te’a nei le mae’a lea ona tu’uina mai o fa’amanuiaga a le Pulega i tagata faigaluega uma o le a le toe i ai ni galuega, a o aga’i atu ai le atunu’u i le fa’amanatuina o aso fiafia o lenei tausaga.

“E le o se tulaga e talia gofie e le to’atele o matou lenei suiga ua i ai, e le gata ua motusia galuega ae ua afaina ai fo’i ma le itu tau tupe i totonu o le aiga, aemaise lava pe afai o lo o aofia uma ai se ulugali’i i le fa’aletonu lea ua fa’amutaina ai galuega, peita’i e ui o lea ua fa’amalolo le silia laititi lava i le to’a 600, o lo o i ai lava le faamoemoe e ono i ai se isi fesoasoani mo le to’atele o i latou nei i se taimi o le tausaga fou”, o le saunoaga lea a le sui sinia i le Samoa News.

Ina ua fesiligia e le Samoa News ni isi o tagata faigaluegaa ua fa’amalolo e tusa ai o ni o latou lagona lenei fa’aletonu, sa latou taua ai le naunau e toe vave saili ni isi galuega e fesoasoani ai i aiga.

“Pau le faanaunauga lea ua oo mai ia te a’u, tuai na uma atu aso fiafia ae se’i toe tau saili se isi galuega e fesoasoani ai i le aiga. E le faigofie lenei tulaga ua matou oo i ai, o le leai o ni galuega ae ua oo mai le faaiuga o le tausaga”, o le saunoaga lea a Pelenato Viliamu.

O le aso Faraile na te’a nei na toe faia ai le isi fono a le Pulega a le STP, mo le talanoaina o ni isi lava fuafuaga e tusa ai o tagata faigaluega ua fa’amuta la latou auaunaga, ma e ui e le i manino lelei le tulaga o lea fonotaga, peita’i na taua e se sui sinia a le STP i le Samoa News le taumafai pea o le Pulega e saili ni isi auala e mafai ai ona i ai se isi kamupani tuu apa mai fafo na te fa’aauauina le auaunaga sa latou fa’atinoina, ma toe maua ai galuega a i latou ua fa’amutaina a latou galuega.

A o tau saili ai la ni isi o fesoasoani mo le silia i le toa 600 ua leai ni galuega, o le itula e 3:00 e oo atu i le 5:00 i le afiafi nei, i luma o le nofoaga o le Paradise Pizza, o le a fa’ataunuuina ai le polokalame lea o lo o tu’u fa’atasia e le afioga a Tapumanaia Galu Satele ma lona aiga, o le tufatufaina atu lea o meaalofa mo fanau a i latou uma ua fa’amuta aloaia a latou galuega i le STP.

Na taua e Tapumanaia i le Samoa News le galulue pea o lona aiga i le tu’u fa’atasia o meaalofa na mafai ona foa’i mai e le mamalu o le atunu’u fa’apea ai ni isi o kamupani ma pisinisi, e fai meaalofa atu ai i fanau a i latou ua afaina a latou galuega.

E pei ona fa’asalalauina i le lomiga muamua a le Samoa News, o vaega e tatau ona fa’ailoa ina ia fa’amaonia ai o oe o le tagata faigaluega a le STP, atoa ai ma faamaoniga o lau fanau, e aofia ai le fa’ailoa o le pine faigaluega i le STP, atoa ai ma pepa tui o lau fanau mai le Falema’i ina ia mafai ai ona fa’amaonia, o oe moni o le Tama poo le Tina o fanau o le a agava’a i meaalofa.