Silia $500K fesoasoani a le CJPA mo le Ofisa o Leoleo

ausage@samoanews.com

E ui o lea ua manino le tele o le vaega tupe o lo o fesoasoani atu ai le Ofisa e Puipuia Solitulafono i le malo (CJPA), mo le Matagaluega o le Puipuiga o le Saogalemu Lautele (DPS), e ala i le totogiina lea o ni isi o Leoleo i Tutuila ma Manu’a, ma le fa’atupeina o isi mau atina’e eseese e fesoasoani ai i le tautua a le Ofisa o Leoleo, peita’i na taua e le Komesina o Leoleo i luma o le Fono le leai o se tupe a lona Ofisa o maua mai i le CJPA, ae saunoa le Sui Fofoga Fetalai fai mai, “e le taitai lava nei tupe e fesoasoani ai i le Ofisa o Leoleo”.

 

O le iloiloga a le Komiti o Fa’amasinoga a le maota o sui ma le Faatonusili ia Keith Gebauer o le CJPA i le vaiaso nei, na valaauina ina ia mafai ai ona fa’amanino alagatupe o lo o fesoasoani atu ai le CJPA i le Ofisa o Leoleo.

 

Ina ua fesiligia e le Komiti Soofaatasi o le Paketi a le Fono Faitulafono le Komesina o Leoleo, afioga Save Liuato Tuitele po o i ai ni alagatupe a lona Ofisa o maua atu i le Ofisa o le CJPA, na tali Save, “e leai se tupe”.

 

Ae ina ua fesiligia e le Komiti o Fa’amasinoga a le maota o sui ia Gebauer i le vaiaso nei, po o i ai se vaega tupe mai lona Ofisa o fesoasoani atu ai i le Ofisa o Leoleo, na saunoa o ia “e silia i le $500,000 le vaega tupe” ua mae’a ona fuafua i le tausaga tupe fou 2017.

 

“E na o le 3 lava Ofisa a le malo o lo o maua atu alagatupe mai lo’u Ofisa e fesoasoani ai i le fa’atinoina o a latou tautua fa’atino, o le Ofisa o Leoleo, Ofisa o le Loia Sili ma le Vaega o Fa’amasinoga”, o le saunoaga lea a Gebauer.

 

O ni isi o alagatupe fesoasoani mai le feterale o lo o agava’a ai le Ofisa o Leoloe mai le CJPA, e aofia ai le vaega tupe e $272,000 mai le “COPS grant”, lea ua fa’amoemoe e fa’a faigaluega ai Leoleo fou e to’a 7 e fesoasoani i le puipuia atoa ai ma le tausia o le filemu o fanau aoga i totonu o aoga eseese i le atunu’u.

 

O le isi alagatupe e taua o le “Justice Assistance Grant - JAG”, lea fo’i o lo o maua ai e le Ofisa o Leoleo se vaega tupe e fesoasoani ai i le aoaoga o lo o fa’atinoina e le Vaega o Leoleo Su’esu’e (CID), o le vaega tupe e fa’atino ai aoaoga fa’a faufautua mo i latou o lo o i ai a’afiaga o fualaau fa’asaina ma le ‘ava malosi (Residential Substance Abuse Treatment - RSAT), fa’apea ai ma le $100,000 o lo o totogi ai Leoleo o lo o galulue i Manu’a.

 

E ui na saunoa le sui fofoga fetalai ia Fetu Fetui Jr, o le sui faipule fo’i lea mai le itumalo o Manu’a #1, e le o lava le vaega tupe lea e fesoasoani ai mo le Ofisa o Leoleo atoa ai ma Leoleo i Manu’a, peita’i na saunoa le ali’i fa’atonusili e fa’apea, o le vaega tupe lea o lo o agava’a ai le Ofisa o Leoleo i tausaga ta’itasi, o vaega tupe fesoasoani ua mae’a ona fa’asoasoa e le ofisa o le feterale o lo o auala mai ai alagatupe, e le mafai fo’i ona toe suia le aofa’i ua mae’a ona fuafuaina mo Amerika Samoa.

 

Na toe fesiligia e Fetui ia Gebauer i le mataupu lea fo’i na fesiligia i le taimi o le iloiloga o le paketi, i le mafua’aga ua le toe maua ai alagatupe ia sa mafai ai ona fesoasoani i nu’u ma itumalo mo le fa’aleleia o vaega e pei o auala i totonu o afioaga atoa ai ma ala galue.

 

Saunoa Fetui e fa’apea, i le taimi a o avea le tofa a Alalamua Filoiali’i ma Fa’atonusili o le Ofisa, sa aga’i atu uma i ai le tele o afioaga mo le fia maua o se fesoasoani i le itu tau tupe, e fa’atino ai galuega fesoasoani mo le fa’aleleia o auala ma atina’e i totonu o nu’u ma itumalo, ae ua le iloa le mafua’aga ua ala ai ona taofia ia fesoasoani mo nu’u ma afioaga.

 

Na fa’afetaia e Gebauer le tautua a le tofa i le Tootoo ia Alalamua ua Lagomau mai Tia Sa, e ala i lona taulagalaga i auala eseese e manuia ai le atunu’u, peita’i o alagatupe e pei ona fesiligia, sa i ai lava le umi na fa’atulaga mai e le feterale e fa’agaioi ai ona mae’a fo’i lea.

 

“O le talosaga muamua lava lea na tu’uina atu ia te a’u ina ua fa’atoa tofia a’u e le kovana e avea ma Ta’ita’i o le Ofisa lenei, o le toe vaavaai lea pe toe maua mai le alagatupe lea sa masani ona maua ai fesoasoani mo nu’u ma afioaga, ae ina ua taumafai le Ofisa e saili fa’amaumau i alagatupe ia, na manino ai, o le tausaga e 2011 le taimi mulimuli lava na tatala ai le alagatupe lea mo talosaga, e o o mai lava i le taimi nei, ua mae’a le alagatupe lea, e le o toe tatalaina mai lava i tua mo ni talosaga,” o le saunoaga lea a Gebauer.

 

Na fa’afetaia e le afioga i le ali’i faipule ia Faimealelei Anthony Fu’e Allen le tele o fa’amatalaga na mafai ona tu’uina atu e le ali’i fa’atonu i luma o le komiti, lea ua mafai ai ona malamalama le komiti i le tele o alagatupe o lo o fesoasoani ai le Ofisa o le CJPA i isi ofisa o le malo.

 

Ae i le mataupu o Leoleo fou e to’a 7 lea ua fa’amoemoe e fa’afaigaluega i le tausaga tupe fou, na fesiligia ai e Faimealelei ia Gebauer, pe i ai se isi vaega tupe e toe fa’aopoopo ai ni isi Leoleo, ona o le tagi masani lava lenei a le Komesina o Leoleo ma lona Ofisa i soo se taimi e oo atu ai i luma o le Fono, o le talosaga lea mo se alagatupe e fa’aopoopo ai ni isi Leoleo a le malo.

 

Na fa’afetaia e Faimealelei le avanoa ua maua ai Leoleo fa’aopoopo e to’afitu, peita’i o le fa’afitauli, e galulue Leoleo fou nei mo le tausiaina o le filemu o fanau aoga, fa’atoa maua se avanoa e fesoasoani ai i le Matagaluega o Leoleo i le fa’aiuga o vaiaso e tuua ai aoga, po o le taimi fo’i o le malologa umi a fanau aoga.

 

Na fa’amanino e Gebauer e fa’apea, o Leoleo fou e to’a 7 e pei ona taua, e mafai ona fa’a faigaluega ai le tagata fou e lei i ai lava sona agava’a fa’a Leoleo, e mafai fo’i ona toe fa’a faigaluega ai le tagata sa avea muamua ma Leoleo na fa’amavae.

Comment Here