Ads by Google Ads by Google

Silia $50 miliona tau atoa galuega mo afi eletise fou a le ASPA ua mae’a


Se vaaiga atu lena i le nofoaga fou lea ua fausia ai afi a le Pulega o le Eletise ma le Suavai a Amerika Samoa (ASPA) i lona lala i Satala, lea ua fa’amoemoe e tatalaina i le aso Tofi o le vaiaso nei. [ata AF]
ausage@samoanews.com

E silia ma le $50 miliona le tau aofa’i o le galuega fou a le Pulega o le Eletise ma le Suavai a Amerika Samoa (ASPA), le nofoaga fou e pei ona fausia ai ana afi eletise lea ua mae’a ona fausia i Satala, ma ua faamoemoe e tatala aloaia i le aso Tofi o le vaiaso nei.

 

E pei ona taua e le Pulesili a le ASPA i luma o le Fonotaga a le Kovana ma lana Kapeneta i le taeao ananafi, e tulaga ese le malolosi o afi eletise fou lea ua mae’a ona fausia ma le malolosi o afi eletise tuai sa i ai muamua, lea sa mafai ona fa’aaoga e sapalai ai le eletise i totonu o le atunu’u atoa.

 

O le vaiaso nei lea na amata fa’aola ai afi eletise fou i lona nofoaga fou i Satala e pei ona saunoa le afioga i le Matua ia Utu Abe Malae, ma ua maitauina fo’i e le aufaigaluega se suiga tele i le tulaga o le pao ma le leo tetele o afi, fa’atusatusa i le tulaga sa i ai le ola ma le pao o afi tuai sa i ai.

 

O le tauaofai o le galuega e $56 miliona, e aofia ai le vaega tupe mai le FEMA, ae o le isi vaega sa maua atu i le ASPA.

 

Ua valaauina le Kapeneta ina ia auai i le sauniga e tatala aloaia ai lenei galuega tele, ma ua fa’amoemoe fo’i e auai ta’ita’i o le malo ma le atunu’u.

 

Na fa’afetaia e le afioga i le ali’i kovana ia Lolo Matalasi Moliga ia Utu ma lana aufaigaluega, ona o le galuega fita sa latou fa’atinoina mai le silia i le tausaga ua mavae.

 

Saunoa Lolo e fa’apea, o le taua o lenei atina’e ua vavala mai ai le taumafaiga a le malo ua tele tausaga o taumafai mai, o le sailia lea o se auala e tu’u ai i lalo le tau o le eletise i totonu o le atunu’u atoa.

 

“O le agaga atoa o le malo, ia taugofie le tau o le eletise, aua a maualalo le tau o le eletise o le tele fo’i lena o isi gaioiga e mafai ona faia i ai”, o le saunoaga lea a le ali’i kovana.

 

Sa ia fa’ailoa i le Kapeneta le tele o lu’itau e masani ona la tu’uina atu ma le lutena kovana ia Lemanu Palepoi Peleti Mauga ia Utu ma lona Ofisa, ina ia sailia ni auala e fesoasoani ai i le tau o le eletise i le atunu’u, o isi fo’i taimi, la te fautuaina ai Utu ina ia saili ni auala e fesoasoani ai le ASPA i kamupani i’a.

 

“E ui i le tele o nei mau galuega o lo o fa’aee atu ia Utu ma le aufaigaluega, ae o lo o maitauina pea lo latou fiafia e fa’atino galuega lelei uma mo le manuia o tagata uma o le atunu’u”, o le saunoaga lea a Lolo.

 

Sa ia taua fo’i galuega lelei ua mae’a ona fa’atino e le ASPA mo le itumalo o Manu’a, e pei ona i ai galuega o le eletise lea ua mafai ona maua mai i le malosi o le la, e pei ona tatalaina i Ta’u ma Ofu i le tausaga nei.

 

“Ia iloa e le atunu’u o lo o tatou galulue pea e fa’atino galuega lelei mo i latou i soo se taimi”, o le saunoaga lea a le ali’i kovana.

 

O se tasi o tulaga lelei e pei ona i ai afi eletise fou ia ua fa’aaogaina nei i Satala, e leai se a’afiaga o le ea ma le si’osi’omaga i le asu o loo maua mai ai, ma ua fesoasoani atili fo’i lenei atina’e i le taumafai e puipuia le afaina o le ea i vaega eseese o le lalolagi.