Silia 30 aufaipese ua lesitala Polokalame Pesepesega Kerisimasi

ausage@samoanews.com

E silia i le 30 le aofa’i o aufaipese ua mae’a nei ona lesitalaina mo le polokalame fa’agasolo a le malo i taimi o aso fiafia o le kerisimasi ma le tausaga fou i tausaga ta’itasi, lea o lo o fa’atautaia e le Ofisa a le “American Samoa Council on Arts, Culture and Humanities”, lea ua fuafuaina i le masina o Tesema 2016.

 

E pei ona fa’agasolo ai i tausaga ta’itasi, o le lona 35 ai lenei o Polokalame o Pesepesega o le Kerisimasi, lea o lo o mafai ai ona maua avanoa o Autalavou, Aoga ma Fa’alapotopotoga e fa’alauiloa ai a latou pesepesea mo le kerisimasi, e aofia ai ma tala fa’atino e fa’atatau i le fanau mai o le pepe o le kerisimasi, e pei ona talitonu i ai ni isi o le au Kerisiano.

 

O le vaiaso na te’a nei na fa’amuta aloaia ai le lesitalaina o aufaipese mo lenei fa’amoemoe, ma e tusa ma le to’a 35 le aofa’i o aufaipese ua mae’a ona lesitala mo le polokalame o lenei tausaga, lea ua fa’amoemoe e fa’agasolo mai le po o le aso Sa, Tesema 18 e o o atu i le aso Lua, Tesema 20, 2016.

 

E pei ona masani ai i polokalame i tausaga ua mavae, e na o le ta’i 10 minute le umi e tu’uina atu i le aufaipese e fa’atino ai la latou fa’afiafiaga.

 

O se aso o le masina fou o Novema lea ua fa’amoemoe e amata ta’amilo ai le Komiti mo le pasiina o fa’afiafiaga a aufaipese o le a lautogia mo lenei fa’amoemoe, ma faia ai loa iina le fa’aiuga fa’ai’u mo aufaipese o le a maua le avanoa e fa’afiafia ai i le polokalame mo lenei tausaga.

 

Na taua e ni isi o ta’ita’i o aufaipese sa maua le avanoa e fesiligia ai e le Samoa News, e tusa ai o a latou tapenaga mo le polokalame o lenei tausaga e fa’apea, o le taua o avanoa fa’apenei e mafai ai ona tu’u fa’atasi fanau ma tupulaga talavou a nu’u ma Ekalesia, latou te a’oa’oina ni fa’afiafiaga fa’aleagaga poo pese fo’i e fa’atatau i le agaga o le kerisimasi ma le tausaga fou i lenei tausaga.

 

Ae na taua e le isi ta’ita’i pese le taua o polokalame nei, e fa’aalu tatau ai taimi o tupulaga e a’oa’oina ai polokalame fa’alelotu, nai lo le fa’aalu o latou taimi e mafuta atu ai i isi tupulaga ma i’u ina a’afia ai o latou olaga i filifiliga sese e pei o le tagofia o le sikaleti, ‘ava malosi fa’apea ai ma fualaau fa’asaina.

Comment Here