Ads by Google Ads by Google

Siitia pea tulaga o le tautua a le LBJ mo le atunu’u

 Se tasi o ta’avale e 5 i ai ta’avale na foa’i mai e le EMS a Honolulu mo le EMS a Amerika Samoa.  [ata AF]
ausage@samoanews.com

O le fa’aopoopoina mai o ta’avale mo le vaega a le EMS, e tautua ai le atunu’u pe a gasegase, aemaise ai o le tatala aloaiaina o le potu e taunu’u i ai gasegase tigaina i le falema’i o le LBJ i le taeao ananafi, ua atagia mai ai le si’itia pea lea i luma o tulaga i le tautua atoa ai ma le auaunaga a le falema’i mo le atunu’u.

 

O le taeao ananafi na fa’apaia aloaia ai ta’avale e 5 mo le vaega o le EMS i Faga’alu, lea na foa’i fua mai e le Pulega o le EMS i le aai o Honolulu, fa’atasi ai ma le ootiina o le lipine e tatala aloaia ai le galuega sa fa’agasolo mo le toe fa’afouina o le potu e taunu’u atu i ai gasegase tigaina i le falema’i, le “Emergency Room”.

 

O le afioga i le ali’i Lutena Kovana ia Lemanu Peleti Mauga sa fai ma sui o le malo e fa’ataia le pulega a le LBJ, ona o galuega lelei o lo o fa’atinoina pea mo le atunu’u.

 

Saunoa Lemanu e fa’apea, i le silia i le 2 tausaga talu ai ao latou pisi ai i le tau sailiina o se isi faletupe e sui tulaga i le lala o le faletupe a Hawaii o le a tula’i ese ma Amerika Samoa, sa ia fa’alogoina ai i se tasi o a latou malaga i Honolulu, o lo o i ai talanoaga o lo o fa’aauau pea i le va o le LBJ ma le EMS a le atunu’u, faapea ai ma le Pulega o le EMS i Honolulu, mo ta’avale falema’i e fesoasoani ai i le tautaua a le falema’i i le atunu’u.

 

“O lenei la taeao (aso ananafi), ua na o le agaga o le fa’afetai ma le fa’amalo i le pulega a le falema’i ma le EMS, ina ua mafai ona fa’ataunu’uina lenei fa’amoemoe ma le manuia. E tasi le mafua’aga ua ala ai ona tatou galulue e fa’atino galuega nei, ina ia lelei mea uma e tautua ai le soifua maloloina o le atunu’u”, o le saunoaga lea a Lemanu.

 

Sa ia fa’afetaia fo’i le Pulega ma le Komiti Fa’afoe a le Falema’i, ona o le galuega ua mafai ai ona toe si’itia le matagofie o le potu e taunu’u atu i ai gasegase tigaina mo togafitiga.

 

Na taua e le Pulesili o le LBJ, tofa Taufete’e J. Faumuina le fa’agae’etia o lona loto, ina ua mafai ona taunu’u manuia mai ta’avale EMS e 5 mo le Falema’i, e fesoasoani ai i le la’uina o gasegase i le atunu’u. O ta’avale na aumai e aofia ai ia ta’avale tetele e 4 ma le Van e tasi.

 

E $50,000 le tupe sa tatau ona totogi e leLBJ mo le auina mai o ta’avale, peita’i na fesoasoani le kamupani va’a a le Matson Shipping, lea o lo o faipaaga ma le kamupani va’a a le Molida Shipping Agency i le atunu’u, ma fa’aitiitia ai le totogi o le aumaia o ta’avale i le $30,000, e pei ona saunoa Taufete’e.

 

Saunoa atili fo’i Taufete’e e fa’apea, o le afioga a Papali’i Lauli’i Alofa, le peresetene o le Paramount Builders Company na totogiina le $30,000 mo le aumaia o ta’avale i le atuu’u. Na taua e Papali’i e fa’apea, o le a fa’aauau pea le fesoasoani a lana kamupani mo le LBJ, e ala i le tausia lelei lea a ana Inisia o lo o i ai ua lava le tomai i le fa’atinoina o galuega mo le tausia atoa ai ma le vaaia lelei o ta’avale EMS ua taunu’u mai, ina ia tumau pea le lelei.

 

Na taua e le Pulesili o le EMS ia Popo Avegalio i le Samoa News i le masina na te’a nei e fa’apea, o ta’avale ua taunu’u mai mo le EMS, o ta’avale sa fa’aaoga e le Pulega o le EMS a Honolulu, peita’i ua le toe fa’aaogaina ina ua sui atu a latou ta’avale fou, ma latou filifili ai loa e foa’i fua mai mo Amerika Samoa.

 

O le sauniga lotu e fa’apaiaina ai ta’avale a le EMS ma le galuega fou mo le potu o le “ER” e pei ona fa’ataunu’uina ananafi, na ta’ita’ia lea e le afioga a Papali’i Lauli’i Alofa, o le peresetene lea o le Kamupani a le Paramount Builders Company, ae o le afioga a Lemanu na ia ootiina le lipine mo le tatala aloaiaina o le galuega.