Ads by Google Ads by Google

Siitia pea i luga to’atele o turisi malaga asiasi mai i AS


Foliga fiafia o se tasi o turisi mai le va’a meli a le Venus Cruise ao ia fa’aali i le Samoa News ana fasi talo sa mafai ona ia tofo i ai, ma ia lagonaina ai le fiafia i le tofo o taumafa a Samoa, ao ta’amilo ai e maimoa i totonu o le atunu’u i le aso ananafi. [ata AF]

Sui o le Ofisa o Tu ma Aganu’u a Amerika Samoa ia Rex Yandall (agavale), ma ni isi o turisi na malaga mai i le va’a meli o le Venus Cruise i le taeao ananafi, i le taimi na latou asia ai le nofoaga autu o loo i ai le Fale Mata’aga a le atunu’u i Fagatogo. [ata AF]
ausage@samoanews.com

Ua manino i le ripoti a le faigamalo a le ali’i kovana ia Lolo Matalasi Moliga ma le lutena kovana ia Lemanu Peleti Mauga, lea na tauaao e Ta’ita’i o le Fono Faitulafono a le atunu’u, le si’itia pea lea i luga o le atina’e tau turisi i Amerika Samoa talu mai le 4 tausaga talu ai.

 

E 10 va’a meli na asia le atunu’u i le tausaga e 2014, lea na mafai ai ona auina mai i laufanua o le teritori tagata asiasi e silia i le to’a 31,000, peita’i o le tausaga e 2015, na si’itia ai i le aofaiga e 16 le aofa’i o va’a meli na asia le atunu’u, ma auina mai ai i ona laufanua le aofa’i o tagata asiasi e silia i le to’a 28,000.

 

O loo manino fo’i i le ripoti e fa’apea, e le gata i le si’itia o va’a meli ma turisi ua mafai ona asia Amerika Samoa talu mai le 4 tausaga talu ai, ae ua maitauina fo’i i fa’amaumauga le si’itia i luga o le aofa’i o tupe o loo mafai ona maua mai lenei atina’e.

 

I le tausaga e 2013, e $160,487 le vaega tupe na mafai ona maua, ae na si’itia i luga i le $190,000 i le tausaga e 2014.

 

“O loo taumafai pea le malo e galulue fa’atasi ma le Ofisa o Turisi i le fa’atinoina lea o soo se atina’e e mafai ai ona si’itia maualuga le aofa’i o turisi e ulufale mai i Amerika Samoa, atoa ai ma le fa’aopoopo pea i luga o tupe e mafai ona maua e le malo ma tagata faipisinisi”, o se vaega lea o le ripoti.

 

O le taeao ananafi na asia ai le atunu’u e le va’a meli o le Venus Cruise, lea e tusa i le to’a 1,000 le au malaga na malaga mai ai, ma le fa’amoemoe o le aso Lulu o le vaiaso fou e toe afea ai fo’i le atunu’u e le isi fo’i va’a meli, ma le pasese e silia i le to’a 3,000 turisi ma tagata faigaluega.

 

Na taua e ni isi o le fai pisinisi i ave pasi ma ta’avale la’upasese le feololo o le seleni o loo mafai ona latou maua, i soo se taimi e malaga mai ai se va’a meli i le atunu’u.

 

“O aso ua mavae sa fiafia turisi e totogi soo se pasese e fai atu i ai le ave ta’avale, peita’i o aso nei, e fai finauga ma le turisi i le totogi o le pasese e malaga ta’amilo ai i totonu o le motu, ona e le manana’o i latou e maualuga atu i le $20 se tupe e totogi mo le tagata e to’atasi e malaga ta’amilo ai, ui o lea, o loo mafai lava ona maua nai fa’amanuiaga tau tupe i soo se taimi e malaga mai ai va’a meli i le atunu’u, ma fesoasoani ai i le tausiga o le aiga ma fa’afou ai isi vaega o le ta’avale pe a fa’aletonu”, o le molimau lea a le susuga ia Leilua Tanielu, o se tasi o Tama ave taxi mai se tasi o Fale Ta’avale la’upasese i le atunu’u.