Saunoa Kovana i auala fa’afaigofie ai aganu’u ma le soifuaga o tagata


Ni isi o sui o le kapeneta a le ali’i kovana i le fonotaga mulimuli o lenei tausaga sa faia i le aso Tofi o le vaiaso na te’a nei. [ata AF]
ausage@samoanews.com

O se tasi o mataupu na tele se taimi o le afioga i le ali’i kovana na ia fa’aalu e talanoa ai i luma o lana Kapeneta i le vaiaso na te’a nei, o le sailia lea o ni auala e fa’afaigofie ai le aganu’u atoa ai ma le ituaiga soifuaga e tatau ona soifua ma ola ai tagata o le atunu’u i le taimi nei ma le lumana’i.

 

I le oo atu ai o lana saunoaga i auala e fa’amalosia ai le tamaoaiga o le malo, atoa ai ma auala e tatau ona faia ina ia aga’i ai pea i luma o le malo, sa ia fautuaina ai lana Kapeneta ina ia silasila toto’a i auala e tatau ona fa’atino ina ia aga’i ai pea i luma tulaga manuia o le malo.

 

Saunoa le tofa i le Tootoo ia Lolo Matalasi Moliga e fa’apea, o lea ua tuana’i atu le ulua’i 4 tausaga o le nofoaiga ma ua tatau ona silafia lelei e i latou ua tofia e avea ma ta’ita’i le tulaga tonu e tatau ona aga’i i ai le lumana’i o le malo mo le isi 4 tausaga lea ua taoto mai luma.

 

“Ua tatau ona tatou vaavaai lelei i le fa’ataotoina o se alafua e mulimuli i ai le atunu’u ma le faigamalo mo le isi 4 tausaga lea ua lumana’i nei”, o le saunoaga lea a Lolo i lana Kapeneta.

 

“O lea ua mae’a ona fa’atula’i la tatou Ofisa e feso’ota’i ma le Ofisa o le Initeria, ina ia talanoaina ai tulaga o le lumana’i o le malo, atoa ai ma le ituaiga faigamalo e tatau ona i ai Amerika Samoa i le lumana’i, o le matafaioi pito sili lea ona taua e tatau ona tatou vaavaai toto’a i ai”.

 

“O le isi tulaga, ia silasila toto’a i le tulaga o le atunu’u ma le aganu’u, pe fa’apefea ona aoga le aganu’u e feso’ota’i ai le malo ma ona tagata i aso fai soo. Ua tele naua mataupu ua tula’i mai i le aganu’u ua mafua ai ona fesiligia e fanau ma tupulaga talavou le va o le soifuaga manuia ma le tulaga tonu e tatau ona taoto ai le aganu’u, o tatou o Ta’ita’i, e tatau ona tatou mafaufau lelei i le tulaga lea, poo fea tonu e tatau ona aga’i i ai le malo i le tulaga o le aganu’u”.

 

“O le tele o mea ia ua fa’amalosia ua le mafai e o tatou tagata ona gafatia, ma ua tatau ai nei ona faia se suiga lelei ma aoga, fai ni suiga e ola lelei ma ola fiafia ai tagata o le atunu’u, aua o le mea lea ua maitauina, na ona sau lava o le fa’alavelave, tu’u atu loa e le matai ma le saoga e ta’i $500 a le aiga e su’e mai, ae toe su’e atu isi tagata o le aiga ua fo’i i Upolu ina ua latou le gafatia ona fai saoga mea a le aiga”.

 

Na taua atili e le ali’i kovana e fa’apea, o le aganu’u a Samoa e le gata e faigofie, ae soifua fiafia ai fo’i tagata uma, ma e tatau fo’i la ona saili e Ta’ita’i auala e fa’atumauina ai le ola fiafia o tagata i le aganu’u.

 

“Ta’ita’i e o le atunu’u, ua tatau nei ona tatou manatunatu i lea tulaga, saili ma su’esu’e pe fa’apefea ona tatou fa’a faigofieina le aganu’u ina ia ola fiafia ai nai o tatou tagata ma aiga, aemaise ai o le totoina lea o le fatu i loto o fanau ma tupulaga talavou, o le aganu’u a Samoa e faigofie ma ola fiafia ai tagata uma”.

 

I le tulaga e fa’atatau i le tamaoaiga ma le lumana’i o Amerika Samoa, na fa’ataoto ai e le ali’i kovana se lu’itau i lana kapeneta ina ia silasila toto’a i auala e si’itia ai le tamaoaiga o le atunu’u i le lumana’i.

 

Saunoa Lolo e fa’apea, o le tele o taimi latou te fono ma fetufaa’i ai ma sui o le malo tele, e talanoa mai ai lava i latou i le vaaiga sa latou vaai ai i le 100 tausaga ua tuana’i atu, ona o le latou talitonuga, o gaioiga uma sa faia e le malo tele i ia tausaga e tele ua mavae atu, sa autu i le taumafai e saili se atina’e mautu mo Amerika Samoa, peita’i e foliga mai e oo mai lava i le taimi lenei, e le o iloga lava ona manino mai se tulaga e fa’atatau i le lumana’i o le tamaoaiga o le atunu’u.

 

O ni isi o mafua’aga na taua e le ali’i kovana e mafua ai ona ia talitonu i le tulaga le mautu o le atina’e o le malo, e le gata i le tulaga o le mamao ese mai o Amerika Samoa mai le malo tele o Amerika, ae o lea fo’i e le o tulaga lelei mai lava kamupani i’a o loo fa’alagolago i ai le tamaoaiga o le malo.

 

“O le mea moni lava ia, e le faigata ona tatou vaai i tulaga le mautonu o loo i ai lo tatou tamaoaiga i le taimi nei, e pei o le taumafai e una’i mai kamupani i’a ina ia tumau ma fesoasoani i le tamaoaiga o le malo, peita’i o le mea ua tupu ua leai ni i’a, ma e i ai le talitonuga o le isi 10 tausaga o loo lumana’i, o le a sili atu ona pagatia le tulaga e oo i ai kamupani i’a, o tulaga la ia e tatau ona tatou mafaufau loloto i ai”, o le saunoaga fa’ai’u lea a le ali’i kovana.

 

Ua ia talosagaina fo’i le kapeneta ina ia tu’u atu ni fautuaga ia tei laua ma le lutena kovana i auala e fesoasoani ai i le fa’amautuina o le tamaoaiga o le malo.

Comment Here