Sauni le Koluse Mumu e fa’amae’a lana auaunaga mo taimi o ‘afa


[ata: foa'i]
ausage@samoanews.com

O le aso Lulu o le vaiaso fou, Mati 21 e pei ona fa’alauiloa aloaia mai e le Ofisa o le Koluse Mumu i le atunu’u, o le a fa’amae’a aloaia ai lana tautua mo le ofoina atu lea o fesoasoani i tagata taitoatasi uma o le atunu’u na pagatia i le ‘afa o Gita na a’afia ai Amerika Samoa i le aso 9 Fepuari o le tausaga nei.

 

I se isi faaupuga e faapupula atili ai le gaioiga a le Koluse Mumu, o le aso lea o le a mae’a aloaia ai galuega o le ofoina atu o fesoasoani mo aiga mafatia, ae o le a fa’aauau pea lana tautua e pei ona masani ai.

 

E pei ona taua i se pepa o fa’amatalaga mai le Koluse Mumu, e tusa ma le 5 vaiaso talu mai le aso o le ‘afa sa latou fa’atinoina ai galuega fesoasoani mo le atunu’u. E silia i le 1,200 talosaga mai aiga mafatia sa mafai ona latou tauaaoina ma ofo atu i ai galuega fesoasoani.

 

O isi auaunaga e pei ona fa’aalia i le pepa o fa’amatalaga, e aofia ai taumafataga e 15,337 sa latou saunia mo aiga uma ao aumai ai i maota o sulufaiga e pei ona vaevaeina nofoaga eseese e 13, ma le anoanoa’i o isi fesoasoani e pei o vaega e moomia mo i latou ua manunu’a.

 

E tusa ma le to’a 220 tagata faigaluega a le Koluse Mumu na mafai ona galulue i le fa’atinoina o lenei auaunaga, e aofia ai i latou mai fafo atu o le atunuu e pei o Amerika ma Amerika Samoa nei, lea sa ofo fua mai lo latou taimi e fa’atino ai nei galuega fesoasoani.

 

Talu mai le taimi o lenei galuega fa’atino, e tele isi auaunaga sa mafai ona fa’atinoina e le Koluse Mumu ia i latou sa ofo fua mai lo latou taimi, e aofia ai le faia o aoaoga i auala e ofo atu ai le fesoasoani muamua mo se tasi ua pagatia.

 

Sa fa’apea fo’i ona fa’apipi’i (smoke alarm) e le Koluse Mumu fa’ailoilo e 600 mo maota e 234 le asu ua tupu.

 

Sa faapea fo’i ona fesoasoani sui o le Koluse Mumu i tagatanu’u mo le fa’atulagaina o gaioiga e sulufa’i ai aiga i taimi o fa’alavelave, ina ia mautinoa e leai se fa’afitauli e tula’i mai e ono aafia ai le aiga atoa ao taumafai e sosola mo se sulufaiga.

 

O gaioiga mo le sulufa’i atu i se isi nofoaga malu puipuia i taimi o fa’alavelave, e tatau ona fa’ataunu’uina i totonu o aso e 2 ao lumana’i ai le aso o le fa’alavelave.

 

A o i ai pea le atunu’u i le vaitau o aafiaga ona o le ‘afa o Gita, o le vaiaso nei lea na sainia ai e le afioga i le ali’i Kovana ia Lolo Matalasi Moliga sana poloaiga fa’alaua’itele, e fa’aauau ai pea mo le isi 30 aso le i ai o Amerika Samoa i tulaga o le faailoaina o mafatiaga ona o le ‘afa.

 

I le sainia ai e le ali’i kovana o lea poloaiga, ua ia talosagaina ai Ofisa uma o le malo i Matagaluega ma Ofisa Tumaoti, atoa ai faalapotopotoga ma tagata taitoatasi, ina ia galulue fa’atasi mo le ofoina atu o fesoasoani ia i latou uma o loo mana’omia le fesoasoani ona o aafiaga o le ‘afa o Gita.

Comment Here