Ads by Google Ads by Google

Sauni le fa’atautoina o le Vasega lona 25 o Leoleo Fou i le vaiaso nei


Vaega o Leoleo fou lea ua fa’amoemoe e fa’atautoina i le aso Faraile o le vaiaso nei, i le taimi o le latou savali fa’aaloalo i le vaiaso faapitoa o Leoleo i le masina na te’a nei. [ata AF]
ausage@samoanews.com

O le itula e 10:00 i le taeao o le aso Faraile o le vaiaso nei lea ua fa’atulaga e fa’ataunu’u aloaia ai le sauniga fa’apitoa, mo le fa’atautoina o le Vasega lona 25 o Leoleo Fou a le Matagaluega o le Puipuiga o le Saogalemu Fa’alotoifale, lea ua fa’amoemoe e faia i le maota o le Lee Auditorium i Utulei.

 

I le silia ai i le 2 masina talu ona fa’agasolo mai le Vasega lona 25 o Leoleo Fou i le nofoaga fou o Fitafita Tuai i Tafuna, o le vaiaso nei lea ua fa’amoemoe e fa’ai’u aloaia ai loa la latou taumafaiga, ma fa’atautoina ai loa i latou mo le fa’atinoina o le galuega.

 

O le vaiaso nei lea na fa’amaonia mai ai e ni isi o sui o le Vasega 25 a Leoleo i le Samoa News, le amata fa’agasolo o a latou tapenaga mo le fa’au’uga, ma ua mae’a fo’i ona tauaao atu a latou toniga fou mo le fa’aaogaina i le taimi e fa’atino ai le galuega.

 

“E le o se galuega e faigofie, e le gata i le sailiina o le malosi o le tino ae sili ai le feagai ai ma aoaoga i auala e fa’atautaia ai le galuega, ma ua anoanoa’i aoaoga fou ua ou maua e fesoasoani i le fa’atinoina o la’u galuega pe afai ae fa’atautoina o a’u e avea ma malu o le malo, ma ua ou sauni e fa’atino la’u galuega ua valaauina a’u e le Atua ou te tautua ai mo Amerika Samoa”, o le saunoaga lea a se tasi o sui o le Vasega 25 a Leoleo Fou e le i finagalo e fa’ailoa lona suafa, ona e le fa’atagaina o ia ona talanoa i Tusitala i mataupu fa’apenei e fa’atatau i le latou Vasega fou.

 

Ina ua fesiligia e le Samoa News o ia i se vaega o le aoga sa fai ma fa’afitauli ia te ia, na taua e lea sui, “O le taimi o koleniga mo le sailiina o le malosi, o le taimi lena sa pito sili ona fai ma fili ia te a’u, peita’i sa ou fa’amalosi pea ina ia taunu’u lo’u fa’amoemoe”.

 

I se fa’atalatalanoaga a le Samoa News ma le Komesina o Leoleo i le masina na te’a nei, na taua ai e le tofa a Le’i Sonny Thompson le i ai o se fuafuaga mo le toe fa’atupeina o se isi Vasega mo Leoleo i se taimi e le o toe mamao, ona o lo o mana’omia pea ni isi Leoleo e fesoasoani i le galuega.

 

E ui o lea ua sauni e fa’aopoopo le silia i le to’a 30 Leoleo fou i totonu o le matagaluega o Leoleo, peita’i na fa’ailoa e Le’i i le Samoa News e fa’apea, e le taitai lava lea aofa’i e tali ai i le manaoga o lo o tula’i mai o le le lava lea o Leoleo.

 

Sa ia taua le mae’a lea ona faia o fesootaiga ma le Matagaluega e Puipuia Solitulafono i le atunu’u (CJPA), mo se vaega tupe e fa’atupe ai le Vasega lona 26 a Leoleo, ma ua taliaina fo’i e le Fa’atonusili a lea Ofisa, le tofa a Leseiau Laumoli, o se tasi ua tele tausaga o tautua i le Ofisa o Leoleo, sa avea fo’i o ia ma Sui Komesina o le Ofisa o Leoleo i se taimi e lei mamao atu a o le i malolo litaea mai le galuega sa tautua ai mo le tele o tausaga.

 

E pei ona fa’amaonia mai e Le’i i le Samoa News, o le to’a 8 o i latou o le a fa’au’u mai i le Vasega lona 25 lea a Leoleo, o le a tiute i Aoga Maualuluga eseese i le atunu’u ina ia fesoasoani ai i le taumafaiga e foia le fa’afitauli o fualaau fa’asaina o lo o a’afia ai fanau aoga.