O le itula e 10:00 i le taeao nei i le taimi e tatala aloaia ai le tauaofiaga lona 2 a le Fono Faitulafono, i le Fale Laumei i Utulei, o le a maua ai le avanoa o le afioga i le ali’i kovana ia Lolo Matalasi Moliga, na te fa’ailoa atu ai i Ta’ita’i o le Fono Faitulafono le tulaga tonu o lo o i ai le tamaoaiga o le malo ma le atunu’u o Amerika Samoa i le taimi nei.

E pei ona manino i lalo o le Fa’avae Toe Teuteu o Amerika Samoa, e na o le amataga o le tausaga i le aso Gafua lona lua o le masina o Ianuari i le taimi e tatala aloaia ai le tauaofiaga muamua ma le lona 3 a le Fono Faitulafono, e maua ai le avanoa o le Kovana e saunoa ai i luma o le Fono e fa’amanino le tulaga o loo i ai le tamaoaiga o le malo, atoa ai ma atina’e ua mae’a ona fausia mo le silafia e afioga i Senatoa ma Faipule.

E le maua se avanoa o le afioga i le ali’i kovana e saunoa ai i le tatala aloaiaina o tauaofiaga a le Fono, pe a tatala i le aso Gafua lona lua o le masina o Iulai.

Ae o le feiloaiga faapitoa a le kovana ma sui o lana kapeneta, fa’apea ai ta’ita’i o le fono faitulafono aemaise ai afioga i senatoa ma faipule i le vaiaso na te’a nei, na talosagaina ai e Lolo afioga i Ta’ita’i o le Fono mo se avanoa e saunoa ai i le tatala aloaiaina o le tauaofiaga lona 2 o galuega a le Fono i le taeao nei, mo le fa’ailoaina o le tulaga o lo o i ai le tamaoaiga o le atunu’u i le taimi nei, lea fo’i na talia e Ta’ita’i o le Fono.

O le agaga autu o le feiloaiga i le va o le Kovana ma lana vaega fa’amalosi tulafono, fa’apea ai ta’ita’i o le Fono Faitulafono, o le taumafai lea ina ia fa’amanino ni isi o taumafaiga ua sauni le faigamalo e tu’uina atu i luma o le fono, e fesoasoani ai i le tulaga o le toe fa’alauteleina o le tamaoaiga o le atunu’u.

O ni isi o ia taumafaiga e aofia ai ni isi o tulafono tupe ua fuafua le malo e tu’uina atu i luma o le Fono mo lona pasiaina, ina ia fesoasoani ai i le fa’amalosia o le itu tau tupe a le malo i le lumana’i.

Saunoa Lolo e fa’apea, o le tele o suiga ua faia i totonu o le faigamalo a le Iunaite Setete taimi nei, ua mafua ai ona manatu le faigamalo fa’alotoifale a Amerika Samoa e saili ni isi o suiga ina ia mafai ai ona fa’afetaui suiga ua auina mai fafo.

“I lo ma talitonuga ma le afioga i le lutena kovana ia Lemanu Palepoi Mauga, o lo o i ai lava avanoa e mafai ai ona toe fa’alautele ma toe fetu’una’i le tulaga o lo tatou tamaoaiga, ina ia fesoasoani ai i le fausiaina o se faigamalo malosi ma mautu i le lumana’i”, o se vaega lea o le saunoaga a le ali’i kovana.

Sa ia taua atili galuega e pei ona galulue i ai le Komiti ua mae’a ona tofia e sailia auala e fa’aleleia ai le tamaoaiga o le malo (Revenue Task Force), ina ia mafai ai ona maua auala e fesoasoani ai i le toe si’itia i luga o le tamaoaiga o le malo atoa ai ma tagata lautele.

“O le agaga atoa o le malo, ia le gata e maua auala e fa’aopoopo ma toe fa’amalosia ai tulaga tau tupe i totonu o le malo, a ia mafai fo’i ona tatala isi faitoto’a e maua ai e tagata lautele isi fa’aopoopoga i tulaga o a latou tupe maua e tausi ai aiga”, o le saunoaga lea a le ali’i kovana.

“I tulaga i kamupani tetele o lo o tua i ai le tamaoaiga o le malo i le taimi nei, e le o tulaga mautu mai lava le lumana’i o kamupani i’a e 2 o lo o i ai i le atunu’u i le taimi nei. I le tulaga o le STP (Samoa Tuna Processors) i la matou fonotaga mulimuli sa faia ma ona ta’ita’iga, e foliga e le o manuia le tulaga o loo i ai lo latou lumana’i, e oo lava fo’i i le kamupani a le StarKist, o loo i ai lava fo’i tulaga faigata o loo tula’i mai ai, ma o itu la ia e tatau ona tatou vaavaai i ai ina ia saili ni auala e mafai ai ona faamalosia le tamaoaiga o le malo i le lumana’i”.

O le mae’a ai o le sauniga e tatala fa’atasi ai le tauaofiaga a le Fono i le taeao nei, ona taape loa lea o maota e lua mo ana galuega masani mo le isi 45 aso o lenei tauaofiaga, e pei ona i ai le Senate i le Fale Samoa a le Fono Faitulafono, ae o le maota o sui i le fale o loo i le itu taumatau o le Fale Laumei i Utulei.